Requiem simfonik për Havzi Nelën nga Jozef Radi

1
10
Havzi Nela reciton...
Havzi Nela reciton...
Havzi Nela i ri, me veshje tipike
Havzi Nela i ri, me veshje tipike

Requiem simfonik për Havzi Nelën…

nga Jozef Radi

Në të 25 vit të varjes në qytetin e Kukësit…

dhe të ngjitjes në qiell të këtij martiri të Fjalës dhe Mendimit të Lirë

Sot përkujtojmë me dhimbje të thellë Havzi Nelën, ma të lavdishmin e Fisit të Nelëve, prej Kollovozi, këtij fisi me emën, disa prej të cilëve kam pasur fat t’i kem jo vetëm bashkëvuejtës, po edhe komshij, edhe shokë, edhe të nji ane… dhe të kem nda me ta mjaft ditë dhe net të vështira, biseda dhe bukë, vuejtje dhe gëzime, dhe… prej kësaj mund të them se: Nelët ishin të paepun… kokshkretë… luftëtarë dhe antikomunistë të lindun… Dhe s’mundem kurrsesi që në kët Requiem Simfonik, për ma ta lavdishmin e këtij fisi: Havzi Nelën, të mos përmend edhe disa prej të dënuemve të shumtë të këtij fisi në kalvarin gjysëmshekullor të komunizmit: s’mundem të harroj Avdullanë, Sherifin, Kujtimin, Baftjarin, Baftijen, Gëzimin… të gjithë të dënuem të atij regjimi, edhe kur ishte në grahmat e fundit të dhunës…

Havzi Nela mësues 1962
Havzi Nela mësues 1962

I 25 vit i ngjitjes në qiell,

i ma të lavdishmit Poet që u përball me Diktaturën…

Havzi Nela… do të kujtohet si poeti që gjithë sakrificat i bani në emër të dijes dhe kulturës, të së vërtetës dhe drejtësisë, të shpirtit të lirë të malsorit shqiptar…

Havzi Nela… do të kujtohet si poeti që kur zgjodhi rrugën e arratisë, la lamtumirën e dhimbshme të ikjes, në telat me gjemba të kufinit shqiptar…

Havzi Nela… do të kujtohet si poeti që shpërndau dritën e dijes ngado ku jetoj… në fshatra e në shkolla, në burgje dhe rrugëve, në dasma dhe në morte… si vizionar dhe si liri shetitëse…

Havzi Nela… do të kujtohet si poeti që shkroi vargje për frymën e lirisë dhe Kartën e Helsinkit, kur terrori, dhuna dhe lufta e përbindshme klasore sundonte me grushtin e vdekjes çdo qelizë të jetës së këtij vendi…

Havzi Nela… do të kujtohet si poeti që n amanetin e nanës… kërkoi ruejtjen e atyne fletoreve me vargje të groposeshin në dhè, derisa të mbrrinte ajo ditë për të cilën ai kish këndue… Sot ato fletore janë pasuni e dhimbjes dhe humanizmit shqiptar…

Havzi Nela… do të kujtohet si poeti që jetoi i lirinë brenda vetes, edhe ndër Burgje e ndër interrnime… edhe ndër degdisjet e provokimet e pafundme që pësoi…

Havzi Nela… do të kujtohet si Fundmi Poet i botës komuniste që e priti vdekjen në kambë… diku midis sheshit të atij qyteti që e desh aq shumë, e që mbeti lavdi e zemrës së tij…

Havzi Nela… do të nderohet si sfidant i njeriut fisnik ndaj shtetit kriminel… si shpërfillës imadh e krejt atyne veglave të verbta që firmosnin me aq lehtësi vdekjet poetëve…

Havzi Nela… do të nderohet si poeti që edhe në botën e përtejme ndejti pip në kambë… pse ata që e ngulën trupin e tij të shenjtë në vend të një shtylle elektriku… padashje treguan që të jeshë poet, ndrin edhe i vdekun dhe mbetesh në kambë edhe pa qene statujë…

Havzi Nela… do të këndohet si poeti i Kollovozit të Kukësit, atij vendi mes malesh, ku fjala e tij ashtu si lodrat e Kollovozit “gjëmojnë dhe i çojnë edhe të vdekunit prej vorri!”

…edhe sot Havzi Nela gjëmon si lodrat e Kollovozit që vazhdojnë prej kur s’mbahet mend…
përkundër asaj shurdhësie që kahera e grryen pamëshirë qenien tonë…
Prandaj, besoj se s’mund të harrohet Havzi Nela,
as dje, as sot, as kurrë… sa të jetë Jeta…
10 gusht 2013

Havzi  Nela reciton...
Havzi Nela reciton…

Related Images:

Artikulli paraprakOscar Wilde – Suksesi
Artikulli tjetërPesë poezi nga Havzi Nela (1934 – 1988)
Jozef Radi
Biografi Jozef Radi 16 janar 1957, lind rastësisht në qytetin e Elbasanit, mbasi të dy prindët e posadalë nga burgu ishin interrnuar në kampin e Kuçit të Kurveleshit... Ishte i vetmi fëmijë i të ashtuquajturit “Kampi i 100 Intelektualëve”... 1957, Pagëzohet me emrin Antonin, por xhaxhai i tij me të njejtin emër, e regjistron si Jozef... 1957-1961, ndjek fatin e prindërve në odisenë e kampeve: Radostinë, Gradishtë, Çermë dhe më së fundi n’atë të Savrës... 1963-1971, kryen shkollën fillore dhe tetëvjeçare në Karbunarë dhe Savër me rezultate shumë të mira... 1971-1975, ndjek gjimnazin “20 Tetori” në qytetin e Lushnjes, ku përjashtohet dy herë nga shkolla, thjesht si... i biri i Lazër Radit! 1975, frekuenton të njëjtën klasë me Gëzim Hajdarin dhe Shpend Sollakun: Tre të apasionuar të letërsisë; më vonë edhe autorë mjaft të njohur librash... 1975, fillon si puntor në fermën e Savrës 1977-1979, kryen shërbimin ushtarak në repartet e xhenjos, fortifikim në Dropull të Gjirokastrës... 1981, mbaron shkollën e mesme me rezultate të shkëlqyera dhe as bëhet fjalë për vazhdimin e ndonji shkolle të lartë... 1984, bën gjithë përpjekjet për botimin e librit të parë poetik “Trokitje”, por problemet e biografike... e pengojnë botimin edhe pse Shtëpia Botuese e kishte vlerësuar si... “të botueshëm...” 1984-1990, krahas punës së rëndë në bujqësi, studion intensivisht gjuhët e huaja; merret me përkthime, shkruan dhe redakton veprën e të atit... 1989, së bashku me të atin përkthejnë veprën “Stalini, Moxarti dhe Maria Judina” e poetit Bërkoviqit, e cila kalon dorë me dorë si vepër antidiktaturë... 1990, së bashku me të Atin, vendosen në Tiranë, prej ku nis nji fazë e re shprese dhe entusiazmi, se demokracia mund t’i riparojë pasojat e diktaturës... dhjetor 1990-31 mars 1991, ndjek nga afër lëvizjen dhe ndryshimet demokratike... mars 1991, boton për herë të parë, ciklin me 6 poezi në revistën arbëreshe “Katundi Ynë” në Kozenca. maj 1991, regjistrohet në fakultetin e Gjuhë- Letërsisë dhe më pas kalon në atë Juridik. 1993, botojnë së bashku me të atin librin e parë “Muret e Muzgut” si dhe poemën “Stalini, Mozarti dhe Maria Judina” 1993, nis botimin e revistës tremujore “Arbëria”, e cila del në tre numra... 1993-maj 1997, punon në detyra të ndryshme në Presidencën e Republikës. qershor 1994, mbaron Fakultetin Juridik qershor 1997, ngjarjet e atij viti ishin dëshmi e vrasjes së demokracisë... detyrohet të emigrojë në Itali. shtator 1998, humb të Atin, Lazër Radin, njeriun me të cilin kishte ndarë ditët më të vështira të jetës. 2000, boton librin e dytë poetik: “Kujtesa e Mjegullës” 2004-2005, mbulon për gati dy vjet rubrikën “Qiell i Përtejmë” në revistën “ars” 2007, boton me bashkaautorë albumin fotografik “Ancona nascosta” 2000-2010, bashkpunon me shokun e tij Gëzim Hajdari, në redaktim e veprës së tij të botuar në Itali 2011, boton librin e tretë poetik “Fletorja e Vjeshtës” 2000-2013, bashkëpunon vazhdimisht me shtypin shqiptar 2000-2013, përkthyen mjaft nga veprat e poetëve si: Ungaretti, Montale, Raboni, Senesi, Fatuiva, Pessoa, De Moraes, Hikmet etje, si dhe ka në duar veprën e Bodlerit “Lulet e së keqes” 2016, po përgatit për botim veprën e plotë të Lazër Radit në 14 vëllime... Jeton prej 16 vitesh në qytetin e Anconës...

1 Koment

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.