Ballina Jozef Radi Artikuj Shkò Meshàr – Poezi nga Gjosho Vasija

Shkò Meshàr – Poezi nga Gjosho Vasija

2
25
Meshari i Gjon Buzukut
Meshari i Gjon Buzukut
Gjosho Vasija 2010
Gjosho Vasija 2010

Shkò Meshàr – Poezi nga Gjosho Vasija

“Meshari” i Gjon Buzukut, libri i parë i shkruem në gjuhën shqipe, u ekspozue për nji periudhë njimujore në eksponatet e Bibliotekës Kombtare… Ishte me të vërtetë nji emocion i veçantë me e pa at libër të randë, e të motshëm 500 vjeçar, aty mes xhamash ku dëshmohej e shkrueme nji gjuhë e lashtë, shumë e lashtë… nji gjuhë e vetmueme dhe e pashoqe e kësaj bote të madhe… Pikërisht ky fakt dhe kjo ngjarje e ka prekë edhe shpirtin e nji artisti si Gjosho Vasija, dhe ndoshta para lamtumirës së tij të fundit na ka dhurue kët perlë poetike kushtue Mesharit…
Të falemnderës Gjosho, për shumë të qeshuna dhurue prej teje, po në veçanti për kët dashni fisnike të shprehun aq amël ndaj gjuhës shqipe!
jozefradi…

Meshari origjinal 2012
Meshari origjinal 2012

Shkò Meshàr

Udha e mbarë se t’erdhi ora
me u kthye prap n’Vatikan,
ç’po na dridhet zemra e dora
tash që del prej vendit tand…

Nuk ke faj “Meshar” i Gjonit
jashtë të nxorri historia,
fjalët Tueja si ujë kronit
nuk i donte osmanllia.

E prandej mërgimin ndoqe
dole tej Adriatiku,
me u rradhitë me shokë e shoqe
n’Vatikan ku s’ish rreziku.

Udha e mbarë “Frytmadhi” Gegë,
s’ke ma leje, veç nji muej,
e dij, malli ka me t’djegë
mor për tokë, për mal e ujë,
n’pesqind vjet loti t’asht pjekë
tue ndej larg me vllazën Tuej.

Por me shpresë se për mbas sodit
ktu lirija do t’marrë shndet,
kà m’u zbutë kjo qenie e Zotit
e me t’mbajtë në gji të vet…

Udha e mbarë “Libër ngallnjyes”,
ke marrë vlerë n’gjithë botën mbarë,
mos harrò, kushdo që të pvesë
thuej Meshàr, un jam shqiptar.
Gjosho Vasija 8.12.2012

Related Images:

Artikulli paraprak2 Prill 1991 – 2 Prill 2021… nga Fritz Radovani
Artikulli tjetërRobert Kiyosaki (1947) – Gabimi
Jozef Radi
Biografi Jozef Radi 16 janar 1957, lind rastësisht në qytetin e Elbasanit, mbasi të dy prindët e posadalë nga burgu ishin interrnuar në kampin e Kuçit të Kurveleshit... Ishte i vetmi fëmijë i të ashtuquajturit “Kampi i 100 Intelektualëve”... 1957, Pagëzohet me emrin Antonin, por xhaxhai i tij me të njejtin emër, e regjistron si Jozef... 1957-1961, ndjek fatin e prindërve në odisenë e kampeve: Radostinë, Gradishtë, Çermë dhe më së fundi n’atë të Savrës... 1963-1971, kryen shkollën fillore dhe tetëvjeçare në Karbunarë dhe Savër me rezultate shumë të mira... 1971-1975, ndjek gjimnazin “20 Tetori” në qytetin e Lushnjes, ku përjashtohet dy herë nga shkolla, thjesht si... i biri i Lazër Radit! 1975, frekuenton të njëjtën klasë me Gëzim Hajdarin dhe Shpend Sollakun: Tre të apasionuar të letërsisë; më vonë edhe autorë mjaft të njohur librash... 1975, fillon si puntor në fermën e Savrës 1977-1979, kryen shërbimin ushtarak në repartet e xhenjos, fortifikim në Dropull të Gjirokastrës... 1981, mbaron shkollën e mesme me rezultate të shkëlqyera dhe as bëhet fjalë për vazhdimin e ndonji shkolle të lartë... 1984, bën gjithë përpjekjet për botimin e librit të parë poetik “Trokitje”, por problemet e biografike... e pengojnë botimin edhe pse Shtëpia Botuese e kishte vlerësuar si... “të botueshëm...” 1984-1990, krahas punës së rëndë në bujqësi, studion intensivisht gjuhët e huaja; merret me përkthime, shkruan dhe redakton veprën e të atit... 1989, së bashku me të atin përkthejnë veprën “Stalini, Moxarti dhe Maria Judina” e poetit Bërkoviqit, e cila kalon dorë me dorë si vepër antidiktaturë... 1990, së bashku me të Atin, vendosen në Tiranë, prej ku nis nji fazë e re shprese dhe entusiazmi, se demokracia mund t’i riparojë pasojat e diktaturës... dhjetor 1990-31 mars 1991, ndjek nga afër lëvizjen dhe ndryshimet demokratike... mars 1991, boton për herë të parë, ciklin me 6 poezi në revistën arbëreshe “Katundi Ynë” në Kozenca. maj 1991, regjistrohet në fakultetin e Gjuhë- Letërsisë dhe më pas kalon në atë Juridik. 1993, botojnë së bashku me të atin librin e parë “Muret e Muzgut” si dhe poemën “Stalini, Mozarti dhe Maria Judina” 1993, nis botimin e revistës tremujore “Arbëria”, e cila del në tre numra... 1993-maj 1997, punon në detyra të ndryshme në Presidencën e Republikës. qershor 1994, mbaron Fakultetin Juridik qershor 1997, ngjarjet e atij viti ishin dëshmi e vrasjes së demokracisë... detyrohet të emigrojë në Itali. shtator 1998, humb të Atin, Lazër Radin, njeriun me të cilin kishte ndarë ditët më të vështira të jetës. 2000, boton librin e dytë poetik: “Kujtesa e Mjegullës” 2004-2005, mbulon për gati dy vjet rubrikën “Qiell i Përtejmë” në revistën “ars” 2007, boton me bashkaautorë albumin fotografik “Ancona nascosta” 2000-2010, bashkpunon me shokun e tij Gëzim Hajdari, në redaktim e veprës së tij të botuar në Itali 2011, boton librin e tretë poetik “Fletorja e Vjeshtës” 2000-2013, bashkëpunon vazhdimisht me shtypin shqiptar 2000-2013, përkthyen mjaft nga veprat e poetëve si: Ungaretti, Montale, Raboni, Senesi, Fatuiva, Pessoa, De Moraes, Hikmet etje, si dhe ka në duar veprën e Bodlerit “Lulet e së keqes” 2016, po përgatit për botim veprën e plotë të Lazër Radit në 14 vëllime... Jeton prej 16 vitesh në qytetin e Anconës...

2 KOMENTET

  1. Osmon Kaceli
    Me t’vërtetë perlë…
    Ashtu si thu ti Jozef, unë kam mbushë sytë me lot, kur ma recitoi me atë zà melodioz, e me pasionin që e karakterizonte Gjoshon! I shndritën sytë nga gëzimi, kur unë i shpreha pëlqimin duke ia quejtë “nji perlë poetike” që e meritonte Meshari”!

    (Marrë nga Muri i fb 4 prill 2014)

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.

Copy Protected by Chetan's WP-Copyprotect.