11.5 C
Tirana
E shtunë, 2 Mars, 2024

Mbeshtet RadiandRadi

spot_img

Ode Skënderbeut – nga Pierfranco Bruni – Përktheu Jozef Radi

on

|

views

and

comments

Gjergj Kastrioti - Skënderbeu (1405-1468)
Gjergj Kastrioti – Skënderbeu (1405-1468)

Ode Skënderbeut

nga Pierfranco Bruni – Përktheu Jozef Radi

(Recitim i një shkrimtari
që s’e pranon historinë
si nji gjurmë të racionales)
.
Koha e ka tha Historinë
dhe qytetnimet kanë ndigjue kujtime të pafundme
E nëse kërkimi i lirisë
s’asht nji metaforë
tensioni i epokave
ka kapërcye n’eksodin e popujve
 
Në këto arrati
s’ka pasë udhëtime
n’erë
po era
i ka shkye dallgët
dhe deti
asht shfaqë i çamë në përmbytje
t’ekzistencave
 
Këta njerëz janë nji popull që ikën
po kurrë nomadë, as bij të erës
n’vuejtje e ecejake të pafundme midis Lindjes dhe Perëndimit
Troja e kujtimeve të kujtueme
asht nji qytet që s’shuhet kurrë
n’kufijtë midis detnave dhe maleve
n’ecejake të heronjve dhe miteve
përcaktue kaherë prej Homeri
 
Fate shtegtimesh
Etër dhe Brezni janë në gjakun tand
e ndër tokat ku ke dëshmue
në nji të shkueme
nji trashëgimi midis vendesh të ripopullueme
 
E n’se besimi asht liri
mos ta harrojmë
frikën prej hanave të çame më dysh
dhe në natën e Krojës
nji heshtje e vetme
në klithmën e thekshme
prej nesh
që vazhdojmë me t’kërkue
ndër kujtime që s’i kemi ma
dhe në shije të nostalgjive
që s’i njohim ma
veçse në dritë të ngjyrave, n’muzikë e në valle
prej ditve që ndigjojnë zanet e qëndresës
po miti q’u shndërrue në simbol
asht ma i fortë se çdonjena fjalë
 
Fantazia
asht vesh me fat
fantazia përcjell fatet e njerëzve
n’diasporë
e synon me mbledhë dhimbje të përbashkëta
 
Nëse ky Perëndim
ndërthuret me Lindje
asht ende në ty
 
Qytetnimi në Krisht
dishiron m’u bashkue tuj i mposhtë vetmitë
dhe për ne
ka gjithmonë kuptim
m’u ndodhë midis eksodit dhe diasporës
me jehonën e kangës së Uliksit
që shoqnon
vajtimet e mbramjeve
dhe perëndimet që shenjojnë horizontin.
 
Ndër brigjet italike
hapi yt s’ka lanë hije
po ka me ta gdhendë mendimin n’shkamb
e ka me përshkue trishtime dhe rikthime
ndër epoka t’largëta.
 
Dhe shifen flamuj t’naltuem në port
dhe ndigjohen tinguj ndër rite ballkanase
festa ka nisë ndër vende që vishen gjith’ ngjyra
e prej frengjive n’duhmë temjani
preken paksa n’maje të gishtave
fluturime fjalësh ku ndihen thekset posa flasin.
.
Gjergj Kastrioti - Skënderbeu - pikturë nga Ndoc Gajtani
Gjergj Kastrioti – Skënderbeu – pikturë nga Ndoc Gajtani
Ata vijnë prej larg
e largësitë e historisë i masin
me rrahjen e daulleve
Prekjet e kujtesës
janë si me kërkue me mbyllë n’nji gjest
nji dashni ma t’lashtë se lashtsia.
 
Ndër rrugë të fëminisë kërkojnë njeni-tjetrin
e në lojën rrethore të valleve
palët e fustanellave u shfaqen ylberë
 
Buzëqeshje të trishta
në sytë e yjeve
midis kalimtarësh – që ndeshen
në sfidën e orëve
 
Tashma edhe historia asht nji lojë
po n’epikë të peisazheve
e n’kornizë të ditëve
unë vizatoj nji shqiponjë
midis ngjyrash që ndjekin shtegëtimet
 
Ti ke qenë
ti mbetesh
nji shtegtar
midis trojesh dhe breznish
e i kushton jetës dhe vdekjes
përlotje e përmallim.
 
Jeton n’madhështi
të gjuhëve
që ruejnë shikime
agonish e përrallash
po edhe rrudha gurësh
n’at shikim
grrye prej betejash t’shumta.
 
N’teposhtën e ditëve
unë ndihem nji keqpërdorës
ndoshta e keqpërdor edhe historinë
po gjurmat që ruej mbrenda vedit
kanë currila gjaku
e brazda të lashta
dhe qëndrojnë si përplitje zemre
në pritje t’nji Mesdheu
ku të tjetërsohet fyemja
në duershtrëngime t’nji takim
 
Ti
Aleksandër
njashtu si na të thrrasim n’shtegtime metaforash
ti pararendës
që na shfaqesh bashkohës
ke nji jetë
që na shtyn mos m’u dorëheqë
e na përcakton nji shteg
n’vetëdijen që na pret
 
Nëse je në histori
e je pjesë e Historisë
unë të përjetsoj si nji endës kujtese
n’nji tendosje shpirti
përtej çdo dokumenti
thellë ndjesive
 
t’nji qytetnimi që kurrë s’u trumhas
ndër kujtime
e kurrë s’u humb
në t’ardhme
 
Kanga e Uliksit
asht nji profeci
si vajtimi Eneas
mes flakve të qytetit të shkatërruem
dhe ikja detnave
ndër brigje të reja e udhtime ndër toka t’nji drite tjetër
Ti je përtej historisë
n’ernat që shtyjnë
veliera të pafundme
drejt nji porti
që ti e njeh aq mirë.
Ode Scanderbeg - Pierfranco Bruni
Ode Scanderbeg – Pierfranco Bruni

 

Related Images:

Jozef Radi
Jozef Radihttps://www.radiandradi.com
Biografi Jozef Radi 16 janar 1957, lind rastësisht në qytetin e Elbasanit, mbasi të dy prindët e posadalë nga burgu ishin interrnuar në kampin e Kuçit të Kurveleshit... Ishte i vetmi fëmijë i të ashtuquajturit “Kampi i 100 Intelektualëve”... 1957, Pagëzohet me emrin Antonin, por xhaxhai i tij me të njejtin emër, e regjistron si Jozef... 1957-1961, ndjek fatin e prindërve në odisenë e kampeve: Radostinë, Gradishtë, Çermë dhe më së fundi n’atë të Savrës... 1963-1971, kryen shkollën fillore dhe tetëvjeçare në Karbunarë dhe Savër me rezultate shumë të mira... 1971-1975, ndjek gjimnazin “20 Tetori” në qytetin e Lushnjes, ku përjashtohet dy herë nga shkolla, thjesht si... i biri i Lazër Radit! 1975, frekuenton të njëjtën klasë me Gëzim Hajdarin dhe Shpend Sollakun: Tre të apasionuar të letërsisë; më vonë edhe autorë mjaft të njohur librash... 1975, fillon si puntor në fermën e Savrës 1977-1979, kryen shërbimin ushtarak në repartet e xhenjos, fortifikim në Dropull të Gjirokastrës... 1981, mbaron shkollën e mesme me rezultate të shkëlqyera dhe as bëhet fjalë për vazhdimin e ndonji shkolle të lartë... 1984, bën gjithë përpjekjet për botimin e librit të parë poetik “Trokitje”, por problemet e biografike... e pengojnë botimin edhe pse Shtëpia Botuese e kishte vlerësuar si... “të botueshëm...” 1984-1990, krahas punës së rëndë në bujqësi, studion intensivisht gjuhët e huaja; merret me përkthime, shkruan dhe redakton veprën e të atit... 1989, së bashku me të atin përkthejnë veprën “Stalini, Moxarti dhe Maria Judina” e poetit Bërkoviqit, e cila kalon dorë me dorë si vepër antidiktaturë... 1990, së bashku me të Atin, vendosen në Tiranë, prej ku nis nji fazë e re shprese dhe entusiazmi, se demokracia mund t’i riparojë pasojat e diktaturës... dhjetor 1990-31 mars 1991, ndjek nga afër lëvizjen dhe ndryshimet demokratike... mars 1991, boton për herë të parë, ciklin me 6 poezi në revistën arbëreshe “Katundi Ynë” në Kozenca. maj 1991, regjistrohet në fakultetin e Gjuhë- Letërsisë dhe më pas kalon në atë Juridik. 1993, botojnë së bashku me të atin librin e parë “Muret e Muzgut” si dhe poemën “Stalini, Mozarti dhe Maria Judina” 1993, nis botimin e revistës tremujore “Arbëria”, e cila del në tre numra... 1993-maj 1997, punon në detyra të ndryshme në Presidencën e Republikës. qershor 1994, mbaron Fakultetin Juridik qershor 1997, ngjarjet e atij viti ishin dëshmi e vrasjes së demokracisë... detyrohet të emigrojë në Itali. shtator 1998, humb të Atin, Lazër Radin, njeriun me të cilin kishte ndarë ditët më të vështira të jetës. 2000, boton librin e dytë poetik: “Kujtesa e Mjegullës” 2004-2005, mbulon për gati dy vjet rubrikën “Qiell i Përtejmë” në revistën “ars” 2007, boton me bashkaautorë albumin fotografik “Ancona nascosta” 2000-2010, bashkpunon me shokun e tij Gëzim Hajdari, në redaktim e veprës së tij të botuar në Itali 2011, boton librin e tretë poetik “Fletorja e Vjeshtës” 2000-2013, bashkëpunon vazhdimisht me shtypin shqiptar 2000-2013, përkthyen mjaft nga veprat e poetëve si: Ungaretti, Montale, Raboni, Senesi, Fatuiva, Pessoa, De Moraes, Hikmet etje, si dhe ka në duar veprën e Bodlerit “Lulet e së keqes” 2016, po përgatit për botim veprën e plotë të Lazër Radit në 14 vëllime... Jeton prej 16 vitesh në qytetin e Anconës...
Share this
Tags

I ke lexuar?

Kontesha Bengazina – nga Lazër Radi – Pjesë nga Libri “Vorbulla t’Jetës Universitare” (Roma)

 Nji prej historive ma të bukura studentore, të rrëfyeme mjeshtrisht prej Lazër Radit në librin autobiografik: “Vorbulla t'jetës Universitare”, ku ai me at sinqeritetin e tij...

Katalogimi i Veprës së Plotë të LAZËR RADIT

  Katalogimi i veprës së plotë të LAZËR RADI  Materiali që paraqesim asht nji bibliografi e thuejse krejt Veprës së Plotë të Dr. Lazër Radit, botue dhe...

Kujtimet e mia me At Zef Valentinin – nga librat e Lazër Radit

Kujtimet e mia me At Zef Valentinin nga librat e Lazër Radit Kanuni dhe teza e doktoraturës Mbasi mbylla llogarinë me Procedurën Civile, në mënyrën ma të...

Te rejat

More like this

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.

Copy Protected by Chetan's WP-Copyprotect.