Dëmshpërblimi… poezi nga Meti Fidani

0
10
Meti Fidani
Meti Fidani
Meti Fidani
Meti Fidani

Dëmshpërblimi… poezi nga Meti Fidani

Meti Fidanin, mund ta shohësh duke bërë mure, e duke ngritur çati, duke mbjellur arave e duke u kujdesur për lulet, duke prerë pemë e duke krasitur vreshta, duke bërë humor e duke marrë inisiativa që të mrekullojnë me atë shpirtin e sakrificës të ketij njeriu… E mbas gjithë kësaj së përditshmeje përplot lodhje e mundim, mund ta gjesh të ulur mbrëmjeve para tavolinës dhe kompiuterit dhe të shkruajë poezi, a të rrëfejë ngjarje që i ka në lëkurë, me po at humanizëm dhe at dashuri që e ka përcjellë ditën e gjatë e të lodhshme, ta përcjellë edhe mbrëmjen përmes shkrimet e tij… Më ka ndodhë shpesh të jem ndalur te shkrimet e Metit dhe kam ndjerë aty at përmasën e njeriut të paepur që s’dorzohet kurrë, që e ka ditën aq përplot me dritë e besim sa të tërheq ta ndjekësh, për të kuptuar se deri ku mund të mbrrijë ai… Dhe vërtet, mbasi ke lexuar nji poezi antologjike si “Dëmshpërblimi”, mund të kuptosh se këtij njeriu nuk i mungon asgjë, sepse ai ia merr të gjitha kësaj jete…  E pra, ky puntor me shpirt artisti që s’pretendon asgjë të madhe, shpërndan energji dhe besim, pa u trazuar nëse ndokujt i bie ndërmend a jo për jetën dhe veprën e tij, at jetë dhe at vepër aq ndërtuese, që ai s’e ndrron me asgjë tjetër të kësaj bote…
Shpesh i kam bërë vend Metit me shumë respekt në sitin tim, dhe shkrimet e tij mbeten ndër më të lexuarat dhe më të pëlqyerat… pse ato janë ndër më të vërtetat dhe më njerzoret… pse i tillë është dhe mbetet Meti Fidani… Dhe mua s’më mbetet tjetër veçse t’i bëj gjithnji vend, dhe ti them me zemër në dorë:
Të falemnderës  Met!
Jozef Radi
15 maj 2014

Protestë të përndjekurit...
Protestë të përndjekurit…

Dëmshpërblimi… poezi nga Meti Fidani

Më ke borxh demokracinë, që babai mezi e priste
më ke borxh, ato gjuhë të huaja, që aq bukur i fliste
dhe këngët e tij më ke borxh, dhe zërin kanarinë
më ke borxh babanë, më ke borxh pafajsinë…

borxh këmishën e dhëndërisë, gjakosur në Burrel
n’ato birucat ku dielli as hyn e as del
më ke borxh thonjtë e tij, ia shkule për së gjalli…
oh, sa borxh më ke, hyy… të marrtë djalli

Hallet e nënës, më ke borxh, të kuqtë, nusërinë
ti vellon ja hoqe, dhe ia veshe vetminë
oh borxh lotët e saj, që s’mi shlyen dot kurrë
vite e vite në pritje, me burrë e pa burrë…

më ke borxh të qarën e parë, ç’them, nuk qava, u tremba
në kampin e Gjazës, me policë dhe gjemba
mushkonjat kisha lodra dhe baltën plastelinë
më ke borxh dritën, buzëqeshjen, fëmijrinë

Poezit’e para më ke borxh, që s’di ku m’i gropose
e dyert e dijes që m’i mbylle, me kyçe e me lloze
më ke borxh rininë, dëftesat mbushur plot 10-a
më ke borxh jetën time, dhe të vashës me gërsheta
që për mua të përndjekurin, e prangose në qeli
më ke borxh dy zemra, borxh një dashuri…

Në grevë urie...
Në grevë urie…

E thanë, që marrëzitë e tua, o i marrë, u sosën
e thanë që të hoqën zvarrë, e diku të varrosën
por një natë dole nga dheu, e u ngjalle lugat
ti, që ngrysesh diktator, e gdhihesh demokrat

ti sot thërret e ngjiresh, më kot e shan diktaturën
ti sot je ujku, bisha që ka ndrruar lëkurën
po
je e njëjta fytyrë, me djallëzira kallaisur
ti je ligjvënësi im, ndër kolltukë kapardisur

Un’ mbeta i përndjekuri, por jo lipsari yt
me përralla dëmshpërblimi, ti sërish më mbyt,
i mbarsur me ligësi je, që n’embrion, që n’vezë
-Ptuuu…. përjetë  ptuuu… Paç faqen e zezë!

Marrë nga faqja e fb. Meti Fidani, 14 maj 2014

Related Images:

Artikulli paraprakE vërteta dhe dashuria në ngadhënjim Menita Ljarja
Artikulli tjetërFletë nga ditari i Majit… nga Edmond Hasani
Jozef Radi
Biografi Jozef Radi 16 janar 1957, lind rastësisht në qytetin e Elbasanit, mbasi të dy prindët e posadalë nga burgu ishin interrnuar në kampin e Kuçit të Kurveleshit... Ishte i vetmi fëmijë i të ashtuquajturit “Kampi i 100 Intelektualëve”... 1957, Pagëzohet me emrin Antonin, por xhaxhai i tij me të njejtin emër, e regjistron si Jozef... 1957-1961, ndjek fatin e prindërve në odisenë e kampeve: Radostinë, Gradishtë, Çermë dhe më së fundi n’atë të Savrës... 1963-1971, kryen shkollën fillore dhe tetëvjeçare në Karbunarë dhe Savër me rezultate shumë të mira... 1971-1975, ndjek gjimnazin “20 Tetori” në qytetin e Lushnjes, ku përjashtohet dy herë nga shkolla, thjesht si... i biri i Lazër Radit! 1975, frekuenton të njëjtën klasë me Gëzim Hajdarin dhe Shpend Sollakun: Tre të apasionuar të letërsisë; më vonë edhe autorë mjaft të njohur librash... 1975, fillon si puntor në fermën e Savrës 1977-1979, kryen shërbimin ushtarak në repartet e xhenjos, fortifikim në Dropull të Gjirokastrës... 1981, mbaron shkollën e mesme me rezultate të shkëlqyera dhe as bëhet fjalë për vazhdimin e ndonji shkolle të lartë... 1984, bën gjithë përpjekjet për botimin e librit të parë poetik “Trokitje”, por problemet e biografike... e pengojnë botimin edhe pse Shtëpia Botuese e kishte vlerësuar si... “të botueshëm...” 1984-1990, krahas punës së rëndë në bujqësi, studion intensivisht gjuhët e huaja; merret me përkthime, shkruan dhe redakton veprën e të atit... 1989, së bashku me të atin përkthejnë veprën “Stalini, Moxarti dhe Maria Judina” e poetit Bërkoviqit, e cila kalon dorë me dorë si vepër antidiktaturë... 1990, së bashku me të Atin, vendosen në Tiranë, prej ku nis nji fazë e re shprese dhe entusiazmi, se demokracia mund t’i riparojë pasojat e diktaturës... dhjetor 1990-31 mars 1991, ndjek nga afër lëvizjen dhe ndryshimet demokratike... mars 1991, boton për herë të parë, ciklin me 6 poezi në revistën arbëreshe “Katundi Ynë” në Kozenca. maj 1991, regjistrohet në fakultetin e Gjuhë- Letërsisë dhe më pas kalon në atë Juridik. 1993, botojnë së bashku me të atin librin e parë “Muret e Muzgut” si dhe poemën “Stalini, Mozarti dhe Maria Judina” 1993, nis botimin e revistës tremujore “Arbëria”, e cila del në tre numra... 1993-maj 1997, punon në detyra të ndryshme në Presidencën e Republikës. qershor 1994, mbaron Fakultetin Juridik qershor 1997, ngjarjet e atij viti ishin dëshmi e vrasjes së demokracisë... detyrohet të emigrojë në Itali. shtator 1998, humb të Atin, Lazër Radin, njeriun me të cilin kishte ndarë ditët më të vështira të jetës. 2000, boton librin e dytë poetik: “Kujtesa e Mjegullës” 2004-2005, mbulon për gati dy vjet rubrikën “Qiell i Përtejmë” në revistën “ars” 2007, boton me bashkaautorë albumin fotografik “Ancona nascosta” 2000-2010, bashkpunon me shokun e tij Gëzim Hajdari, në redaktim e veprës së tij të botuar në Itali 2011, boton librin e tretë poetik “Fletorja e Vjeshtës” 2000-2013, bashkëpunon vazhdimisht me shtypin shqiptar 2000-2013, përkthyen mjaft nga veprat e poetëve si: Ungaretti, Montale, Raboni, Senesi, Fatuiva, Pessoa, De Moraes, Hikmet etje, si dhe ka në duar veprën e Bodlerit “Lulet e së keqes” 2016, po përgatit për botim veprën e plotë të Lazër Radit në 14 vëllime... Jeton prej 16 vitesh në qytetin e Anconës...

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.