Tre Poezi të hershme – nga Jozef Radi – si protestë e sotme ndaj Kryeparlamentarit të Ri – 2017

Muret e Muzgut 1993

Muret e Muzgut 1993

Tre Poezi të hershme – nga Jozef Radi

si protestë e sotme ndaj Kryeparlamentarit të Ri – 2017

Unë Jozef Radi – protestoj publikisht ndaj emërimit e Gramoz Ruçit, në krye të Parlamentit shqiptar
Protestoj në mënyrën time, me këto poezi të shkruara herët (1991), kohë kur në Shqipëri nuk kishte ende demokraci, kohë kur Kryeparlamentari i Sotëm ishte Ministër i Brendëshëm i Diktaturës, kohë kur në Shkodër ndodhte Masakra e 2 Prillit, dhe 4 djem nënash vriteshin e qindra të tjerë plagoseshin. Kam protestuar atëherë, në mënyrën time me këto poezi të botuara te (Muret e Muzgut – 1993), protestoj edhe sot fuqishëm, sërish në mënyrën time, kundra emërimit të kësaj figure në Tempullin e Lartë të Ligjeve…
Pyetja që shtroj unë, Jozef Lazër Radi, ndaj Kryeparalamentarit shqiptar është kjo: A mundem unë të besoj se Gramoz Ruçi do të mbrojë me ligje: dinjitetin, vlerat, të drejtat, sakrificat dhe vuajtjet e mia dhe gjithë atyre që vuajtën nga diktatura dhe po vuajnë nga postdiktatura? A mundet ai të kontribuojë për paqen sociale, për barazinë midis qytetarëve, për drejtat ende sot të mohuara… njeriu, i cili jo shumë kohë më parë, ka qenë pikërisht ministër i Diktaturës dhe organeve më represive të saj!!
Unë nuk besoj kurrën e kurrës!!!
Prandaj protestoj fuqishëm ndaj emërimit të Gramoz Ruçit në krye të Parlamentit Shqiptar!
10 shtator 2017

.

Jozef Radi 2012

Jozef Radi 2012

Qyteti i gjanave t’Mëdha…

N’Kafe të Madhe
e pijmë kafen të hidhët zeher,
gjithçka mbas saj ma e ambël bahet.
 
N’Kishë të Madhe,
dita e Ringjalljes së të Lumit,
thyen kambanat e nji çerek shekulli ankth.
 
N’Arrë të Madhe
sythët plasin me cicërima zogjsh,
dhe marsi ndjen frikë me dalë para prillit.
 
N’qytetin e Gjanave t’Mëdha,
përqafen Liqeni, Buna, Kiri,
edhe Drini (i Bardhi e i Ziu bashkë)
Po njerzia e Qytetit të Gjanave t’Mëdha
s’trembet pse Kupola e Krimit ka urdhnue:
“Drini i Kuq, qytetin ta përmbytë!”
1991
.
Shkodër… 2 prill 1991

Shkodër… 2 prill 1991

Prill’i përgjakun

I vyshkën rrugët të hikunit,
dhe mbramjeve
n’ecejake të zbrazta
përplasemi ndër puthje
të mbetuna pezull
dhe heshtje t’acarta.
 
N’sythat e dritës s’re
rri strukë Shpresa,
po prillit me duer t’përgjakta
i asht përlye vesa!
Qelqe andrrash grimcue n’sheshe
gëzhoja t’hjedhuna si oriz dasme
dhe lulet e paçeluna u thanë!
 
O Zot!
Edhe gëzimin n’nji fitorje
e firmosën me gjak
prej puthjesh këputë!
 
I vyshkën rrugtë e marsit të hikunit,
dhe prillin e drandofilleve
e përgjakën heronjtë e dhunës.
1991
.
Statuja në Muzeun Arkeologjik

Statuja në Muzeun Arkeologjik

Statujat pa kokë në Muzeun Kombëtar

Kaq rrënqethse
kokat tueja t’humbuna ndër shekuj,
sa përditë m’bren dyshimi
n’ekzistencën teme!
 
Përpëlitem zgjuet dhe n’andërr
me e bindë vedin se s’asht e vërtetë
se kryet e kam dhe njasaj i bindem,
dhe n’se vuej, e them pa grimë droje,
vuej bash pasjen e saj mbi sup!
 
Po ju, o bukuri të lashta,
me pamje tronditëse,
o heroizma kryekëputuna
që rrekeni me na bindë
se prej kohnash të hikuna
te kohnat që afrojnë
t’parat, janë kokat që psojnë…
 
N’shpirtin tem
nqethëse mungesa e kokave tueja.
Gjymtimi juej netëve më trazon!
E ndërsa vuej kokat tueja
t’humbuna ndër shekuj,
kqyri kokën teme,
që mbytë n’dyshime e ka kohën teme!
1991
(Marrë nga libri “Muret e Muzgut” – Tiranë 1993, fq. 129, 133, 139)

 

Ju mund të ndiqni çdo përgjigje për këtë term nëpërmjet RSS 2.0 feed. Ju mund të lini një përgjigje , ose Ndiqni nga faqja e juaj. Kategoria: Gazeta, Poezia  Etiketat: , , , , , , ,

Lini një Përgjigje

Visit Us On TwitterVisit Us On Facebook