Gjashtë poezi nga Lazër Radi Arbëria 1993

1
16
Dr. Lazër Radi (1916-1998)
Dr. Lazër Radi (1916-1998)
Lazer Radi 1916-1998
Lazër Radi 1916-1998

 Gjashtë poezi nga Lazër Radi

– Arbëria 1993

“…që tash mund të parathuhet, se ai me mjeshtëri prej poeti të vërtetë, 
në më të shumtën e herëve, nxjerr në sipërfaqe ndjenjat më të holla njerzore, 
për të bukurën, dhimbjen dhe vuajtjen shpirtërore të një njeriu të ndrydhur 
me dekada nëpër burgje,interrnime dhe kampe pune të diktaturës enveriane,
që pothuaj për një gjysëm shekulli e sundoi Shqipërinë…
Jo si zakonisht, poeti Lazër Radi, gërsheton ndjenjën poetike me filozofinë,
gjë që e bën poezinë e tij të qëndrueshme nëpër kohë dhe sot
ajo arrin të marrë një konotacion interesant dhe përgjithësues…
Kjo për shkak se ai nuk e sforcoi me dhunë ndjenjën, talentin… e la të rrjedhë lirshëm, 
pavarsisht rrebesheve tragjike që rënduan mbi personalitetin e tij…!”
Mustafë Xhemaili “Rilindja” – e hënë, 26 tetor 1992, nr.145 (11.2619)

.

Ku ndali Shqiponja?

Ku ndali shqiponja?
Te gurgullima e kroit
a te fëshfërimë e pishnajës?
Te honi i vdekjes mbi shkamb
a te çerdhja e dritës në qiell?
Ku ndali shqiponja
t’i çelë zogjtë e saj?
Ku ndali shqiponja,
ku krahët i mblodhi,
ku shpirtin shpalosi…?
Ku ndali shqiponja,
gjithçka emnin e saj mori!

Dashni Brezash

Mbas nesh vijnë të tjerë…
nën tokë zgjatën rranjët
mbi tokë shtrihen degat,
ntrashet ndër kohna trungu i Fisit
mjaltet rrushi në maje të lisit…

Ndër brazda brezash
s’humb kurrë dashnia që hodhëm
s’humb fjala e dhanë se e ruan guri
edhe pse kobi, si korbi
vërdallë i vjen
dashnisë së brezave

Toka e Shenjtë

(Vegim mojzean)

Mbi nji kërcu lisi
gjurmat e currilave të shpirtit
i bajnë andrrat me blerue…

…diku tej livadhesh,
nji kaçubë digjet flakë
po s’shkrumbet
edhe pse zjarri bubullon prrallshëm
kurrë e gjitha n’hi s’kthehet…

Drejt kaçubës n’flakë
shtegtarët shtegun morën…
Nji zà prej qiejve zbriste vetëtimë:
“Hiqi sandallet o shtegtar
e zbathun shkeli livadhet
e Tokës së Shenjtë..!!”

Idil dimnor

S’harrohet ajo natë polare
e tërkuztë,
e akullt,
e tmerrtë,
jetëmarrëse
………………….
Po… kur, si me magji ti erdhe
të kandshme,
andrruese
të ngrohtë
jetëdhanse
e bane at natë ankthesh…

Ndër lodra të çmenduna
e strukje ledhatare
ndër zjarre pafund puthjesh
e ndjeva përtërimjen e shpirtit…
dhe dimni shterresh
n’misterin e nji andrre
t’shpërthyeme befas…

Njeriu 359

(në burg secili prej nesh ishte nji numër)

Jeton a s’jeton ai njeri i paemën?
Njeriu tre-pesë-nantë
nën at kod të frikshëm
shiritash bardh e zi?

Jeton a s’jeton ai njeri
që gdhihet e ngryset
i pangjyrë,
i pazhurmë,
i pabukë
i padritë
i pazjarr…

Gjallon a nuk gjallon vallë
njeriu që andrronte qiejt
edhe kur e hiqshin zvarrë…?

Kalorsi i Jetës

Mbi krahë ernash
mori fluturim,
kopshtijet e jetës i zgjoi
dhe terrin me thundrat e kalit e ndezi…
dhe toka ndjeu kangën e luleve
dhe kafshët humbën livadhesh
dhe zogjtë iu kthyen foleve
dhe velat nxituen me frymën e erës…

Kalorsi i jetës… kalorsi i jetës
vraponte ndër qiej
me kalin e Shpresës…

(Marre nga Revista Arbëria Nr. 10, 1993)

Related Images:

Artikulli paraprakKur të huton liria… Bedra Kaba (pjesa e V)
Artikulli tjetërMark Zuckerberg: Të fusim në rrjet 5 miliardi njerëz…
Jozef Radi
Biografi Jozef Radi 16 janar 1957, lind rastësisht në qytetin e Elbasanit, mbasi të dy prindët e posadalë nga burgu ishin interrnuar në kampin e Kuçit të Kurveleshit... Ishte i vetmi fëmijë i të ashtuquajturit “Kampi i 100 Intelektualëve”... 1957, Pagëzohet me emrin Antonin, por xhaxhai i tij me të njejtin emër, e regjistron si Jozef... 1957-1961, ndjek fatin e prindërve në odisenë e kampeve: Radostinë, Gradishtë, Çermë dhe më së fundi n’atë të Savrës... 1963-1971, kryen shkollën fillore dhe tetëvjeçare në Karbunarë dhe Savër me rezultate shumë të mira... 1971-1975, ndjek gjimnazin “20 Tetori” në qytetin e Lushnjes, ku përjashtohet dy herë nga shkolla, thjesht si... i biri i Lazër Radit! 1975, frekuenton të njëjtën klasë me Gëzim Hajdarin dhe Shpend Sollakun: Tre të apasionuar të letërsisë; më vonë edhe autorë mjaft të njohur librash... 1975, fillon si puntor në fermën e Savrës 1977-1979, kryen shërbimin ushtarak në repartet e xhenjos, fortifikim në Dropull të Gjirokastrës... 1981, mbaron shkollën e mesme me rezultate të shkëlqyera dhe as bëhet fjalë për vazhdimin e ndonji shkolle të lartë... 1984, bën gjithë përpjekjet për botimin e librit të parë poetik “Trokitje”, por problemet e biografike... e pengojnë botimin edhe pse Shtëpia Botuese e kishte vlerësuar si... “të botueshëm...” 1984-1990, krahas punës së rëndë në bujqësi, studion intensivisht gjuhët e huaja; merret me përkthime, shkruan dhe redakton veprën e të atit... 1989, së bashku me të atin përkthejnë veprën “Stalini, Moxarti dhe Maria Judina” e poetit Bërkoviqit, e cila kalon dorë me dorë si vepër antidiktaturë... 1990, së bashku me të Atin, vendosen në Tiranë, prej ku nis nji fazë e re shprese dhe entusiazmi, se demokracia mund t’i riparojë pasojat e diktaturës... dhjetor 1990-31 mars 1991, ndjek nga afër lëvizjen dhe ndryshimet demokratike... mars 1991, boton për herë të parë, ciklin me 6 poezi në revistën arbëreshe “Katundi Ynë” në Kozenca. maj 1991, regjistrohet në fakultetin e Gjuhë- Letërsisë dhe më pas kalon në atë Juridik. 1993, botojnë së bashku me të atin librin e parë “Muret e Muzgut” si dhe poemën “Stalini, Mozarti dhe Maria Judina” 1993, nis botimin e revistës tremujore “Arbëria”, e cila del në tre numra... 1993-maj 1997, punon në detyra të ndryshme në Presidencën e Republikës. qershor 1994, mbaron Fakultetin Juridik qershor 1997, ngjarjet e atij viti ishin dëshmi e vrasjes së demokracisë... detyrohet të emigrojë në Itali. shtator 1998, humb të Atin, Lazër Radin, njeriun me të cilin kishte ndarë ditët më të vështira të jetës. 2000, boton librin e dytë poetik: “Kujtesa e Mjegullës” 2004-2005, mbulon për gati dy vjet rubrikën “Qiell i Përtejmë” në revistën “ars” 2007, boton me bashkaautorë albumin fotografik “Ancona nascosta” 2000-2010, bashkpunon me shokun e tij Gëzim Hajdari, në redaktim e veprës së tij të botuar në Itali 2011, boton librin e tretë poetik “Fletorja e Vjeshtës” 2000-2013, bashkëpunon vazhdimisht me shtypin shqiptar 2000-2013, përkthyen mjaft nga veprat e poetëve si: Ungaretti, Montale, Raboni, Senesi, Fatuiva, Pessoa, De Moraes, Hikmet etje, si dhe ka në duar veprën e Bodlerit “Lulet e së keqes” 2016, po përgatit për botim veprën e plotë të Lazër Radit në 14 vëllime... Jeton prej 16 vitesh në qytetin e Anconës...

1 Koment

  1. Pjetër Delia
    Pa dyshim… do jetë gjithmonë nji gjigant i letërsisë dhe i edukatës intelektuale… Mjafton leximi i këtyre poezive… Edhe pse i kanë vrarë jetën, prapseprap ai nuk i fyen… vetëm ju kujton se jeta është e rëndësishme për të gjithë, e jo vetëm për dikë.
    Unë mendoj që për të ndjerë pendim duhet të keshë ndjenjë dh karakter… Kur mungon ndjenja mungon edukata… e kur mungon edukata bëhemi kafshë… Historia ka treguar se viktimat e preferuara kanë qenë gjithmonë intelektualët dhe të pafajshmit… (Marrë nga muri i fb 5 prill 2014)

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.