Si mund të jemi kaq të neveritshëm përballë vetes?!
refleksion nga Shpëtim Brehamaj
Dje u orvatën të përkujtonin 20 shkurtin, datën kur u rrëzua shtatorja e diktatorit të vdekur! Kjo datë, – u tha se – ishte data kur diktatura mori krisjen perfundimtare, por “litari mbi varr” e bëri punën e tij… 32 vjet më pas ende endemi mes diktatësh e diktatorucësh që mësimet i morën bindshëm në diktaturë dhe i zbatuan aq mrekullisht në d(hj)emokracinë alla shqiptare!!!
Kryetarë partish që me diktat drejtojnë partitë e tyre, të mëdha apo të vogla qofshin ato, drejtues institucionesh që drejtojnë si despotë pikërisht prej zyrave të shtetit, drejtues mediash që edhe ata janë në garë me sivëllezërit e tyre në politikë e administratë ndrydhin fjalën e lirë… Po çfarë rrëzuam vallë?! Po pse dreqin nuk mund t’i përafrohemi fqinjeve tanë së paku në mentalitetin shtetformues?! Po si mund të jemi kaq të neveritshëm përballë vetes…?! Pse ende duartrokasim paturpshëm në mitingje e fjalime despotësh, dhe nuk mundemi të dalim në sipërfaqe për të thithur ajrin e Lirisë.
Çuditërisht dhe paradoksalisht ky truall i bekuar, fekondohet me djallin dhe pjell vetëm djaj…
21 shkurt 2023