Muslimani shqiptar – Nji projekt paqet! poemë nga Gjergj Kola

5
17
Gjergj Kola
Gjergj Kola

Muslimani shqiptar – Nji projekt paqet! Gjergj Kola

(Fragment nga “Poema e Paqes”)

Muslimani shqiptar asht ajo fëminija e rritun bashkë
Me të cilën prindët tonë t’mbulem me çadrën e ateizmit
Mrekulloheshin kur festonim Bajramet dhe Pashkët
Me pak dromca jetet e shumë miqsi të sinqertë.

Muslimani shqiptar asht ai miku jem i rinisë
Me t’cilin ja numruem n’gojë diktaturës dhambët e prishun
Dhe sa herë ndër gurët e Shirokës mshehëm andrrat tona
Për me hikë matanë Taraboshit drejt lirisë si nji
Diell i përgjakun n’agim.

Muslimani shqiptar asht ai miku jem i shkollës
Me të cilin për ramazan rrijshim deri n’mesnatë vonë
Me pritë kangën fituese t´San Remos
Dhe shejtëve t’tjerë të panjoftun prej Hollywood-i…

Muslimani shqiptar martohet me t´kshtenë
Dhe së bashku  e zbukurojnë pemën e Krishtlindjes
Para vitit të ri, dhe fëmijve ju vejnë emna hebrejsh
Si Edi, Beni, Sara, Anila e plot emna tjerë pagan’sh triumfues.

Muslimani shqiptar asht ai hoxha i devotshëm
Qi racionin e darkës në natën e Spaçit e mshehte
Për brumin  osteve të meshtarit katolik kur këtij
Ja hjekshin djajtë e kuq për çdo natë pasionin hyjnor.

Muslimani shqiptar asht ai miku qi ndesha rastsisht
N’nji anije të prishun midis Adriatikut n’vitin ’91
Dhe ndamë bashkë cigaren dhe shishen e fundit të konjakut
Tuj prit vdekjen me sy hapët dhe gojë peshkaqenit…

Muslimani shqiptar asht ai artisti në Perëndim
Qi luen çdo fundjavë me violinë në kishë
Dhe në xhami shkon nji herë n’vjet për Bajram
Dhe mbetet mik paqësor me party-n e jetës së hareshme.

Muslimani shqiptar asht ajo dashnia e pashprehun
Për vajzën e dlirë qi numëronte bashkë me mu
Notat në pentagramin e mbushun me andrra
Dhe tingujt e hjedhun n’ajrin e ngimë më mistikë engjujsh….

Gjergj Kola

Related Images:

Artikulli paraprak“Nostalgjia për Enver Hoxhën” nga Ardian Ndreca
Artikulli tjetërSi u dorëzue dhe si u pushkatue Prek Cali… Valentin Pervizi
Jozef Radi
Biografi Jozef Radi 16 janar 1957, lind rastësisht në qytetin e Elbasanit, mbasi të dy prindët e posadalë nga burgu ishin interrnuar në kampin e Kuçit të Kurveleshit... Ishte i vetmi fëmijë i të ashtuquajturit “Kampi i 100 Intelektualëve”... 1957, Pagëzohet me emrin Antonin, por xhaxhai i tij me të njejtin emër, e regjistron si Jozef... 1957-1961, ndjek fatin e prindërve në odisenë e kampeve: Radostinë, Gradishtë, Çermë dhe më së fundi n’atë të Savrës... 1963-1971, kryen shkollën fillore dhe tetëvjeçare në Karbunarë dhe Savër me rezultate shumë të mira... 1971-1975, ndjek gjimnazin “20 Tetori” në qytetin e Lushnjes, ku përjashtohet dy herë nga shkolla, thjesht si... i biri i Lazër Radit! 1975, frekuenton të njëjtën klasë me Gëzim Hajdarin dhe Shpend Sollakun: Tre të apasionuar të letërsisë; më vonë edhe autorë mjaft të njohur librash... 1975, fillon si puntor në fermën e Savrës 1977-1979, kryen shërbimin ushtarak në repartet e xhenjos, fortifikim në Dropull të Gjirokastrës... 1981, mbaron shkollën e mesme me rezultate të shkëlqyera dhe as bëhet fjalë për vazhdimin e ndonji shkolle të lartë... 1984, bën gjithë përpjekjet për botimin e librit të parë poetik “Trokitje”, por problemet e biografike... e pengojnë botimin edhe pse Shtëpia Botuese e kishte vlerësuar si... “të botueshëm...” 1984-1990, krahas punës së rëndë në bujqësi, studion intensivisht gjuhët e huaja; merret me përkthime, shkruan dhe redakton veprën e të atit... 1989, së bashku me të atin përkthejnë veprën “Stalini, Moxarti dhe Maria Judina” e poetit Bërkoviqit, e cila kalon dorë me dorë si vepër antidiktaturë... 1990, së bashku me të Atin, vendosen në Tiranë, prej ku nis nji fazë e re shprese dhe entusiazmi, se demokracia mund t’i riparojë pasojat e diktaturës... dhjetor 1990-31 mars 1991, ndjek nga afër lëvizjen dhe ndryshimet demokratike... mars 1991, boton për herë të parë, ciklin me 6 poezi në revistën arbëreshe “Katundi Ynë” në Kozenca. maj 1991, regjistrohet në fakultetin e Gjuhë- Letërsisë dhe më pas kalon në atë Juridik. 1993, botojnë së bashku me të atin librin e parë “Muret e Muzgut” si dhe poemën “Stalini, Mozarti dhe Maria Judina” 1993, nis botimin e revistës tremujore “Arbëria”, e cila del në tre numra... 1993-maj 1997, punon në detyra të ndryshme në Presidencën e Republikës. qershor 1994, mbaron Fakultetin Juridik qershor 1997, ngjarjet e atij viti ishin dëshmi e vrasjes së demokracisë... detyrohet të emigrojë në Itali. shtator 1998, humb të Atin, Lazër Radin, njeriun me të cilin kishte ndarë ditët më të vështira të jetës. 2000, boton librin e dytë poetik: “Kujtesa e Mjegullës” 2004-2005, mbulon për gati dy vjet rubrikën “Qiell i Përtejmë” në revistën “ars” 2007, boton me bashkaautorë albumin fotografik “Ancona nascosta” 2000-2010, bashkpunon me shokun e tij Gëzim Hajdari, në redaktim e veprës së tij të botuar në Itali 2011, boton librin e tretë poetik “Fletorja e Vjeshtës” 2000-2013, bashkëpunon vazhdimisht me shtypin shqiptar 2000-2013, përkthyen mjaft nga veprat e poetëve si: Ungaretti, Montale, Raboni, Senesi, Fatuiva, Pessoa, De Moraes, Hikmet etje, si dhe ka në duar veprën e Bodlerit “Lulet e së keqes” 2016, po përgatit për botim veprën e plotë të Lazër Radit në 14 vëllime... Jeton prej 16 vitesh në qytetin e Anconës...

5 KOMENTET

  1. Gjergj,
    vërtet vargu tënd më mrekullon më rinon, më loton, më kujton, më forcon, më fisnikëron, më paqton, më lumturon e më bën me krahë, të fluturoj dhe t’i përqafoj në tërë anët e botës ku janë Shqiptarët myslimanë, katolikë e ortodoksë, duke ju lënë amanet atdheun ashtu si e deshën prej shumë vitesh të shkuara, myslimanët, katolikët e ortodoksët shqiptarë. Vetëm të bashkuar me njerin tjetrin do ta kemi për jetë të jetëve atdheun tonë, Shqipërinë.
    Gjergj, Zoti t’dhashtë shnet dhe frymëzim, në misionin tand, t’vyem, me i knua venit tand, qytetit tand, jetës t’shqiptarëve me penën tande t’ndritun, e mendimin tand të kthjellët, për ditë ma t’bukura e paqe shpirtnore në vllaznit e tu n’atdhe e kudo ku janë në botë. Amin…

    • I nderuar Luan!
      Dëshiroj t’ju përqafoj fort me rreshta fjalësh nga larg për fjalët e mira dhe sidomomos për mirëkuptimin për mesazhin tand se ne – Vetëm të bashkuar me njeri tjetrin do ta kemi përjetë të jetëve atdheun tonë, Shqipërinë. Mendoj se vetëm duke kallxuar shumëllojshëmrinë tonë gjejmë të përbashkëtat e bukura, ndërsa të mbyllim sytë përpara realitetit, vetëm sa na dobëson, na bën dëm shendetit të kombit tonë kaq të shumëvuajtur. Të flm edhe nji herë Luan, mik i nderuem i së bukurës, sidomos për sforcimin tënd në gegnishte dhe të uroj shëndet e mbarësi në jetë ty dhe të dashurve tuaj.
      Përzemërsisht: Gjergj Kola

  2. Flm Jozef Radi,
    koleg i nderuem i poezisë, mik i mirë, njeri i apasionuem i letrave shqipe e mandej… Unë mendoj se s’ka temë as motiv qi të mos preket e përfshihet prej fjales, ksaj dhurate hyjnore qi zotnojmë na njerzit…

  3. Gjergj Kola asht poet i nji sensibiliteti të veçantë…
    Ndoshta asht ku sensibilitet, kjo mënyrë e drejtpërdrejtë komunikimi dhe kjo gjetje mjaft e rafinueme shpirtnore që e bajnë verbin e tij poetik mjaft të afërt me lexuesin…
    Poezia e tij kësaj here prek nji prej anëve tejet delikate të bashkjetesës ndërshqiptare, atë midis njerzve me besime të ndryshme, dhe… hapsina e tij poetike merr nji përmasë mjaft domethanëse për t’arthmen tonë… j.r.

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.