Nji vit gëzimesh për gjithë Ju, miqtë e mi!

0
25
Gëzuar festat miqtë e mi...
Gëzuar festat miqtë e mi…

Nji vit gëzimesh për gjithë Ju, miqtë e mi!

Nji vit ma parë,
www.radiandradi.com, ishte thjesht nji ndërthurje mendimesh, nji çorodi idesh, nji vlim emocional që andrronte me u ba nji projekt aktiv komunikimi.
Gjithnji e mendoja se nuk asht fort e lehtë me u futë në komunikim të përditshëm e të gjithhershëm me lexues të njoftun e të panjoftun, të afërt e të largët, me miq të hershëm e kundërshtar të rishtë, me nivele kulturore dhe interesa të ndryshme, dhe t’i ofrosh nji pafundësie në rritje lexuesish mënyrën se si e sheh ti jetën dhe botën, dhe pa i trazue, pa u ba invadentent ta fshikësh të përditshmen e tyne…
Nuk ishte, nuk asht dhe s’ka për të qenë kurrë e lehtë…
Asht nji e përditshme e jotja, në të cilën t’i fton, pa i thanë askujt ‘hajde’; asht jeta jote që nga pak e përditë, bahet jetë e gjithnji e ma të shumtëve; asht e vërteta jote, që shpesh s’ka fort përputhje me t’vërtetat e atyne që të lexojnë, por gjithsesi duke e lanë derën e hapun për gjithkënd, mundem me thanë se sot komunikimi ndërne asht i nji përmase civilizuese, asht i hapun, asht si të thuesh nji mundësi me lexue ma mirë, me shkrue ma qartë, me qeshë ma bukur, me reflektue ma drejtë, me e kuptue ma thellë tjetrin, me u miqsue edhe pa u pa, me u zemërue ma dinjitetshëm, po edhe me u largue në heshtje, nëse ajo çka t’ofrojnë s’të shërben…
E kjo asht ajo rruga gjatë nëpër të cilën, unë jam nisë vetëm, po kam ecë bashkë me ju, që n’fillim s’ishit ma shumë se dhjetë, u batë njiqind, u shtuet njimijë, e kapërcyet dhjetmijshin, e sot jeni shumë e ma shumë aq sa sot kemi shumçka me dhanë e me marrë me njeni tjetrin… Ju falemnderës…!
Ju them se radiandradi.com, asht jo vetëm dritare, po edhe derë e hapun për cilindo, për çdo opinion, edhe ata që janë kundër, mjaft që të mos cënohet dinjiteti dhe etika e askujt… Gjà e cila deri sot ka funksionue…
Ky asht nji falenderim i madh që ju përket gjithëve ju si lexues, ju si komentues, ju si pëlqyesa, miq të mi: realë a virtualë qofshi, Ju falemnderës të gjithëve…
Sonte asht ditë feste… dhe ndër festa secili prej nesh ndjehet pak ma i mirë. Unë s’mundem me e përcjellë kët festë, pa nji dhimbje të madhe… Sot, asht 50 vjetori i vrasjes së Poetit Trifon Xhagjika!
I hodha nji sy krejt shtypit shqiptar… Asnji fjalë e vetme!!! Heshtje… Nji heshtje që thotë gjithçka! Gjatë gjithë këtij mueji unë jam përpjekë me paraqitë diçka nga jeta dhe vepra e këtij Poeti Martir… me aq sa kam ditë me aq sa kam mujtë… Ai Poet s’ka nji varr, nuk ka nji bust, s’ka nji dokumentar, nji çmim letrar, nji rrugë fshati a qyteti apo nji  shkollë s’e ka emnin e tij, s’ka nji tubim përkujtimor, pra s’ka asgja…!!!

Gustav Koken - Chrysantheme
Gustav Koken – Chrysantheme

Jo, s’asht e vërtetë…! Ai i ka  gjithçka, jemi ne që s’kemi asgja, e që boshatisemi përditë prej atij dinjiteti që s’gjen vend me nderue vedin, jo madheshtinë e nji Poeti të pashembullt…
Nji tufë krizantemash për Trifon Xhagjikën, asht ma e pakta njerzore që mund të bajmë për nji guximtar si Ai, miqtë e mi…
Asht kohë festash, po edhe në dit të tilla, me kujtue ata që u sakrifikuen, mbetet nji dëshmi qytetarie, se asgja në kët botë nuk dhurohet, ajo fitohet përmes mundimesh e sakrificash të pafundme…
Nji vit gëzimesh për gjithë Ju, miqtë e mi
24 dhjetor 2013

Related Images:

Artikulli paraprakEdira Merlika, nga kampet e përqendrimit drejtuese te “Ralph Lauren”
Artikulli tjetërFestat e Fundvitit… kolazh… nga www.mondhasan.al
Jozef Radi
Biografi Jozef Radi 16 janar 1957, lind rastësisht në qytetin e Elbasanit, mbasi të dy prindët e posadalë nga burgu ishin interrnuar në kampin e Kuçit të Kurveleshit... Ishte i vetmi fëmijë i të ashtuquajturit “Kampi i 100 Intelektualëve”... 1957, Pagëzohet me emrin Antonin, por xhaxhai i tij me të njejtin emër, e regjistron si Jozef... 1957-1961, ndjek fatin e prindërve në odisenë e kampeve: Radostinë, Gradishtë, Çermë dhe më së fundi n’atë të Savrës... 1963-1971, kryen shkollën fillore dhe tetëvjeçare në Karbunarë dhe Savër me rezultate shumë të mira... 1971-1975, ndjek gjimnazin “20 Tetori” në qytetin e Lushnjes, ku përjashtohet dy herë nga shkolla, thjesht si... i biri i Lazër Radit! 1975, frekuenton të njëjtën klasë me Gëzim Hajdarin dhe Shpend Sollakun: Tre të apasionuar të letërsisë; më vonë edhe autorë mjaft të njohur librash... 1975, fillon si puntor në fermën e Savrës 1977-1979, kryen shërbimin ushtarak në repartet e xhenjos, fortifikim në Dropull të Gjirokastrës... 1981, mbaron shkollën e mesme me rezultate të shkëlqyera dhe as bëhet fjalë për vazhdimin e ndonji shkolle të lartë... 1984, bën gjithë përpjekjet për botimin e librit të parë poetik “Trokitje”, por problemet e biografike... e pengojnë botimin edhe pse Shtëpia Botuese e kishte vlerësuar si... “të botueshëm...” 1984-1990, krahas punës së rëndë në bujqësi, studion intensivisht gjuhët e huaja; merret me përkthime, shkruan dhe redakton veprën e të atit... 1989, së bashku me të atin përkthejnë veprën “Stalini, Moxarti dhe Maria Judina” e poetit Bërkoviqit, e cila kalon dorë me dorë si vepër antidiktaturë... 1990, së bashku me të Atin, vendosen në Tiranë, prej ku nis nji fazë e re shprese dhe entusiazmi, se demokracia mund t’i riparojë pasojat e diktaturës... dhjetor 1990-31 mars 1991, ndjek nga afër lëvizjen dhe ndryshimet demokratike... mars 1991, boton për herë të parë, ciklin me 6 poezi në revistën arbëreshe “Katundi Ynë” në Kozenca. maj 1991, regjistrohet në fakultetin e Gjuhë- Letërsisë dhe më pas kalon në atë Juridik. 1993, botojnë së bashku me të atin librin e parë “Muret e Muzgut” si dhe poemën “Stalini, Mozarti dhe Maria Judina” 1993, nis botimin e revistës tremujore “Arbëria”, e cila del në tre numra... 1993-maj 1997, punon në detyra të ndryshme në Presidencën e Republikës. qershor 1994, mbaron Fakultetin Juridik qershor 1997, ngjarjet e atij viti ishin dëshmi e vrasjes së demokracisë... detyrohet të emigrojë në Itali. shtator 1998, humb të Atin, Lazër Radin, njeriun me të cilin kishte ndarë ditët më të vështira të jetës. 2000, boton librin e dytë poetik: “Kujtesa e Mjegullës” 2004-2005, mbulon për gati dy vjet rubrikën “Qiell i Përtejmë” në revistën “ars” 2007, boton me bashkaautorë albumin fotografik “Ancona nascosta” 2000-2010, bashkpunon me shokun e tij Gëzim Hajdari, në redaktim e veprës së tij të botuar në Itali 2011, boton librin e tretë poetik “Fletorja e Vjeshtës” 2000-2013, bashkëpunon vazhdimisht me shtypin shqiptar 2000-2013, përkthyen mjaft nga veprat e poetëve si: Ungaretti, Montale, Raboni, Senesi, Fatuiva, Pessoa, De Moraes, Hikmet etje, si dhe ka në duar veprën e Bodlerit “Lulet e së keqes” 2016, po përgatit për botim veprën e plotë të Lazër Radit në 14 vëllime... Jeton prej 16 vitesh në qytetin e Anconës...

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.