Naltsim
Charles Baudelaire
Nalt përmbi gjith’ brrakat, mbi krejt luginat
mbi majmalet, pyjet, mbi retë, mbi detet,
përtej diellit dhe hapsinave qiellore,
përtej pafundsive dhe rruzujve yjorë,
ti, o shpirti im lëviz krejt gjallni,
si nji notar i shkathët i shtyn dallgët,
çan gjithë hare, thellësi horizontesh
me nji dëshirë burrnore t’parrëfyeshme…
Fluturo, fluturo larg prej grahmash të ndyta
dhe shko dlirsohu atje naltësive t’pastra
pije si nji lang të kthjellët e hyjnor
zjarrmin e ndezun që mbush kupat e kristalta,
I lumtun kjoftë kushdo që len mbas shpine
mërzitë dhe vuejtjet e shumta që randojnë
me peshën e tyne ndër ekzistencat e trishta;
I lumtun aj, që me rrahje t’fuqishme flatrash
lshohet drejt fushave të ndritshme e t’paqme,
I lumtun aj që ndër mendime si laureshat
drejt qiejve mëngjesorë derdhet fluturim
pezull mbi jetën, e pa ma t’voglën vështirsi
kupton gjuhën e luleve dhe gjanave t’heshtuna…
.
Përktheu Jozef Radi…
Botue në antologjinë “Veç mundem me të dashtë, njashtu siç je” Sh. B. “Jozef” 2019
.