Pesë poezi… të Pier Kolond dhe nji shenim prej Jozef Radit

0
15
Pier Kolond (Pjerin Ndreka)
Pier Kolond (Pjerin Ndreka)
Pier Kolond (Pjerin Ndreka)
Pier Kolond (Pjerin Ndreka)

Pesë poezi… të Pier Kolond

dhe nji shenimi vogel

Pier Kolond, asht emni artistik i Pjerin Ndrekës, i cili shpesh më ka fut “detyrimin” me e lexue “pa kushte” poezinë e tij… Nji poezi që asht e tija, veç e tija dhe e askujt tjetër… Pjero me nji natyrë të shtrueme rrëfimtare, me at shpirtin e djaloçit të përjetshëm, me at sinqeritetin pothuaj fëminor të godet me vargje të nji bukurie rrëmbyese, me nji muzikë poetike të mbrendshme, e cila shpesh s’mundet me i shpëtue nuancave epike… prej nga rrjedh si duket edhe shpirti lirik i Pjerinit…
Mbas leximeve të herpashershme, si ai që s’rrin dot pa ba ndonji vërejtje, ndalem dhe i them, Pjerin ktu, e Pjerin atje… Pjerin kët e Pjerin at… dhe ai më ndigjon me vëmendje e me jep të drejtë, pothuej gjithnji… dhe mue s’më mbeti rrugë tjetër veçse me i tregue Pjeros, historinë e famshme të Fidias me Sokratin…
“Skulptori ma i madh i Antikitetit grek, Fidia ishte bashkohas i Sokratit… dhe mbas çdo kryevepre që ai nxirrte prej duerve të veta, e ftonte urtësinë e Sokratit me i dhanë mendimin e tij, të cilin Ai e vlersonte mjaft. Dhe Sokrati… si mendje e mprehtë që ishte, merresh me imtësitë e imtësinave ma të vogla, aq sa nji ditë Fidia mbasi e ndigjoj i tha: Po këto janë gjana krejt të vogla o Sokrat, mund ti bash edhe ti vetë… dhe i dha limën… Kështu që asnji kryevepër e Fidias, nuk asht edhe pa firmën e limës së Sokratit… E gjitha kjo paralele filozofike, vlen me theksue faktin se poezitë e Pier Kolondit (alias Pjerin Ndreka), janë të bukura, por ndodh që n’at shkujdesjen e së përditshmes dicka i tret, por gjithsesi ai e kryen ma së miri misionin sa lirik aq edhe epik me vargjet e veta…
Prandaj s’munda që kët shijim temin të mos t’kërkoja me e zgjanue… sepse asht poezia e tij që e meriton kët gja… kërkush tjetër…
7 janar 2014

...dhe rrezet e diellit m'i nxirrte sysh...
…dhe rrezet e diellit m’i nxirrte sysh… 

…dhe rrezet e diellit m’i nxirrte sysh…

poezi nga Pjerin Ndreka

S’ishte zor…

Jo, s’ishte zor
m’e pa vedin n’andërr me sy çilë,
kur isha veç tremdhjet vjeç,
e kurrë s’më buzqeshte e njajta vajzë,
e tjetra m’gjuete n’guralec.
Unë recitojshe rolet e Allen Delonit,
pa za
e tanë shokt e klasës
m’brohoritshin me zili.

A ju kujtohet E……a,
kangtarja ma e mirë e shkolls,
që s’lènte rast pa m’thirrë “Artist”,
e rrezet e diellit m’i nxirrte sysh?
Jo, s’ishte zor
m’e pa vedin n’andërr me sy çilë
tuj i vu n’rresht
vajzat e klasave ma t’nalta,
kur shoqet e klasës
u shtijshin indiferente
tue lexue me za teoremat e algjebrës.

Sod, mue, plota e jets
m’a ka marrë tremdhjet vjeçarin
ma shumë se katër herë,
po jo at t’vjetrin zakon
m’e pa vedin n’andërr me sy çilë.
E kurrë veç s’e shof.
Ende mendja m’shkon
n’andërr…
zhgjandërr
vedin s’e njof.
7 janar 2014

Shkambi i Diells

At’ ditë që s’erdhe
jam njitë majeshkambi
pagzue prej meje
Shkambi i Diells.

Kam pa nji çerdhe
me do zogj t’vegjël me skjep të hapun,
sikur diçka pritshin prej qiells.
A pritshin t’amen, a t’pritshin ty,
a i thoshin diellit “Xej! Kena t’ftoftë!”
Mejherë e lane kangën
e m’panë n’sy
tue’ u dridhë friget se s’më kanë njoftë.

Kam lmue shkambin
aty n’at kand
ku përditë gjoksin ke mbshtetë,
e prej gzimit kjeç tuj u trandë
kur emnin tem n’të
t’shkruem e kam gjetë.

Kam britë si i marrë
“Diellë, emnin tand
e mbaj në zemër.
Lexoje vetë!”
Me vedi qeshi dielli;
m’bani me dorë
e ma shumë rreze i lshoi qiells.
E zogjt ndër çerdhe
ia nisën n’kor
nji kangs të gzueshme
me emnin tem
edhe të Diells.
29 dhjetor 2013

Pasqyra

Deshta me u pa n’pasqyrë
n’bebe t’syve t’babs.
Aty kishte aq shumë dritë;
e s’mujta me hi.

Prej dy piklash lodes s’gzimit
dolën dy djelm t’ri.
Prej majes s’Taraboshit,
dielli m’i lshoi sytë.

Se ça desht me m’thanë, s’e di;
po pse u pendue?!
Mandej
uli sytë e mori rrugën e Ulqinit.
Vala po e pret n’breg,
shtratin me ia shtrue.

Po e pvet vala me t’butë:
-Ça ke qe je mrrole?
Pava gjyshin me dy nipa
– ia nisi me folë –
lodja synin ma përvloj;
e pata zili.
29 dhjetor 2013

Dimën

E kam pa diellin
tuj u njite qiells me sy përtokë.
Nji hije deket n’boje t’ndryshkut
ftyrs i ka ra.

Na shikjon mrrolshëm;
e s’i shkon ndër mend me na ‘xe.
S’di pse dreqin m’ra ndërmend
shefi i zyrs.

S’jam inatçuer;
e s’di ku rrin inadi me shpi.
Jena n’dhetuer;
verì i hakmarrjes m’shpoi në bri.
18 dhjetor  2013

Pata mall

Iu ktheva edhe ‘i herë
do rreshtave t’mshehun
n’fletoren e vjetër, që s’ia kallxoj kuj.
N’nji sekond m’kalon nata;
bubazheli i pakrehun
m’shtihet si dreqi në andërr.
E thrras n’emën, e m’thotë:
-Mos truj!
-M’à tha fyti… s’di ç’ka pi!
Buzt e plasuna prej edit
syve u kërkojnë ‘i pikë ujë.
E di mirë se çka po m’gjen;
po prap zhytem n’ata rreshta.
S’e di pse e mundoj vedin.
Pse me hi n’at purgator?
Do kujtime që m’mundojnë
me i nda me ju un’ deshta.
Shpirti, fjalt i pat ndry n’burg
po unë due me i qitë jashtë me zor.
A mos pata mall për pranverën,
tesh që edhe vjeshta mbaroi.
12 dhjetor  2013

Related Images:

Artikulli paraprakErnest Hemingway (1899 -1961) – Frika
Artikulli tjetërFishta, shteti dhe dishepujt Frano Kulli
Jozef Radi
Biografi Jozef Radi 16 janar 1957, lind rastësisht në qytetin e Elbasanit, mbasi të dy prindët e posadalë nga burgu ishin interrnuar në kampin e Kuçit të Kurveleshit... Ishte i vetmi fëmijë i të ashtuquajturit “Kampi i 100 Intelektualëve”... 1957, Pagëzohet me emrin Antonin, por xhaxhai i tij me të njejtin emër, e regjistron si Jozef... 1957-1961, ndjek fatin e prindërve në odisenë e kampeve: Radostinë, Gradishtë, Çermë dhe më së fundi n’atë të Savrës... 1963-1971, kryen shkollën fillore dhe tetëvjeçare në Karbunarë dhe Savër me rezultate shumë të mira... 1971-1975, ndjek gjimnazin “20 Tetori” në qytetin e Lushnjes, ku përjashtohet dy herë nga shkolla, thjesht si... i biri i Lazër Radit! 1975, frekuenton të njëjtën klasë me Gëzim Hajdarin dhe Shpend Sollakun: Tre të apasionuar të letërsisë; më vonë edhe autorë mjaft të njohur librash... 1975, fillon si puntor në fermën e Savrës 1977-1979, kryen shërbimin ushtarak në repartet e xhenjos, fortifikim në Dropull të Gjirokastrës... 1981, mbaron shkollën e mesme me rezultate të shkëlqyera dhe as bëhet fjalë për vazhdimin e ndonji shkolle të lartë... 1984, bën gjithë përpjekjet për botimin e librit të parë poetik “Trokitje”, por problemet e biografike... e pengojnë botimin edhe pse Shtëpia Botuese e kishte vlerësuar si... “të botueshëm...” 1984-1990, krahas punës së rëndë në bujqësi, studion intensivisht gjuhët e huaja; merret me përkthime, shkruan dhe redakton veprën e të atit... 1989, së bashku me të atin përkthejnë veprën “Stalini, Moxarti dhe Maria Judina” e poetit Bërkoviqit, e cila kalon dorë me dorë si vepër antidiktaturë... 1990, së bashku me të Atin, vendosen në Tiranë, prej ku nis nji fazë e re shprese dhe entusiazmi, se demokracia mund t’i riparojë pasojat e diktaturës... dhjetor 1990-31 mars 1991, ndjek nga afër lëvizjen dhe ndryshimet demokratike... mars 1991, boton për herë të parë, ciklin me 6 poezi në revistën arbëreshe “Katundi Ynë” në Kozenca. maj 1991, regjistrohet në fakultetin e Gjuhë- Letërsisë dhe më pas kalon në atë Juridik. 1993, botojnë së bashku me të atin librin e parë “Muret e Muzgut” si dhe poemën “Stalini, Mozarti dhe Maria Judina” 1993, nis botimin e revistës tremujore “Arbëria”, e cila del në tre numra... 1993-maj 1997, punon në detyra të ndryshme në Presidencën e Republikës. qershor 1994, mbaron Fakultetin Juridik qershor 1997, ngjarjet e atij viti ishin dëshmi e vrasjes së demokracisë... detyrohet të emigrojë në Itali. shtator 1998, humb të Atin, Lazër Radin, njeriun me të cilin kishte ndarë ditët më të vështira të jetës. 2000, boton librin e dytë poetik: “Kujtesa e Mjegullës” 2004-2005, mbulon për gati dy vjet rubrikën “Qiell i Përtejmë” në revistën “ars” 2007, boton me bashkaautorë albumin fotografik “Ancona nascosta” 2000-2010, bashkpunon me shokun e tij Gëzim Hajdari, në redaktim e veprës së tij të botuar në Itali 2011, boton librin e tretë poetik “Fletorja e Vjeshtës” 2000-2013, bashkëpunon vazhdimisht me shtypin shqiptar 2000-2013, përkthyen mjaft nga veprat e poetëve si: Ungaretti, Montale, Raboni, Senesi, Fatuiva, Pessoa, De Moraes, Hikmet etje, si dhe ka në duar veprën e Bodlerit “Lulet e së keqes” 2016, po përgatit për botim veprën e plotë të Lazër Radit në 14 vëllime... Jeton prej 16 vitesh në qytetin e Anconës...

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.