11.5 C
Tirana
E diel, 3 Mars, 2024

Mbeshtet RadiandRadi

spot_img

Takimi i fundit me Dom Lazër Shantojën nga Lazër Radi

on

|

views

and

comments

Dom Lazer Shantoja (1892-1945)
Dom Lazer Shantoja (1892-1945)

Takimi i fundit me Dom Lazër Shantojën

nga Lazër  Radi

Ishim në Burgun e Ri të Tiranës, n’at vit të ftoftë e të akullt, n’at janar ngricash e mornicash të fillimvitit ’45…
Para portës së hekurt të burgut ndaloi nji kamion ushtrie i zbuluem. Zakonisht, ksi lloj makinash sillnin të burgosun tё ri, po s’po dukesh asgjà. Mbi karroceri nuk shifesh tjetër, veç nja dhjetë partizanë më mashinka në krahë. Mbasi zbritën nji njeri, ai nisi me lëvizë kamba-doras, kurse të dytin e kapën si leckë dhe e hodhën si deng leshi me do zhele që i shtynë me kambë prej makinёs.
U ndigjue veç nji rankim i mbytun e mandej heshtje! Plakun që kishin zbritë të parin, tue e tërhjekë rrëshqanë ishte Sylçe Beg Bushati, dikur krenari e Shkodrës, ndërsa tё dytin, që e përplasën në cep të shkallës e që ishte veshё krejt në t’zeza ishte shkrimtari, poeti, muzikanti e prifti i “pianofortit” siç i thonim dikur… Dom Lazër Shantoja.
“O zot, po k’ta janë njerëz fisnikë!” – pshëretiu dikush…
Protestuem për at sjellje brutale… po na kërcnuen se mund ta psonim të njajtin fat nse guxonim me e hapë gojë!
“Asht kohë bishash!” – u nëpërdhambëm dhe u pamë ndër sy!
Dolëm disa të burgosun, i çuem në kambë dhe duke i mbajtë përkrahësh me shumë mundim i futëm mbrendё. Po ku t’i sistemonim? Burgu qe kthye i gjithi n’nji çerdhe milingonash. I tejmbushun me dykamsha njerzorë, që tashma kishin humbë çdo tipar njerzor, prej atyne bishash “çlirimtare”.
As kafshë s’mund të quheshim, sepse edhe kafshët ishin të lira tё gëzonin ma shumë të drejta se ne!
Andej-këndej i mblodhëm do shtresa e do mbulesa dhe i sistemuem disi te nji korridor, diku afër banjos. Mbas do kohe, kur erdh në vedi, Dom Lazri po na shihte me rradhë si i hutuem e s’po njifte asnjenin prej nesh. Iu afrova edhe unë… I përmenda disa raste të përjetueme sëbashku në Romë e në Tiranë. Po… asgja! Dikur vonë filloi ka pak me u kthjellë e na i kallzoi me shenja kockat e thyeme të kambve e plagët e hapuna në trup, e të mbushuna me krypë.
Ndjemë tmerr e rrёqethje…
Mbas disa ditësh erdhën dhe i morën… Ashtu siç e kishin sjellë: rrëshqanë e përplasën n’nji tjetёr birucë. Me nji gjykim somar (gjyq pa asnji procedurë normale) i dënuen me vdekje… U tha se i çuen diku në Breg të Lumit e meqë s’mund të qëndronte në kambë, pse i kishte krejt kockat e thyeme, e hodhën të gjallë n’nji gropë… dhe prej nalt i shkarkuen bataret prej “mashinkave”.
Thanë se i mbuluen aty shpejt e shpejt me dhè, po askush s’e di nëse i mbuluen të gjallë apo të vdekun… sepse dikush kishte thanё që i kishin mbulue të gjallë me dhe…
O zot, deri kur!!

1992

Related Images:

Jozef Radi
Jozef Radihttps://www.radiandradi.com
Biografi Jozef Radi 16 janar 1957, lind rastësisht në qytetin e Elbasanit, mbasi të dy prindët e posadalë nga burgu ishin interrnuar në kampin e Kuçit të Kurveleshit... Ishte i vetmi fëmijë i të ashtuquajturit “Kampi i 100 Intelektualëve”... 1957, Pagëzohet me emrin Antonin, por xhaxhai i tij me të njejtin emër, e regjistron si Jozef... 1957-1961, ndjek fatin e prindërve në odisenë e kampeve: Radostinë, Gradishtë, Çermë dhe më së fundi n’atë të Savrës... 1963-1971, kryen shkollën fillore dhe tetëvjeçare në Karbunarë dhe Savër me rezultate shumë të mira... 1971-1975, ndjek gjimnazin “20 Tetori” në qytetin e Lushnjes, ku përjashtohet dy herë nga shkolla, thjesht si... i biri i Lazër Radit! 1975, frekuenton të njëjtën klasë me Gëzim Hajdarin dhe Shpend Sollakun: Tre të apasionuar të letërsisë; më vonë edhe autorë mjaft të njohur librash... 1975, fillon si puntor në fermën e Savrës 1977-1979, kryen shërbimin ushtarak në repartet e xhenjos, fortifikim në Dropull të Gjirokastrës... 1981, mbaron shkollën e mesme me rezultate të shkëlqyera dhe as bëhet fjalë për vazhdimin e ndonji shkolle të lartë... 1984, bën gjithë përpjekjet për botimin e librit të parë poetik “Trokitje”, por problemet e biografike... e pengojnë botimin edhe pse Shtëpia Botuese e kishte vlerësuar si... “të botueshëm...” 1984-1990, krahas punës së rëndë në bujqësi, studion intensivisht gjuhët e huaja; merret me përkthime, shkruan dhe redakton veprën e të atit... 1989, së bashku me të atin përkthejnë veprën “Stalini, Moxarti dhe Maria Judina” e poetit Bërkoviqit, e cila kalon dorë me dorë si vepër antidiktaturë... 1990, së bashku me të Atin, vendosen në Tiranë, prej ku nis nji fazë e re shprese dhe entusiazmi, se demokracia mund t’i riparojë pasojat e diktaturës... dhjetor 1990-31 mars 1991, ndjek nga afër lëvizjen dhe ndryshimet demokratike... mars 1991, boton për herë të parë, ciklin me 6 poezi në revistën arbëreshe “Katundi Ynë” në Kozenca. maj 1991, regjistrohet në fakultetin e Gjuhë- Letërsisë dhe më pas kalon në atë Juridik. 1993, botojnë së bashku me të atin librin e parë “Muret e Muzgut” si dhe poemën “Stalini, Mozarti dhe Maria Judina” 1993, nis botimin e revistës tremujore “Arbëria”, e cila del në tre numra... 1993-maj 1997, punon në detyra të ndryshme në Presidencën e Republikës. qershor 1994, mbaron Fakultetin Juridik qershor 1997, ngjarjet e atij viti ishin dëshmi e vrasjes së demokracisë... detyrohet të emigrojë në Itali. shtator 1998, humb të Atin, Lazër Radin, njeriun me të cilin kishte ndarë ditët më të vështira të jetës. 2000, boton librin e dytë poetik: “Kujtesa e Mjegullës” 2004-2005, mbulon për gati dy vjet rubrikën “Qiell i Përtejmë” në revistën “ars” 2007, boton me bashkaautorë albumin fotografik “Ancona nascosta” 2000-2010, bashkpunon me shokun e tij Gëzim Hajdari, në redaktim e veprës së tij të botuar në Itali 2011, boton librin e tretë poetik “Fletorja e Vjeshtës” 2000-2013, bashkëpunon vazhdimisht me shtypin shqiptar 2000-2013, përkthyen mjaft nga veprat e poetëve si: Ungaretti, Montale, Raboni, Senesi, Fatuiva, Pessoa, De Moraes, Hikmet etje, si dhe ka në duar veprën e Bodlerit “Lulet e së keqes” 2016, po përgatit për botim veprën e plotë të Lazër Radit në 14 vëllime... Jeton prej 16 vitesh në qytetin e Anconës...
Share this
Tags

I ke lexuar?

Kontesha Bengazina – nga Lazër Radi – Pjesë nga Libri “Vorbulla t’Jetës Universitare” (Roma)

 Nji prej historive ma të bukura studentore, të rrëfyeme mjeshtrisht prej Lazër Radit në librin autobiografik: “Vorbulla t'jetës Universitare”, ku ai me at sinqeritetin e tij...

Katalogimi i Veprës së Plotë të LAZËR RADIT

  Katalogimi i veprës së plotë të LAZËR RADI  Materiali që paraqesim asht nji bibliografi e thuejse krejt Veprës së Plotë të Dr. Lazër Radit, botue dhe...

Kujtimet e mia me At Zef Valentinin – nga librat e Lazër Radit

Kujtimet e mia me At Zef Valentinin nga librat e Lazër Radit Kanuni dhe teza e doktoraturës Mbasi mbylla llogarinë me Procedurën Civile, në mënyrën ma të...

Te rejat

More like this

3 KOMENTET

  1. Ndoc Selimi:
    Dom Lazër Shantoja kishte shegert Mentor Xhemalin, ku Lazri i dha për herë të parë edukatën muzikore, pasi i binte pianos dhe e kishte në shtëpi. Sa filluan grumbullimet partizane, Xhemali iku dhe u kthye në kohën që u arrestua Dom Lazri. Kur shkuan në shtëpi të afërmit e tij për të marrë plaçkat, te dera u doli Mentor Xhemali dhe u tha: ” Ikni këpusni qafën, nëse nuk do të përfundoni edhe ju si ai krimineli.
    Këtu tani banoj une!”

  2. Askurrgja s’kam ditë për Dom Lazër Shantojën edhe pse kishte kenë shkrimtar, përkthyes, njeri i letrave. Kisha krye studimet e Nalta për Letërsi. Vetëm, kur u emnova mësues në rrethin e Kukësit, diku në Kala të Dodës, rreth 8 orë larg qytetit, tuj ba regjistrimet në nji shpi n’fshatin Bushtricë, kur i zoti i shpisë po xirrte pasaportat nga nji arkë e vjetër që ishte edhe me libra, m’ra n’sy nji librec i vogël, doracak si me thanë “Libër xhepi”. E pashë me habi, ku shkruhej: “Net Kazanash”, Dom Lazër Shantoja. A… prift, – thashë me vedi. Ishte viti 1966, e nji vit mbrapa do të bahej kasaphana n’institucionet fetare. Megjithatë, kryezotshpiaku, mbasi ia kërkova librin, ma fali tuj thanë: “Merre, o Shkodër, se unë s’e marr fort vesht çka shkruen se asht gjuhë që s’e kuptoj. E ka pas pru e lanë qaty baba i jem kur patën hi partizant n’Shkodër, i kanë gjetë tanë librat t’hallakatme nëpër sokak. Kush mujte mblidhte aso librash, po shumica e partizanëve ishin gjinde e pashkollë, i gjuejshin me shkelma, po dikush edhe i merrte, si puna e babës tem, që s’ka ditë me lexue. E kemi mbajte krejt kot. – Merre, merre, – më tha 2 herë. Unë e mora, e lexova ku kishte gjana me të vërtetë të bukura, si: Kash e lasha (gjëagjëza), “tvetje pa përgjigje” (pyetje), si: Pse mica kur futet n’odë te dera; nji herë sheh majtas, nji herë djathtas e mandej hyn? (Përgjigja: “Se s’mundet me pa njikohësisht në të dy anët” ose “Kush t’man ma xet se nji tallagan? (Përgjigja: Dy tallagana). Çka ban gamari n’diell?! (Pergjigja: Hije) etj.etj. Kishte edhe anekdota. Për rrezik temin at libër dikush, ndoshta shokët, m’fal o Zot, ma morën, po nuk m’ra n’dore ma. S’mujta me bzajtë se ishte prift shkrimtari e shpesh me thoshin: Ha kaurr-kaurri si me shaka, po mue nuk më vinte mirë. Shpesh namshin: “T’preftë kaurri”! – e kishin fjalën për shkijet se diftojshin kacafytje të shpeshta me ta. Kangët e trimnis krejt në luftë me serbin i kishin…
    Me shkrue për Dom Lazrin, s’përfundoj kurrë..

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.

Copy Protected by Chetan's WP-Copyprotect.