Bleta – Ky emër të madh, me një botë të tërë mbi supe
Bleta është një krijesë e vogël, por me një fuqi që sfidon mendjen e njeriut. Ajo nuk flet por flet vetë heshtja e saj, në çdo lëvizje që bën, në çdo petal që prek, në çdo kthim që bën në folenë e saj. Nuk ka emër të madh, por mban mbi supe një botë të tërë, mban ushqimin e njerëzimit, gjelbërimin e fushave, lulëzimin e pranverës. Nuk ka duar, por ndërton arkitekturë që s’e shembin as shekujt, fole të përsosura në formë gjashtëkëndore që e lënë shkencën pa fjalë.
Askush nuk i mësoi shkencë, por ajo mat distancat me diellin, gjen udhën për në lule dhe kthehet sërish në shtëpinë e saj me një kujtesë që e lakmojnë edhe makineritë më të sofistikuara. Fluturon me një trup që nuk duhet të fluturojë, por ajo nuk e di këtë dhe prandaj fluturon. Ajo nuk kërkon leje nga fizika, ajo thjesht beson dhe ecën përpara.
Në një botë ku njeriu flet për rend, bleta e jeton rendin. Aty nuk ka udhëheqës që rri në hije dhe nuk punon. Çdo bletë punon. Çdo bletë jep. Askush nuk merr më shumë se tjetri. Nuk ka lakmi. Nuk ka grindje. Nuk ka gjykime. Ka vetëm detyrë. Ka vetëm harmoni. Dhe përmes kësaj harmonie, lind mjalti – ajo pasuri e ëmbël që njeriu ende nuk ka arritur ta krijojë vetë.
Ne shohim mjaltin dhe themi sa i mirë është, por harrojmë mundin që fshihet pas çdo pikë që vjen në tryezën tonë. Harrojmë fluturimet, përkushtimin, sakrificën. Harrojmë që ajo mund të therë vetëm një herë dhe pastaj të vdesë. Ajo nuk e përdor thumbin për hakmarrje, por vetëm për mbrojtje. Edhe kur vdes, e bën për të mbrojtur të tjerat. Çfarë njeriu do të bënte një gjë të tillë sot?
Bleta nuk do duartrokitje, nuk do famë, nuk ka nevojë për pasaportë apo titull. Por pa të, nuk do të kishte jetë. Nëse ajo zhduket, ngadalë e sigurt, shkon pas saj edhe bota jonë. Kështu që herën tjetër kur të shohësh një bletë në dritare, mos e përzë. Ajo nuk ka ardhur të të shqetësojë, ka ardhur të të kujtojë se Zoti flet edhe përmes një krijese kaq të vogël dhe të heshtur.
Dhe ndoshta, në këtë kohë zhurmash dhe vetëmburrjesh, ajo është zëri më i fortë që na flet për vlerën e punës, përkushtimit, dhe përulësisë.
Marrë nga Faqja e FB Nikaj Mertur News, 13 qershor 2025