Dy fjalë rreth jetëshkrimit të Autorit
Zef Doda lindi në vitin 1923, në Salcë të Nikaj-Mërturit, Tropojë. Nxënës i Internatit “Kosova”, në Krumë të Hasit. Ka mbaruar Shkollën Normale të Elbasanit, dhe më vonë në vitin 1960 ka kryer Institutin e Lartë Pedagogjik në Shkodër.
Ka punuar si arsimtar një jetë të tërë, ku për 26 vjet ka qenë drejtor shkolle, ndër të cilat 12 vjet drejtor zone. Në vitin 1980 i aprovohet nga Komisioni i Rrethit Tropojë, maketi i historikut të Nikaj-Mërturit mbi bazën e të cilit u ngrit edhe muzeu historik i zonës, që pasqyronte luftërat dhe përpjekjet e popullit në periudhat e ndryshme historike.
Ka qenë anëtar i komisionit për projekt-historikun e rrethit të Tropojës dhe njëkohësisht ka qenë autor i pjesës së parë, nga lashtësia deri në pavarësinë e vitit 1912.
Ka vazhduar punën pa ndërprerje në Institutin e Gjuhësisë, Tiranë.
Në zgjedhjet e 22 marsit 1992, ka qenë kandidat për deputet në Kuvendin Popullor për Partinë Demokristiane.
Në vitet e para të hapjes së Shqipërisë ka asistuar edhe studiues të huaj, më 1992 ndihmoi çiftin italian, Emmanuela Del Re dhe Franz Gustincich, ekspertë në fushat e sociologjisë e gazetarisë në hulumtimet e tyre, për kanunin. Ky çift kreu një mision shumë të rëndësishëm, që do të mbetet në kohë, sepse Zef Dodë Dedndreaj ata me t’u kthyer në Itali botuan librin “Pane, sale e cuore – bukë kripë e zemër – bread, salt and heart”, me mbresat e gjithçkaje që kishin përjetuar në malësi, me dedikimin: “Zef Dodës dhe Malësorëve”.
Ka marrë pjesë shumë herë në faljen e gjaqeve në Malësi.
Është thirrur shumë herë të tjera për pleqni në gjaqe e ngatërresa, duke kontribuar në zgjidhjen e tyre.
Të shkruarit ka qenë një nga pasionet, kurse të botuarit ishte ëndrra e tij. Librat e tij për arsye që tashmë dihen, vetëm pas viteve ‘90 kanë gjetur dritën e botimit.
Libri i tij i parë, “Mashtrimi” u botua në vitin 1997, dhe më pas është ndjekur nga romani “Mësuesi në Shkollën e Shukut”, “Kulla e Zjarrit” monografi, “Sokol Meshi Njeriu i punës” monografi, botuar në vitin 2005, etj. Bashkautor me historianin Dodë Progni në historikun “Nikaj-Mërturi, “Vështrim Historik”, dalë në botim në vitin 2003, dhe i risjellur për ribotim në shtator të vitit 2024.
Ka lënë në dorëshkrim dhe shumë vepra të tjera, që janë në proces botimi pas vdekjes.