Rei F. Hodo asht djalë i ri e mardhania me librat jo vetëm na ka njoftë
po ka shërbye edhe si nji pasarelë n’afrimin e brigjeve.
N’mënyrë të veçantë vëllimi i tij poetik “Apricus”, botim i vjetit 2022,
simbas leximit tim, e dëshmon ndër poetët ma premtues e ma modernë të brezit të vet!
Edhe pse n’lexim të parë m’erdhi pak i ftoftë e cerebral,
n’se guxon me e lexue qetsisht e ban përpjekje m’u futë në kodin e tij poetik
e në artikulimin estetik të nji gjeneratë të re, ke me e ndje e me kuptue
se përmasa e tij ne librin e tij i fundit “Apricus”, asht e plotë
e ndër t’endunit ma kujdesshëm që kam kalue ndër duer e n’vëmendje kohët e fundit…
M’bani pak habi, kjo poezi e tij kushtue Lazër Radit n’nji gegnishte të admirueshme
e n’nji konceptim emocionues, për çka e falenderoj shumfish,
sepse jam i bindun se buron nga njoftja e vlersimi i kësaj figure përmes leximesh,
çka asht diçka që nuk ndodh shpesh, e sidomos ndër përfaqsues të brezit të tij…
E ndjeva dhe e përcolla si dhuratë n’nji pikë të debolesës sime,
ndaj edhe falenderimin tim e ke edhe si lexues i librit tuej të fundit,
për të cilin në dit’t pak ma të paqme m’duhet t’jem pak ma i plotë…
jozef radi, 5 korrik 2023
n’fjalë t’Lazër Radit…
nga Rei F. Hodo
qiellnajave t’shpirtnave lypin liri – idetë
t’përkunduna me duer nanash
t’ardhuna prej motesh dhimbsunie
t’rrituna n’rrungaja t’ngrime e t’plasuna buzësh
gjer n’mort
prej nga ku edhe dielli dishron me nì diell
dhe hana
si monedhë e ftohtë rroket n’duar t’miat
prej anej nga ku vorfnohet shpirti
e jeta s’mundet me u lidhë prangash
por n’buz’qeshje t’bot’ve
me mund me ra flì
17.06.2023