Humb jeten Atjon Zhiti… Bir, i vogli im… poezi nga Visar Zhiti

0
23
Atjon Visar Zhiti (1995-2014)
Atjon Visar Zhiti (1995-2014)
Atjon Visar Zhiti (1995-2014)
Atjon Visar Zhiti (1995-2014)

Si mund t’i ngushëlloj Edën dhe Visarin…!?

nga Jozef Radi

Herët e mora vesh lajmin tragjik e humbjes së djalit të vetëm, të mikut tim të shtrenjtë, Visarit… Diçka m’u këput në trup dhe në shpirt… S’e besova, nuk desha ta besoja, dhe në vetvete u luta që kjo të mos ishte e vërtetë… Nuk doja të pyesja askënd, sepse nuk doja ta besoja, e megjithatë i shkrova nji mikes time qe e kishte vënë në statusin e saj. “Po e vërtetë… sot në mëngjes… me motorr!!” Zhitët i njoh prej shumë kohësh… po Visarin, Edën… dhe Atjonin, strumullarin e dashurisë se tyre, i kam njohur aq herët, aq mirë, aq afër e aq thellë… sa nuk doja, as dua, as do të dua ta besoj kurrë, se mund të jetë e vërtetë…!! Po lajmi i tmerrshëm, bëhej më kokfortë, më i egër dhe më i vërtetë me kalimin e minutave dhe… vetëm kur u shpall si lajm, m’u prenë krahët, këmbët dhe një shi dhimbjeje pakufi ma pushtoi krejt qenien… Pse të gjithë kemi fëmijë, dhe sakrifica e dashuria për ta është e madhe, po Ju nuk mund ta besoni se sa shumë dashuri ishte mbjellë te Atjoni… Sot jam ndalur te fytyra plot dritë e këtij djaloshi të përjetshëm dhe nuk gjej asnji fjalë për ta ngushëlluar mikun Tim shtrenjtë, Visarin dhe të shoqen Edën… Nuk besoj se fjala mund ta bëjë këtë gjë, dhe ta zvogëlojë kët humbje… Kjo humbje mbetet e pangushëllueshme për ata si njerëz dhe si prindër, po mbetet humbje edhe për të gjithë ne që jemi… pjesë në jetën e tyre… e që sot në kët ditë të dhimbjes së tyre pakufi, nuk jemi me ta fizikisht, po ama shpirtërisht do të jemi me ta sa tv jetë jeta…
Qoftë e Parajsës krijesa Juaj e pafajshme, dhe Zoti iu dhashtë dritën hyjnore në mbrojtjen e asaj dashurie që mbetet tek Ju dhe ndër ne!!
20 dhjetor 2014

Atjon Zhiti mes shokeve
Atjon Zhiti mes shokeve

Bir, i vogli im…

poezi nga Visar Zhiti

Bir, i vogli im, i bukuri, degë e gjelbër krahu yt,
që më futet në ëndrra,
rritu sa më parë dhe qofsh fëmijë përherë…
e di ç’do të bëhem kur të rritem?…
bëhu ç’të duash, biri im,
por i dashur patjetër siç je,
i bukur, i bukur siç je!
Ç’të të them, unë do mundohem
të hap rrugën të gjesh vetveten,
pa të të ngacmuar, por dhe ti mos ngacmo kënd.
Apo është e pamundur,
duhen ditur të gjitha, por nuk duhen bërë të gjitha.
Bëj vetëm mirë, bir, kjo është e mundur.
Pa shkelur mbi të tjerët dhe mos lër të të shkelin.
Edhe përsosmëria jote është e mundur,
si gdhëndja, hiq të tepërtat dhe
jeta është e vetmja pasuri,
shërben për ëndrrën dhe ëndrra për jetën,
ndoshta janë e njëjta gjë.
Po, kur të ecësh, bir, lër gjurmë që t’u ngjajnë atyre
vizatimeve të zemrave që bën ti, ec dhe ec dhe shto zemrat…
Dhe vizatoje ëndrrën tënde.
Bir, rritmë dhe mua, gëzimin tim
sidomos, mendjen dhe shpirtin, se ti je dhe ati im
njëkohësisht dhe unë lutem
fshehurazi për ty, pa më parë, në shqipen e vjetër
“At’jon…”, ashtu siç ke dhe emrin. 
Deti, bir. Më josh, është siç ka
qenë, që kur u krijua bota,
i natyrshëm, po ato dallgë, po ajo mërmërimë e
përjetëshme, seç të thonë, dëgjoje, është një kumt
ujrash i pambarim, ashtu
qofsh dhe ti në shpirt, i madh, pafund.
Nja dy peshkatarë zbritën nga varka afër dhe
sollën peshkun e porsazënë. E shisnin. U grumbulluan njerëz.
Një peshk lëvrinte ende mbi rërë,
ishte gjallë dhe ti, bir, i kërkove mamit që të ta blinte.
Shpejt lekët, ma, s’kishe durim, hape çantën.
Dhe me ta marrë peshkun e gjallë,
me gojën të çarë e të përgjakur nga grepi,
vrapove drejt dallgëve dhe e hodhe në det.
E pe tek ikte i lirë, pastaj u ktheve nga ne i qetësuar.
Unë pashë time shoqe në sy. Ajo më puthi lotët,
që nuk i fsheha dot.
Fati i atij peshku… i ngjashëm
me… mbase … e jo vetëm…

Atjon Zhiti - Student ne "Sacro Cuore" Milano
Atjon Zhiti – Student ne “Sacro Cuore” Milano

Humb jetën Atjon Zhiti – djali i vetëm i Visar Zhitit.

Ka humbur jetën në një aksident djali i poetit dhe shkrimtarit disident dhe ish-ministrit të Kulturës Visar Zhitit, Atjon Zhiti.
Aksidenti ka ndodhur në autostradën Tiranë-Durrës mëngjesin e sotëm, (20 dhjetor) në afërsi të QTU, ndërsa lajmi i hidhur është përcjellë me dhimbje nga miqtë e tij në rrjetin social facebook.
Sipas Gazetarit të Ora News, Ledio Halili, Atjoni ishte duke udhëtuar si pasagjer me motor me shokun e tij, Serxhio Matjani, nga Tirana për në Durrës, teksa u përplas me trafikndarësen. Shoku i Atjonit, i cili drejtonte motorin ndodhet në gjendje të rëndë në spital.
Sipas hetimeve të para dyshohet se shkak i aksidentit ka qenë shpjetësia e madhe dhe mos përdorimi i mjeteve mbrojtëse, si skafandra.
19-vjeçari ishte kthyer në Tiranë për festat e fundvitit. Jeta e studentit të filozofisë në Universitetin “Sacro Cuore” në Milano, i cili në gusht mbushi 19 vjeç u ndërpre sot.
Ai ishte dhe djali i vetëm i Visar Zhitit.
http://www.oranews.tv

Related Images:

Artikulli paraprakFati i njeriut… tregim nga Dine Dine
Artikulli tjetërCarleton S. Coon – Antropologu i famshëm amerikan që bëri studime në Gegni
Jozef Radi
Biografi Jozef Radi 16 janar 1957, lind rastësisht në qytetin e Elbasanit, mbasi të dy prindët e posadalë nga burgu ishin interrnuar në kampin e Kuçit të Kurveleshit... Ishte i vetmi fëmijë i të ashtuquajturit “Kampi i 100 Intelektualëve”... 1957, Pagëzohet me emrin Antonin, por xhaxhai i tij me të njejtin emër, e regjistron si Jozef... 1957-1961, ndjek fatin e prindërve në odisenë e kampeve: Radostinë, Gradishtë, Çermë dhe më së fundi n’atë të Savrës... 1963-1971, kryen shkollën fillore dhe tetëvjeçare në Karbunarë dhe Savër me rezultate shumë të mira... 1971-1975, ndjek gjimnazin “20 Tetori” në qytetin e Lushnjes, ku përjashtohet dy herë nga shkolla, thjesht si... i biri i Lazër Radit! 1975, frekuenton të njëjtën klasë me Gëzim Hajdarin dhe Shpend Sollakun: Tre të apasionuar të letërsisë; më vonë edhe autorë mjaft të njohur librash... 1975, fillon si puntor në fermën e Savrës 1977-1979, kryen shërbimin ushtarak në repartet e xhenjos, fortifikim në Dropull të Gjirokastrës... 1981, mbaron shkollën e mesme me rezultate të shkëlqyera dhe as bëhet fjalë për vazhdimin e ndonji shkolle të lartë... 1984, bën gjithë përpjekjet për botimin e librit të parë poetik “Trokitje”, por problemet e biografike... e pengojnë botimin edhe pse Shtëpia Botuese e kishte vlerësuar si... “të botueshëm...” 1984-1990, krahas punës së rëndë në bujqësi, studion intensivisht gjuhët e huaja; merret me përkthime, shkruan dhe redakton veprën e të atit... 1989, së bashku me të atin përkthejnë veprën “Stalini, Moxarti dhe Maria Judina” e poetit Bërkoviqit, e cila kalon dorë me dorë si vepër antidiktaturë... 1990, së bashku me të Atin, vendosen në Tiranë, prej ku nis nji fazë e re shprese dhe entusiazmi, se demokracia mund t’i riparojë pasojat e diktaturës... dhjetor 1990-31 mars 1991, ndjek nga afër lëvizjen dhe ndryshimet demokratike... mars 1991, boton për herë të parë, ciklin me 6 poezi në revistën arbëreshe “Katundi Ynë” në Kozenca. maj 1991, regjistrohet në fakultetin e Gjuhë- Letërsisë dhe më pas kalon në atë Juridik. 1993, botojnë së bashku me të atin librin e parë “Muret e Muzgut” si dhe poemën “Stalini, Mozarti dhe Maria Judina” 1993, nis botimin e revistës tremujore “Arbëria”, e cila del në tre numra... 1993-maj 1997, punon në detyra të ndryshme në Presidencën e Republikës. qershor 1994, mbaron Fakultetin Juridik qershor 1997, ngjarjet e atij viti ishin dëshmi e vrasjes së demokracisë... detyrohet të emigrojë në Itali. shtator 1998, humb të Atin, Lazër Radin, njeriun me të cilin kishte ndarë ditët më të vështira të jetës. 2000, boton librin e dytë poetik: “Kujtesa e Mjegullës” 2004-2005, mbulon për gati dy vjet rubrikën “Qiell i Përtejmë” në revistën “ars” 2007, boton me bashkaautorë albumin fotografik “Ancona nascosta” 2000-2010, bashkpunon me shokun e tij Gëzim Hajdari, në redaktim e veprës së tij të botuar në Itali 2011, boton librin e tretë poetik “Fletorja e Vjeshtës” 2000-2013, bashkëpunon vazhdimisht me shtypin shqiptar 2000-2013, përkthyen mjaft nga veprat e poetëve si: Ungaretti, Montale, Raboni, Senesi, Fatuiva, Pessoa, De Moraes, Hikmet etje, si dhe ka në duar veprën e Bodlerit “Lulet e së keqes” 2016, po përgatit për botim veprën e plotë të Lazër Radit në 14 vëllime... Jeton prej 16 vitesh në qytetin e Anconës...

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.