back to top
33.5 C
Tirana
E enjte, 25 Korrik, 2024

Një rrëfim për babagjyshin në përvjetorin e lindjes – nga Merita McCorm

Gazeta

Gjyshët i rrisin nipat duke lënë gjurma në jetët e tyre
Gjyshët i rrisin nipat duke lënë gjurma në jetët e tyre

Një rrëfim për babagjyshin në përvjetorin e lindjes

nga Merita McCorm

Më 15 Maj 1911, lindi babagjyshi im Nevruz Bajraktari në fshatin Cangonj, fshati i parë që shënon hyrjen në Devoll, kur shkon nga Korça për në Bilisht e pastaj në Greqi.
Gjyshi im kishte edhe një vëlla tjetër, por që vdiq i ri, një ditë pasi u kthye nga SHBA, ku shkonte e vinte për punë.
Kështuqë gjyshi im mbeti djalë i vetëm, mes motrave që e donin shumë.
Në fillim të viteve ’30, ai u martua me gjyshen time Sabrijen, nga fisi Spahillari në Zvezdë.
Para luftës, të dyja familjet, si në Cangonj edhe në Zvezdë, e investuan pasurinë dhe blenë pasuri si tokë e ndërtime. Në emrin e gjyshit tim njihen disa vende dhe një kodër në fshat.
Unë jam rritur me tregime se si stërgjyshërit dhe gjyshërit e mi blinin tokë me florinj, sepse nuk zhduket ajo pasuri thuhej…
Gjyshi im ishte fëmijë kur mbaroi Lufta e Parë Botërore, dhe 33 vjeç, i martuar me dy fëmijë, kur mbaroi Lufta e Dytë Botërore dhe kishte të trashëguar shtëpi e katandi, vënë me djersë.
Ai ishte punëtor i jashtëzakonshëm. Punonte tokën, merrte punëtorë për ndihmë dhe i shpërblente mirë.
Gjyshi e refuzonte ideologjinë komuniste dhe fliste hapur kundër metodave kolektive.
U trishtua kur ia morën me forcë tokën, vreshtat, pemtoret, pyllin dhe bagëtitë që i kish trashëguar.
Ia morën edhe grurin nga hambarët edhe katin e dytë të shtëpisë.
Por më së shumti i vinte keq për mënyrën se si trajtohej “gjëja e përbashkët”.
E mbaj mend se si ai kujdesej për natyrën, bagëtitë e tokën. Kur shihte se bagëtitë shkonin për ujë ai pastronte gurët nga rruga, u pastronte thundrat, ju çonte ushqim ekstra dhe kur ne qeshnim me këto akte, ai na thoshte se “bagëtia nuk e di në ka kooperativë… bagëtia do zot!”
Kur e shihte se moti do prishej e do bënte ngricë, u fliste drejtuesve të kooperativës të mbulonin bimët në farishte. Ai me të vërtetë kish dhembshuri për krijesat e Krijimin.
Mbaj mend se si na mësonte ne fëmijëve se çfarë bime ishte më e mirë për bagëtinë e çfarë duhej evituar.
Ne qeshnim…
Na thoshte t’i mblidhnim thërrimet e në mos i hanim vetë, tua jepnim zogjve!
Ai ishte me të vërtetë një fermer bio, që Partia e quajti reaksionar…
Natyrisht tani, unë kujtoj çdo mësim e kujdes dhe them:
Paskam qenë e bekuar që kam pasur një gjysh që manifestonte karizmën françeskane….
Njeri më të dhënë pas kujdesit për gjithçka nuk kam parë…
Babagjyshi vuajti nga një sëmundje që i zgjati disa vite dhe më 1976 ndërroi jetë.
Ditën që vdiq drejtuesit e pushtetit vunë altoporlantin me këngë revolucionare… Kjo ishte e dhimbshme. Bullizëm politik edhe në vdekje!
E megjithatë ai ishte kaq i mirë e kaq i përkujdesur…
Sot kujtojmë lindjen e tij para 112 vitesh. Falenderoj Zotin për këtë patriark tonin.
Qofsh me ëngjëjt e dritës Babagjysh!

Marre nga muri i FB i Merita McCorm, 15 maj 2023

 

Related Images:

More articles

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.

Portali Radiandradi.com, prej 11 vitesh dhuron kontribute të përditshme në shumë fusha të kulturës, historisë dhe vlerave shqiptare. Herë pas here siti ka nevojë për mirmbajtjeje, rikonstruktim si dhe rikonceptim në formatin letër. Për ta mbajtur këtë punë shumvjeçare, ndër më seriozet dhe më të lexuarat që të vazhdojë aktivitetin bëhet e domosdoshme mbështetja e lexuesve.

Jozef Radi

Redaktor i Radi & Radi

Artikujt e fundit

Copy Protected by Chetan's WP-Copyprotect.