back to top
31.5 C
Tirana
E shtunë, 20 Korrik, 2024

Transmetimi i Koncertit Tashko-Paluca në katund – nga Hasan Farka (1939)

Gazeta

Hasan Farka, - 1939 - "Pa shoqëni, në gjithësi s'ka lumni. Miqësisht, kët kujtim shokut tim të përhershëm,Ismail Vathit.
Hasan Farka, – 1939 – “Pa shoqëni, në gjithësi s’ka lumni.
Miqësisht, kët kujtim shokut tim të përhershëm, Ismail Vathit.

Transmetimi i Koncertit Tashko-Paluca në katund

nga Hasan Farka

(Bulk Përparimtar, gazeta “Java” 1938-39)

Javën e kalueme, posa që mora vesht se koncerti i zonjushavet Tashko dhe Paluca do të transmetohesh me radio, me gëzim thirra katundarët fqinjë të ndigjojnë nga radio e jeme që punon me bateri, se edhe ata më ndihmojnë si bujk i ri që jam.
Në dhomë, përveç Dullës plak i motshëm dhe krejt i thij qenë edhe nja dy-tre pleq të tjerë, dhe katër a pesë të rijë, të cilët i qëndrojnë lodhjes së ditës prendverore plot punë, po sa për tjerët, të lodhur e të këputun, nga puna e randë kishin ra me fjetë.
-Hô mrê, – tha Dulla tue çelë bisedën, -Ç’thonë kaurrit? – tue vështrue radion me kureshtje, kur unë po gjejshe stacionet.
-Kaurrit a? Aaa! Ata bâjnë qejfë o Dullë, – i thashë, – s’janë si na qi punojmë gjithë ditën dhe në mbramje bijmë me fjetë përnjiherë me pulat. Ata e kanë rregullue kohën e punës. Punojnë 8 orë në ditët, dhe mbasandaj lahen e shpërlahen, vishen edhe ikin me bâ qejfë në kino të katundit apo në ndonji vend tjetër. Edhe rrojnë mirë qerratallarët! Han’ e pinë mirë dhe dreka e tyne s’shkon pa nji poç me venë…
-Allahallaa! Kina shku kot vallahi! – tha Djaloshi, qi po rrinte prânë Dullës.
Në bisedim e sipër, tue luejtë shtizën dëftuese të stacionevet, befas ndigjuen:
-Hallo hallo, Radio kinema Gloria Tiranë, – dhe fëtyrat e katundarëvet u çelën kur ndigjuen fjalë shqip nga – ai alet dreqi – sikundër e quen Dulla radion! Mandolinata e Strehës filloi Hymnin Mretnuer kur befas Câni, nji djalosh i ri, briti me të madhe, po pak si me turp: “Rroftë Mbreti!”… “Rrooft! – ia pritën pleq e të rijë bashkë.
Kur filloi kanga e dytë, kangë kombëtare qi mësohet në shkolla e kazerma, nja tre katundarë qi kishin krye shërbimin ushtarak e që s’kishin çelë gojë deri atëherë, filluen me e imitue kangën me mburrje si me dashë me thanë se edhe ata kanë bâmë dishka.
E ndijet veten të lumtur tue i pá katundarët aq të kënaqun pranë zjarrit e pranë radios tue ndigjuem me vërejtje dhe disaherë sa memzi merreshin frymë për të mos prishë qetësinë.
Tash këndon Zonjusha Paluca, edhe më tepër me kërthëri u them: “Shëët!! – dhe me të vërtetë Maria, me zanin e saj të ambël i dehu katundarët e mij, të shkretët që dehen edhe pa pí fare me ksi punësh, dhe njani s’u mbajt mâ po bërtiti: “Of, of aman, qejfim tamam! – Përshtypje të madhe bâni ndër katundarë edhe kanga shqipe e zonjushës Tashko:
.
Jorgjia Filce-Truja, Lola Gjoka, Tefta Tashko, Marie Kraja.
Jorgjia Filce-Truja, Lola Gjoka, Tefta Tashko, Marie Kraja.
Ishin dy kunata moj zoje/ shkojshin si dy motra.
 
Kjo kangë këndohet shumë ndër këto ana, sidomos prej “Sufit” qi âsht tenori i katundit. Kur Zonjusha Tashko po i epte fund kangës “Tu Bacci” dhe zâni i saj mbrrinte kulmin, – Paa paa pa! Ku u shkëlye – ia bânë katundarët!
Shumë i mallëngjeu katundarët edhe dialogu “Nana e Djali” dhe them a do ta hekin benë e keqe qi bajnë kur thonë “Nje Turk!” – Pse mer jahun s’ká përherë shqip! – më pyetshin katundarët, sepse muzikën europjane s’e duen fare, i zen gjumi kur ndigjojnë. Unë u thashë se edhe ajo ditë do të jetë e afërtë.
-Si t’bôj emër Mreti, se ç’sen bôhet fët fët, – thanë me plot besim. Dhe me të vërtetë katundarët e adhurojnë me fanatizëm Prijsin e tyne, dhe na duhet të mburremi për këtë nderim qi kanë ata ndaj Mbretin, sepse âsht e vetmja mënyrë me i futë në rrugë të përparimit.
Këtë përfundim pati koncerti Vokal Tashko-Paluca në katund.
Nga cikli: Jeta në katund, Gazeta Java
.
Hasan Farka - Gazeta Java - 1938-39
Hasan Farka – Gazeta Java – 1938-39
 
 

 

Related Images:

More articles

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.

Portali Radiandradi.com, prej 11 vitesh dhuron kontribute të përditshme në shumë fusha të kulturës, historisë dhe vlerave shqiptare. Herë pas here siti ka nevojë për mirmbajtjeje, rikonstruktim si dhe rikonceptim në formatin letër. Për ta mbajtur këtë punë shumvjeçare, ndër më seriozet dhe më të lexuarat që të vazhdojë aktivitetin bëhet e domosdoshme mbështetja e lexuesve.

Jozef Radi

Redaktor i Radi & Radi

Artikujt e fundit

Copy Protected by Chetan's WP-Copyprotect.