Kuvend popullor Mbarëkombëtar për 550-vjetorin e vdekjes së Gjergj Kastriotit-Skënderbeut (1468-2018) – nga Kastriot Marku

0
11
Skënderbeu duke i dhënë shpatën Diktatorit
Skënderbeu duke i dhënë shpatën Diktatorit

Kuvend popullor Mbarëkombëtar për 550-vjetorin

e vdekjes së Gjergj Kastriotit-Skënderbeut (1468-2018)

nga Kastriot Marku

Në kuadër të Jubileut të 550-vjetorit të vdekjes së Heroit tonë Kombëtar Gjergj Kastrioti-Skënderbeut, klasa jonë punëtore, fshatarësia jonë kooperativiste, inteligjenca jonë popullore si dhe gjithë partitë politike të të dy krahëve të majtë e të djathtë, shumicë e pakicë, organizatat dhe shoqatat jofitimprurëse dhe vdekjeprurëse vendase dhe të huaja (përjashto Sorosin për të cilin biem dakort që të gjithë), janë angazhuar e mobilizuar si asnjëherë tjetër, dhe si kurrë më parë, duke u ngritur të gjithë në këmbë për ta mbështetur fuqimisht këtë atmosferë festive plot gëzim e hare të papërshkrueshme, organizimin e Kuvendit të Madh Popullor Mbarëkombëtar për Gjergj Kastriotin-Skënderbeun. Kësaj atmosfere festive i janë bashkuar paraprakisht mësuesit dhe nxënësit e shkollave 9-vjeçare, të mesme të përgjithshme dhe ato profesionale në fshatra e qytete; studentët e universiteteve të shumta publike e jopublike anë e kënd vendit së bashku me stafet e profesorëve të tyre me doktorata të siguruara në vend, edhe pse nuk kanë kryer arsimin e mesëm, biznese private dhe ato shtetërore, (natyrisht të gjithë në pronësi private të qeverisë), qendra të punës e të prodhimit për import e eksport nga të katër anët e vendit dhe jashtë tij, etj. Nuk ka munguar si për çdo rast edhe diaspora, e cila edhe pse me probleme të mëdha me gjuhën amtare, prapseprap mbarë e mbrapsht nuk ka qëndruar duarlidhur por i është bashkangjitur pa ngurrim thirrjes. Në pararojë e në ballë të kësaj nisme qëndron kryministri i vendit shoku Edi Rama me skuadrën e tij të “rilindjes”, posaçërisht me administratën e tij, duke nisur nga shefi i tij i protokollit, i cili për mungesë hapësire ekspozimi në Muzeun Historik Kombëtar, organizoi me sukses ekspozitën në “Pallatin e Kongreseve”, madje nxori faqebardhë edhe shefin e qeverisë duke i sjellë atij mjaft kursime, ngase paratë e dhëna prej tij nuk shkuan kot por hynë prap atje ku dolën. Hapja e Kuvendit do t’i besohet Lal Erit, kryetarit të Bashkisë së Tiranës, ngaqë Kuvendi do të mbahet në Tiranë dhe do të pasohet me një përformim të këngëtarëve të klubeve të natës të kryeqytetit.
.
Gjovalin Paci - Skënderbeu
Gjovalin Paci – Skënderbeu

.

Në këtë Kuvend janë të ftuar të mbajnë kumtesa e referate;
1.Ushtarakë – të cilët do të flasin për llojin e kacafytjeve që realizonte Gjergji, heroi ynë gjatë përleshjeve me turqit. Preferohen kapterrë të liruar dhe në pension nga ata të Zall-Herrit;
2.Sportistë të sporteve të rënda – për të folur për cilësitë fizike të Skëndebeut. Preferohen Presidenti i Republikës z.
3.Veterinerë – për hulumtimin rreth mbarështimit të gjësë së gjallë si dhe efektet e pickimit të mizës së kalit që i pat ra disa herë kalit të Skënderbeut në vigjilje të betejave, një lloj zekthi i rritur në shkretëtirat e Perandorisë, e që Sulltanët e infiltronin qëllimisht përmes spiunëve dhe dezertorëve në viset e tij;
4.Agronomë – për të ligjëruar për llojin e ushqimeve që hante heroi dhe sidomos për tagjinë dhe përgjithësisht grazhdin e veçantë që i rezervohej kalit të tij;
5.Fermerë, kuzhinierë e kasapë – për të folur për gatimin, llojin e drithërave, perimeve e frutave që mbillte e mbilleshin për heroin djerrinave e zabeleve si dhe konsumimin me e pa kriter të tyre, efekti i gazrave dhe përjashtimi i groshës dhe qullit si dhe vendin e mishit të derrit të egër në kuzhinën skënderbeane.
6.Tregtarë – për llojin e rripave dhe ndonjë rrobë për veshje që i sillnin prej Venetie, Raguze apo prej Selisë së Papëve;
7.Stilistë – që të flasin për llojin e opingave me lëkurë lope dhe kollçikët/çorapet prej leshi e kmendë dhije;
8.Dietologë – për të na bërë me dije se çfarë lloj diete mbante Gjergji i cili ishte krejt muskuj, ngaqë nuk e hante misrin për inat se kishte ardhur nga viset e pushtuesit; mbante Krezhmë apo edhe Ramazan dhe për këtë do të duhej të ftohej ndonjë hoxhë apo prift;
9.Mjekë popullorë, falltarë, barnatorë – që të flasin për llojet e melhemeve që përdornin ata kur kali gërvishtej nëpër shkurre e shkëmbinj, se në luftë ai nuk u gërvisht as sa prek miza me fletë;
10.Lajmës e fjaltorë – për llojin e kartës dhe bojës së shkrimit që përdorej dhe që postierët që i sillnin letrat me shkrola të stilume prej Romet, Venetiet, Raguzet, Stambollet etj, i përcillnin në mot të lig për në Krue.
11.Pleqtarë – me demek juristë, gjyqtarë e prokurorë, – që të diskutojnë për vendimet e plenqnisë të bame me rend menjëherë mbas betejave si dhe llojin e bimës së ndaluar që ai përdorte e që i epte energji nëpër beteja;
12.Kovaçë dhe nallbanë – për të folur për kapistrën, patkojtë e thumbat me të cilët mbathej kali; a ishin ato njësoj sikurse përdori Gjergj Elez Alia dhe Kostandini, i vëllai i Doruntinës?! për llojin e shpatave, mburojave, thikave dhe biçakëve, zileve kumbonëve e pafteve. Preferohen te jenë nga komuniteti rom për arsye gjithëpërfshirëse, sugjeruar kjo nga Avokati i Popullit.
13.Samarxhinj – për të folur për llojin e shalës dhe cilësitë e kashtës së samarit të kalit;
14.Ahengxhinj – për të folur se si qimja e kalit të tij është përdorur si tel lahute për lahutarët e krejt Veriut, prandaj këtu hyn në sy edhe këngëtari me çifteli, me fyell si edhe polifonia dhe kënga majëkrahu; po ashtu duhet të flitet për llojin e daulles dhe sistemin e alarmit me shenja në ajër, bazuar në ndonjë poezi të Ismail Kadaresë.
15.Topografë – nga ata teknikët e Aluizmit, por edhe përmbarues të zellshëm, për të verifikuar se ku kanë qenë ekzaktësisht tokat, livadhet, konakët, shtrraku, gjollët dhe gurët e kufinit të trojeve të Gjonit – të atit të Gjergjit, kuritë me të cilat kufizohej në mënyrë që të kemi një ide të saktë se cili katund e cili bajrak e ka tagrin me e pasë të vetin Gjergjin.
16.Punonjës të Gjendjes Civile – për të relatuar origjinën, breznitë, pemën gjenalogjike dhe lidhjet fisnore me fiset e krahinave të ndryshme për të përforcuar pikën 15.
Drejtues shkencor i Kuvendit do të jetë Akademiku, ish-sekretar i Lidhjes së Shkrimtarë dhe Artistëve të Shqipërisë, vjershëtari Xhevahir Spahiu, i ndihmuar fuqimisht nga matematikani z. Skënder Gjinushi, të cilin nuk po e zë gjumi natë e ditë të riorganizojë Akademinë e Shkencave për ditë më fatlume.
Me qëllim që t’i kontribuojmë sa më mirë këtij Kuvendi, jeni të ftuar po ashtu me shumë dashamirësi të jepni edhe ju vërejtje, sugjerime dhe këshilla, të cilat organizatorët do t’i marrin me shumë kujdes në konsideratë.
Shefi i kuzhinës, njëkohësisht organizator i fushatës.
Akademiku popullor: g. t.

 

Related Images:

Artikulli paraprakTrazim shpirti dhe fjale para nisjes për Atdhe – nga Nikoleta Peppo Çabej
Artikulli tjetërFinlanda nga Parid Turdiu
Jozef Radi
Biografi Jozef Radi 16 janar 1957, lind rastësisht në qytetin e Elbasanit, mbasi të dy prindët e posadalë nga burgu ishin interrnuar në kampin e Kuçit të Kurveleshit... Ishte i vetmi fëmijë i të ashtuquajturit “Kampi i 100 Intelektualëve”... 1957, Pagëzohet me emrin Antonin, por xhaxhai i tij me të njejtin emër, e regjistron si Jozef... 1957-1961, ndjek fatin e prindërve në odisenë e kampeve: Radostinë, Gradishtë, Çermë dhe më së fundi n’atë të Savrës... 1963-1971, kryen shkollën fillore dhe tetëvjeçare në Karbunarë dhe Savër me rezultate shumë të mira... 1971-1975, ndjek gjimnazin “20 Tetori” në qytetin e Lushnjes, ku përjashtohet dy herë nga shkolla, thjesht si... i biri i Lazër Radit! 1975, frekuenton të njëjtën klasë me Gëzim Hajdarin dhe Shpend Sollakun: Tre të apasionuar të letërsisë; më vonë edhe autorë mjaft të njohur librash... 1975, fillon si puntor në fermën e Savrës 1977-1979, kryen shërbimin ushtarak në repartet e xhenjos, fortifikim në Dropull të Gjirokastrës... 1981, mbaron shkollën e mesme me rezultate të shkëlqyera dhe as bëhet fjalë për vazhdimin e ndonji shkolle të lartë... 1984, bën gjithë përpjekjet për botimin e librit të parë poetik “Trokitje”, por problemet e biografike... e pengojnë botimin edhe pse Shtëpia Botuese e kishte vlerësuar si... “të botueshëm...” 1984-1990, krahas punës së rëndë në bujqësi, studion intensivisht gjuhët e huaja; merret me përkthime, shkruan dhe redakton veprën e të atit... 1989, së bashku me të atin përkthejnë veprën “Stalini, Moxarti dhe Maria Judina” e poetit Bërkoviqit, e cila kalon dorë me dorë si vepër antidiktaturë... 1990, së bashku me të Atin, vendosen në Tiranë, prej ku nis nji fazë e re shprese dhe entusiazmi, se demokracia mund t’i riparojë pasojat e diktaturës... dhjetor 1990-31 mars 1991, ndjek nga afër lëvizjen dhe ndryshimet demokratike... mars 1991, boton për herë të parë, ciklin me 6 poezi në revistën arbëreshe “Katundi Ynë” në Kozenca. maj 1991, regjistrohet në fakultetin e Gjuhë- Letërsisë dhe më pas kalon në atë Juridik. 1993, botojnë së bashku me të atin librin e parë “Muret e Muzgut” si dhe poemën “Stalini, Mozarti dhe Maria Judina” 1993, nis botimin e revistës tremujore “Arbëria”, e cila del në tre numra... 1993-maj 1997, punon në detyra të ndryshme në Presidencën e Republikës. qershor 1994, mbaron Fakultetin Juridik qershor 1997, ngjarjet e atij viti ishin dëshmi e vrasjes së demokracisë... detyrohet të emigrojë në Itali. shtator 1998, humb të Atin, Lazër Radin, njeriun me të cilin kishte ndarë ditët më të vështira të jetës. 2000, boton librin e dytë poetik: “Kujtesa e Mjegullës” 2004-2005, mbulon për gati dy vjet rubrikën “Qiell i Përtejmë” në revistën “ars” 2007, boton me bashkaautorë albumin fotografik “Ancona nascosta” 2000-2010, bashkpunon me shokun e tij Gëzim Hajdari, në redaktim e veprës së tij të botuar në Itali 2011, boton librin e tretë poetik “Fletorja e Vjeshtës” 2000-2013, bashkëpunon vazhdimisht me shtypin shqiptar 2000-2013, përkthyen mjaft nga veprat e poetëve si: Ungaretti, Montale, Raboni, Senesi, Fatuiva, Pessoa, De Moraes, Hikmet etje, si dhe ka në duar veprën e Bodlerit “Lulet e së keqes” 2016, po përgatit për botim veprën e plotë të Lazër Radit në 14 vëllime... Jeton prej 16 vitesh në qytetin e Anconës...

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.