Letër e Shpresa Sejkos dërguar shqiptarëve pas vrasjes së të birit,
Sokol Sejko nga Sigurimi i Shtetit
Më 21 shkurt 1975, u vetvra Shpresa Sejko, bashkëshortja e gjeneralit Teme Sejko, i vrarë nga regjimi komunist. E internuar në Berat, historia e Shpresa Sejkos është tragjike dhe shumë e dhimbshme. E vënë nën kontroll të rreptë dhe në përpunim nga Sigurimi i Shtetit bashkë me dy djemtë, Sokol Sejko dhe Edmond Sejko, ajo pësoi terrorin barbar të Sigurimit.
Vrasjen e të birit, Sokol Sejko, nuk e përballoi dot dhe më 21 shkurt 1975, vrau veten. Ajo u shkruajti shumë njerëzve në Berat ku vajtonte të birin e vrarë. Ja një letër e Shpresa Sejkos:
“Të dashur lexonjës, e lexonjëse, bashkëatdhetarë të mij shqiptarë, qytetarë të Beratit, patriotë, komunistë të vërtetë, njerëz të ndershëm! …Më vranë djalin o shokë, o njerëz të drejtë e me shpirt, më vranë djalin barbarisht o motra e nëna shqiptare që fëmijë… Kështu ja u bëjnë fëmijve të armiqve, për të justifikuar situatat e rënda… Armiqtë e vërtetë në fuqi i kanë brenda në parti, vërsulen kot kundër nesh… Historia prej shekujsh ka treguar se për të korrur një sukses në politikë, për të mbuluar një krim është sakrifikuar edhe njeriu i brendshëm e shok i ngushtë dhe jo dava e një Sokoli… Gjatë 30 vjetëve çlirim, sa politikanë të mëdhenj kanë tradhëtuar në thellësi të partisë e kanë dëmtuar partinë e shtetin, por s’janë vrarë. Nuk dija që terrori, kriminaliteti e poshtërsia në vendim tonë të ishte në një gradë kaq të lartë! Tashti po e kuptoj se vite me radhë janë arratisur në Jugosllavi e Greqi… Jeta e fëmijëve tanë është në rrezik, për ne s’paska drejtësi e ligje… Mjerë ata fëmijë që do të kenë fatin e Sokolit tim, pa qenë fajtor, që i dënojne e i vrasin si fajtorë… I thoni udhëheqësit të partisë se çfarë politike terroriste është kjo, ç’luftë klasash kriminale është kjo. Me kriminelët që të kanë në dorë, s’paska drejtësi e sinqeritet, a janë kafshë me fytyrë njeriu, apo i bën detyra të tillë. Nuk paskan asnjë ndryshim nga inkuizicioni i kishës që dogji Xhordano Brunon, nuk ka asnjë ndryshiim nga Gestapo gjermane e kampi i çfarosjes… Mos harroni për gjithçka u kam shkruajtur dhe kujtomëni në të ardhmen… Sa më shumë frikë të kenë nga rreziku i jashtëm, aq më shumë e me egërsi do të vërsulen brenda kundër fëmijëve të pafajshëm, por që i konsiderojnë armiq, mbasi kanë titullin të tillë, se të tjerët janë fshehur e nuk i dinë… Sa më shumë të thonë e shkojnë ato që kam thënë më lart, aq më shumë do të trillojnë e aq më shumë njerëz do të dënojnë për agjitacion e propagandë. Kush do të guxojë të thotë një fjalë do t’i torturojnë e do t’i vrasin, siç ma vranë mua djalin… Sa ligje të fshehta e barbare…”
Nderimet e mia për kujtimin e saj dhe të Sejkove të vrarë mizorisht nga regjimi i Enver Hoxhës.
Marrë nga Muri i FB Xhaferr Sadiku, 23 prill 2025