back to top
24.5 C
Tirana
E diel, 19 Maj, 2024

Shën Gjergji – Poezi nga Ernest Koliqi

Gazeta

23 Prill - Shen Gjergji
23 Prill – Shen Gjergji

Shën Gjergji

Poezi nga Ernest Koliqi

Vashat duer-njoma pa çilë agimi
kpusin sot gema me ia vu derës
si shej gazmendi, si shej urimi
pse erdh Shën Gjergji krushku i Prandverës.
T’tana u stolisen dyert qi ka shpija
me gema kumbullash e drandofillesh:
pa za t’përshndesin era e freskia
kahdo qi t’sillesh.
 
Erdhi Shën Gjergji! Me cërcërrime
flutrojn’ dallndyshat npër rreze ari.
Qoft’ bekue dora qi n’derën t’ime
dy gema lulesh n’mëngjes i vari.
Qoft’ bekue dita qi n’mjeri t’soçme
nji doke gzimi përtrin me mallë,
rritin e bukur t’prandverës s’moçme
ambël tue ngjallë.
 
Shën Gjergj, Prandvera, – zoja hirplote –
prore ty t’pati ndër né lajmtar:
kët kremte lulesh papra ndër mote
ti ia përsritë prillit shqiptar.
Ti lulevilet i hap’ mbi tanda
ku n’andrra t’reja zemrat na dridhen,
e ti mkamb’ vallet nën manda
ku shrregllat hidhen.
 
N’stërnipa mbrrijti si nëpër mjegull
hareja e pastër qi dikur solle.
S’dijm’ me hov t’vjetër m’u lkundun n’shregull!
e vallja plogtas shtiellet okolle!
Dhe n’i u përgjegjshim grishjeve t’tueja,
dhe n’qe se vallet endè s’kan’ heshtë,
prap s’dijm’ me t’lutun: shllimet e hueja
s’na lane t’thjeshtë…
 
Sa dyer t’stolisuna me lule t’bardha
jan’ rrzue gjat’ moteve, o dit’ pagane!
e sa duer vashash ka ngrimun mardha
qi me kput’ gema dikur i bane!
por psè ndër shekuj ndrruen njerzt e feja,
zakon i moçëm, jo, nuk u buer:
me gema e lule kah dyert e reja
prap çohen duer.
 
N’Shen Gjergj t’ardhshëm le t’çohen prore
duer t’bardha vashash n’shpijat shqiptare:
le t’varin lule duert prandverore
ku ruhen doket porsi visare.
Bift’ n’ato shpija gzimi ma i dlirti,
ma e ambla valle n’prill u këndoftë,
andrra ma e bukur qi dëshron shpirti
aty lulzoftë!!

Related Images:

More articles

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.

Portali Radiandradi.com, prej 11 vitesh dhuron kontribute të përditshme në shumë fusha të kulturës, historisë dhe vlerave shqiptare. Herë pas here siti ka nevojë për mirmbajtjeje, rikonstruktim si dhe rikonceptim në formatin letër. Për ta mbajtur këtë punë shumvjeçare, ndër më seriozet dhe më të lexuarat që të vazhdojë aktivitetin bëhet e domosdoshme mbështetja e lexuesve.

Jozef Radi

Redaktor i Radi & Radi

Artikujt e fundit

Copy Protected by Chetan's WP-Copyprotect.