back to top
29.5 C
Tirana
E mërkurë, 24 Korrik, 2024

Ndjesia e shkëputjes së përkohshme nga realiteti… nga Flutura Açka

Gazeta

Valle burrërore malësoreshh
Valle burrërore malësoresh

Ndjesia e shkëputjes së përkohshme nga toka…

nga Flutura Açka

Këtë foto e shoh shpesh dhe gjatë. Dhe kam gjithnjë të njëjtën ndjesi: atë të shkëputjes së përkohshme nga toka, nga realiteti. Por shumë më shpesh, ndjesinë e largimit nga përdita, nga ethja e pangimjes, nga baltovina ku mësohesh, nga vesi ku përshtatesh.
Nuk di përse ajo më kujton të shkuarën shqiptare, ditë të harruara, virtyte të bjerra. Ndonjëherë e lexoj si protestë ndaj vegjetimit, dhe po aq si thirrje për t’u ngritur, edhe nga vetvetja e fjetur, edhe nga bataku ku na çon rutina.
Befta këtij çasti vibrant të fiksuar në këtë foto, mund të ketë ngjyrime folklorike për ca modernë në një shoqëri si e jona – që risolli gate community (blloqet) në demokraci, gjëja më e urryer në diktaturë, që duron picirin e trafikut shqiptar nga ngulfatja që i është bërë Tiranës e qyteteve, që është mësuar me ajrin e ndotur mbi ballkone, me ujin erëkalbur që ua grin organet, që sehiros shkatërrimin e oborreve të shkollave të vjetra për një metër beton më shumë që përkthehet në para, që duron shembjen selektive të kioskave në bregdet për të shpërblyer bandat e votave të blera në zgjedhje, që pranon legalizimin e shumëpritur në prag zgjedhje me 600 euro shpërblim nën dorë, që ndërtoi një shtet të urryeshëm, që mbylli kioskat e gazetave për t’i kthyer në bukurane patatinash, që i sërdisi shitësit e fushave të periferive nga tregu për t’i liruar vendin trusit të bananeve, që nuk la të dërguar nga Europa pa dorovitur me çanta të mbushura e vajza të hajthshme, që solli e çfarë nuk solli në vitrinën e pallokracisë sonë – por ajo ka kuptimin e një pastërtie që do të mbetet përjetë, edhe pse e padukshme, në helikat e ADN-së shqiptare.
Më ngjajnë si zogj që bëhen bashkë një çast në ajër dhe kam mërzi se si as me këmbë në tokë ne nuk mundemi të jemi bashkë kundër së keqes që na e ka zënë kokën në derën e Europës.
Miqtë e mi, po jua sjell në vëmendje këtë foto, duke ju uruar një javë të mbarë!
.
Marre nga muri i FB i Flutura Açka, 14 qershor 2021
.

Related Images:

More articles

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.

Portali Radiandradi.com, prej 11 vitesh dhuron kontribute të përditshme në shumë fusha të kulturës, historisë dhe vlerave shqiptare. Herë pas here siti ka nevojë për mirmbajtjeje, rikonstruktim si dhe rikonceptim në formatin letër. Për ta mbajtur këtë punë shumvjeçare, ndër më seriozet dhe më të lexuarat që të vazhdojë aktivitetin bëhet e domosdoshme mbështetja e lexuesve.

Jozef Radi

Redaktor i Radi & Radi

Artikujt e fundit

Copy Protected by Chetan's WP-Copyprotect.