Sami Blloshmi, një jetë mes përndjekjes nga sigurimi i shtetit
dhe burgosjes nga regjimi komunist
nga Bedri Blloshmi
Më 29 qershor 2023, u nda nga jeta babai jonë i dashur, Sami Blloshmi, në moshën 94 vjeç. Sami Blloshmi gjatë regjimit komunist ka kaluar një kalvar vuajtjesh. Ai punoi në bujqësi dhe në ndërmarjen e shfrytëzimit të pyjeve në Stravaj, ku gjatë gjithë kohës përndiqej dhe survejohej nga Sigurimi i Shtetit.
Në marsin e vitit 1963, ende pa u liruar vëllai i tij, Hasani, Samiu u arrestua dhe u dënua me 7 vjet heqje lirie nën akuzën “agjitacion dhe propagandë”. Në korrik të vitit 1977, familja e tij u internua për shkak të dënimit të djemve të tij, Vilsonit dhe Bedriut. Vilsoni u dënua me vdekje dhe u ekzekutua më 17 korrik 1977 bashkë me kushëririn e tij të idealeve, poetin Genc Leka, ndërsa Bedriu u dënua me 25 vjet heqje lirie.
Sami Selman Blloshmi lindi në vitin 1930, në fshatin Bërzeshtë të rrethit të Librazhdit. Ai është fëmija i dytë nga martesa e dytë e Selman Blloshmit me Xhere Lekën, motrën e Bardho Lekës. Bashkëshortja e Sami Blloshmit, Nadirja ishte nga fshati Debrovë i rrethit të Pogradecit. Ajo vinte nga një familje nacionaliste. Vëllai i saj, Halimi u pushkatua më 7 mars 1944, së bashku me Haki Blloshmin, në Dunicë.
Njëri nga vëllezërit e Nadires, Sabriu, u arratis jashtë Shqipërisë në vitin 1952, ndërsa vëllai tjetër, Rizai u internua për 5 vjet dhe më pas u arrestua nën akuzën “takim me diversantët” (me vëllanë e tij, Sabriun). Rizai u dënua me 25 vjet heqje lirie.
Sami Blloshmi nga martesa me Nadiren lindi 6 fëmijë, katër djem e dy vajza, Vilsonin, Bedriun, Selmanin, Nazmiun, Alidën dhe Lirien.
Sami Blloshmi punoi në bujqësi dhe në ndërmarjen e shfrytëzimit të pyjeve në Stravaj si druvar. Në marsin e vitit 1963, ende pa u liruar vëllai i tij, Hasani, Samiu u arrestua dhe u dënua me 7 vjet heqje lirie nën akuzën “agjitacion dhe propagandë”. Në korrik të vitit 1977 familja e tij u internua për shkak të dënimit të djemve të tij, Vilsonit dhe Bedriut. Vilsoni u dënua me vdekje dhe u ekzekutua më 17 korrik 1977, bashkë me kushëririn e tij të idealeve poetin Genc Leka, ndërsa Bedriu u dënua me 25 vjet heqje lirie.
Më 27 korrik 1977, e gjithë familja me 19 anëtarë u internua në Polis të Librazhdit. Në gushtin e vitit 1987, Samiu së bashku me familjen lihet i lirë nga internimi dhe kthehen në fshatin e tyre, Bërzeshtë. Në shtatorin e vitit 2003, Nadirja, bashkëshortja e Samiut ndërroi jetë.
Marrë nga Muri i FB Bedri Blloshmi, 24 korrik 2023