back to top
21.5 C
Tirana
E hënë, 20 Maj, 2024

Lym Alla dhe… oficeri i Kufirit… nga Adriatik R. Dosti

Gazeta

“17 Nëntori” Aeroportin e Amsterdamit - Schiphol 30.09.1970...
“17 Nëntori” Aeroportin e Amsterdamit – Schiphol 30.09.1970…

Lym Alla dhe… oficeri i Kufirit…

nga Adriatik R. Dosti

Rrinim një natë të bukur fundgushti në verandën e një Hotel – Restoranti në Shkup me të madhin dhe legjendarin e bardhëebluve të futbollit shqiptar Prof. Myslym Allën! Ishim: unë, Ali Mema, Prof. Lymi dhe Enver Shehu… Pasi kishim ardhur për një ndeshje miqësore Tirona – Vardari me ftesë të kampiones së Maqedonisë… Vardarit të Shkupit…
Duke diskutuar e folur gjatë për ndërhyrjet e politikës në sport dhe të njerëzve inkompetentë… ku Lymi ka histori të mrekullueshme, sa gazmore po aq edhe tragji-komike… Në një moment duke vënë buzën në gaz na drejtohet…
-Ehhh… ç’më kujtut nji histori të bukur në Pogradec…
…Sapo isha thirrë për me drejtu për së dyti Kombtaren… Ishte viti 1972. Po pinim nji kafe me Prof. Ilia Shuken, te Turizmi i vjetër, e po diskutonim për ndeshjen e radhës me Republikën Demokratike Gjermane, që n’atë kohë pothuajse ishte në kulmin e saj…
Kur… hop-hop, na vjen dikushi që me sa dukej njihej me Shuken, pasi u përshëndetën dhe u përqafuan …dhe kërkoj të ulej e ta pinte kafen me ne!
Më panë në sy… sikur kërkuan aprovimin tim, dhe unë u thashë ok, pa problem… Por jo me ndejtë gjatë se kemi bisedë pune e nuk është se thjesht po rrijmë të pijmë kafe.
Pasi filloi ta rrufiste kafen, ”mysafiri” nisi të cicërojë e të na japë leksione për futbollin…
Jo po pse luani kështu e nuk luani ashtu… jo po pse fut ketë e nuk fut atë në formacion… jo po pse nuk e nxjerr në sulm filanin por e mban të lidhur në mesfushë… jo pse ke grumbulluar këtë e ke lënë jashtë atë etj etj…
E dëgjova për nja 5 minuta, dhe me thonë të drejtën me iku tepeleku i kokës.
.
Myslym Alla (trajner i Tirones dhe Kombtares)
Myslym Alla (trajner i Tirones dhe Kombtares)

Me atë gjuhë jo që s’guxonte dot kush të komunikonte me mua… por as që kisha lejuar dikë, as tek Tirona e as në Kombëtare të më fliste në atë farë feje.

-Çfarë pune bon ti mor shok… domethonë çfarë zanoti ke… e pyeta me nervin bomun kaçurrel…
-Unë jam Oficer i Ushtrisë Popullore… Oficer kufiri! – m’u përgjigj menjëherë. A thua se po më thoshte se sapo jam dipllomuar për trajner futbolli!
-Nigjo mor çun… ju drejtova pasi nuk besoj se duhet të ishte më shumë se nja 30 vjeç, – E di çke ti?! Futbollin na e le neve të diskutojmë mua dhe Ilian se që të dy kemi bo nji hale shkollë për këtë zanot…
-Ti mor gjalë, (djalë në dialektin tironas) hik ne ruj kufinin… se ke po na hy nonji revizionist jugosllav nga ata të Titos e ke po na gje me brekë nëpër kom… se helbete mund të jemi duke bo ndonjë seancë stërvitje… Ene ty po t’gje belaja masanej, se ne këtu na ke… në punën e zanotin tonë. Ene mos harro hudh një sy e vre (shiko në dialekt tironas) ene andej ka Komandanti… se osht këtu me pushime e larg qofte se po na e gje gjo… se oficerat e kufinit na qenkan kthy në trajnera e specialista futbolli…
Po arrita unë me m’dhon men nji oficer se si duhet me lujtë Kombetarja apo Tirona ime… m’paska hor (honger dialekt tironas) dreqi me kohë e qekam bo për ke 17 (pavioni i të çmendurve). Nigjove… nigjova thuj…!!
Tani o xhaba… maroje at kafe… e të boftë mirë… e ke t’pagume prej meje… e na le rehat n’punë tonë…
Oficeri u skuq e u bo flakë m’surrat… por nuk bzojti (foli – dialekt tironas)… ene kafen s’e maroj… po u çu ne hiku… ka sytë – komët…
Këtë episod na tregoi atë natë gushti të gati 20 e kusur viteve ma parë… i modhi Lym Alla…
Dhe nuk e di pse m’u kujtua kjo histori këto ditë tek u ndeshëm me largimin e De Biazit por edhe me sharlatanizmin e një spoti elektoral Pro-PS… të dy prej lojtarëve më të mirë të Kombetares shqiptare… Hysaj dhe Sadiku… ku fjala Turp… do të ishte minimumi i ndonjë lloj etiketimi të mundshëm…
15 qershor 2017

 

Related Images:

More articles

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.

Portali Radiandradi.com, prej 11 vitesh dhuron kontribute të përditshme në shumë fusha të kulturës, historisë dhe vlerave shqiptare. Herë pas here siti ka nevojë për mirmbajtjeje, rikonstruktim si dhe rikonceptim në formatin letër. Për ta mbajtur këtë punë shumvjeçare, ndër më seriozet dhe më të lexuarat që të vazhdojë aktivitetin bëhet e domosdoshme mbështetja e lexuesve.

Jozef Radi

Redaktor i Radi & Radi

Artikujt e fundit

Copy Protected by Chetan's WP-Copyprotect.