Do na mungosh të gjithëve, o mik i vuajtjeve – kushtuar Legjendës Uran Kostreci

0
30
Uran Kostreci - në Bar Firence - Tiranë 2016
Uran Kostreci - në Bar Firence - Tiranë 2015
Uran Kostreci duke recituar sonetit për Mit'hat Frashërin
Uran Kostreci duke recituar sonetit për Mit’hat Frashërin*

Do na mungosh të gjithëve, o mik i vuajtjeve…

kushtuar Legjendës Uran Kostreci

nga Jozef Radi

Sot humba një mik të rrallë,
sot të gjithë kemi humbur një mik t’pakthyeshëm
në t’vërtetë ky vend ka humbur një symbol të vetin
edhe pse ai kaherë adhuron simbolet e së Keqes,
Sot e humbëm të gjithë bashkë një Njeri
që të këndshme ta bënte ndejten më të,
që të mirëpriste me një dashuri atërore,
e mund të flisje pafund e për gjithçka,
me kët Njeri bëmë një udhë të gjatë ëndrrash e të shkurtë jete
e i mbetëm mirnjohtës njëri-tjetrit përjetë,
e kujtoj kur e nxita ta jetonte rininë virtuale
qeshi më gjithë 80 vitet e veta por më dëgjoi,
e pastaj na erdhën shumë ditë e shumë rrugë
që i bëmë bashkë miqsisht, dashurisht, njerëzisht,
sa tashmë kemi kujtime t’pafundme mbi dhè e nën dhè,
ai si rrëfyes i palodhur e unë si gjahtar që kapja
çdo imazh të tij fjale e shpirti përmes një dritze të vogël,
dhe kështu ia mblodha një trastë rrëfimesh
prej hararit të dramave e dhimbjeve pafund
e m’i rrëfente aq bukur vuajtjet e veta si t’ishin festa
e m’i ngjyroste lotët me at buzëqeshjen e trishtë,
dhe më mësonte si jetohet trimërisht çdo ditë të jetës,
duke mbetur ashtu paqtues midis atyre
që vuajtën si thikë dhe atyre që e përdhosën vuajtjen,
e që tash tavolin’e tij te qoshja e Piazzës pret përlotshëm
pse s’u kthye më ai që Njeriu s’linte të paguante askënd,
që pinte veç ujë e kafe e dy vezë t’fërguara çdo mëngjes…
që shkruante në çaste vetmie sonete magjike
e me forcën e një shpirti të paepur këndonte
e rrëfente e rrëfente pa u lodhur të vërtetat e veta
për një vend të shurdhët dhe një kohë mpirë nga vetvetja
për një tokë ku gjithçka vidhesh, deri edhe buzëqeshja,
e ku Ai mbeti: margaritar i paarritshëm për duart e nxira…!
.
Uran Kostreci - në Bar Firence - Tiranë 2016
Uran Kostreci – në Bar Firence – Tiranë 2015
Do më mungosh xhaxha, o ikonë e shenjtë e Dinjitetit,
do na mungosh të gjithëve, o mik i vuajtjeve pakufi,
pse Njerëz si ti, që dhurojnë veç dashuri e besim
një ditë gjithçka iu kthehet me dritë të shumfishtë…
jozef radi, 12 korrik 2021
.
Poeti Uran Kostreci, në nji çast meditimi
Poeti Uran Kostreci, në nji çast meditimi
Post-Scriptum: Këto tri foto, Uran Kostrecit ia kam bërë ditën që u njoha me të, diku në vjeshtë të vitit 2015… te Bar Firenze ku ishte i përditshëm te qoshja e tij…
Një ditë, ndërsa ishte vetëm, i shkova pranë dhe i mora leje që t’i ulem në tavolinë, nëse nuk e bezdisja. Më priti si gentelman! Mjaftoi krejt pak, dhe prej asaj ditë u bëmë miq, u bëmë shumë miq! S’kishte herë që të isha në Tiranë, dhe kohën më të shumtë të mos e kaloja me Uranin, te qoshja e Piazzës tashmë. E adhuroja shpirtin e tij, atë mirësinë e pashoqe, atë kulturën e gjerë që shpaloste ndër biseda që zgjasnin orë e orë, atë “elan vital” e një njeriu të përjetshëm!
Të asaj ditë janë këto tri foto… nga ku mardhëniet tona u bënë të pandashme… Në kohë, ia kam mbledhur nji për nji, të gjitha sonetet që ka shkruar e ka kënduar në të gjallë të tij, dhe deshëm të bënim një festë me librin e soneteve, si të ishte Kënga e Mjelmës.
Po kjo kohë e mbrapsht na ndau, na vrau, s’na la…!
Po libri i tij, si amanet e tij do të bëhet edhe pa të… e Ai do të jetë sëbashku me kujtimet e secilit prej nesh!
Nuk mund të jem në përcjelljen e tij të ikjes fizike… por do të jem në mbajtjen gjallë të frymes së tij!
Të qafoj nga larg Xhaxha!
Dritë bëftë shpirti yt, o hero i pashoq i qëndresës… j.r.

 

Related Images:

Artikulli paraprakLojcak ndër fjalë… Cikël poetik nga Jozef Radi
Artikulli tjetërHistoria e një enigme… material i përgaditur nga Jozef Radi
Jozef Radi
Biografi Jozef Radi 16 janar 1957, lind rastësisht në qytetin e Elbasanit, mbasi të dy prindët e posadalë nga burgu ishin interrnuar në kampin e Kuçit të Kurveleshit... Ishte i vetmi fëmijë i të ashtuquajturit “Kampi i 100 Intelektualëve”... 1957, Pagëzohet me emrin Antonin, por xhaxhai i tij me të njejtin emër, e regjistron si Jozef... 1957-1961, ndjek fatin e prindërve në odisenë e kampeve: Radostinë, Gradishtë, Çermë dhe më së fundi n’atë të Savrës... 1963-1971, kryen shkollën fillore dhe tetëvjeçare në Karbunarë dhe Savër me rezultate shumë të mira... 1971-1975, ndjek gjimnazin “20 Tetori” në qytetin e Lushnjes, ku përjashtohet dy herë nga shkolla, thjesht si... i biri i Lazër Radit! 1975, frekuenton të njëjtën klasë me Gëzim Hajdarin dhe Shpend Sollakun: Tre të apasionuar të letërsisë; më vonë edhe autorë mjaft të njohur librash... 1975, fillon si puntor në fermën e Savrës 1977-1979, kryen shërbimin ushtarak në repartet e xhenjos, fortifikim në Dropull të Gjirokastrës... 1981, mbaron shkollën e mesme me rezultate të shkëlqyera dhe as bëhet fjalë për vazhdimin e ndonji shkolle të lartë... 1984, bën gjithë përpjekjet për botimin e librit të parë poetik “Trokitje”, por problemet e biografike... e pengojnë botimin edhe pse Shtëpia Botuese e kishte vlerësuar si... “të botueshëm...” 1984-1990, krahas punës së rëndë në bujqësi, studion intensivisht gjuhët e huaja; merret me përkthime, shkruan dhe redakton veprën e të atit... 1989, së bashku me të atin përkthejnë veprën “Stalini, Moxarti dhe Maria Judina” e poetit Bërkoviqit, e cila kalon dorë me dorë si vepër antidiktaturë... 1990, së bashku me të Atin, vendosen në Tiranë, prej ku nis nji fazë e re shprese dhe entusiazmi, se demokracia mund t’i riparojë pasojat e diktaturës... dhjetor 1990-31 mars 1991, ndjek nga afër lëvizjen dhe ndryshimet demokratike... mars 1991, boton për herë të parë, ciklin me 6 poezi në revistën arbëreshe “Katundi Ynë” në Kozenca. maj 1991, regjistrohet në fakultetin e Gjuhë- Letërsisë dhe më pas kalon në atë Juridik. 1993, botojnë së bashku me të atin librin e parë “Muret e Muzgut” si dhe poemën “Stalini, Mozarti dhe Maria Judina” 1993, nis botimin e revistës tremujore “Arbëria”, e cila del në tre numra... 1993-maj 1997, punon në detyra të ndryshme në Presidencën e Republikës. qershor 1994, mbaron Fakultetin Juridik qershor 1997, ngjarjet e atij viti ishin dëshmi e vrasjes së demokracisë... detyrohet të emigrojë në Itali. shtator 1998, humb të Atin, Lazër Radin, njeriun me të cilin kishte ndarë ditët më të vështira të jetës. 2000, boton librin e dytë poetik: “Kujtesa e Mjegullës” 2004-2005, mbulon për gati dy vjet rubrikën “Qiell i Përtejmë” në revistën “ars” 2007, boton me bashkaautorë albumin fotografik “Ancona nascosta” 2000-2010, bashkpunon me shokun e tij Gëzim Hajdari, në redaktim e veprës së tij të botuar në Itali 2011, boton librin e tretë poetik “Fletorja e Vjeshtës” 2000-2013, bashkëpunon vazhdimisht me shtypin shqiptar 2000-2013, përkthyen mjaft nga veprat e poetëve si: Ungaretti, Montale, Raboni, Senesi, Fatuiva, Pessoa, De Moraes, Hikmet etje, si dhe ka në duar veprën e Bodlerit “Lulet e së keqes” 2016, po përgatit për botim veprën e plotë të Lazër Radit në 14 vëllime... Jeton prej 16 vitesh në qytetin e Anconës...

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.