11.5 C
Tirana
E diel, 3 Mars, 2024

Mbeshtet RadiandRadi

spot_img

Kujunxhi – nga Fatmir Terziu

on

|

views

and

comments

 

Fatmir Terziu
Fatmir Terziu

Kujunxhi

nga Fatmir Terziu

Në fillim ishte një lutje. Më pas dëshira e fundit. Ashtu ndodhi me cikërimën e fundit të flashkët që u shkrep për të fiksuar trupin në ikje. Dhe tashmë vetëm sytë trazojnë memorjet…
Ka shkuar në kohë dhe nuk ekziston më?! Por tani është aty, të gjithë janë aty. Cullnisht lëvizin gishtin e dorës së djathtë. Lëvizin atë gisht, që pason radhën nga e djathta e gishtit kryesor dhe në një formë përcjellëse kapërcejnë shikimin e tyre befasues faqe mbi faqe. Me gisht tregues! Nuk është vetëm një dëshirë e brendshme. Ajo që përcillet mes gishtit, sigurisht një ndjenjë e fiksuar, sillet si një kujunxhi me gjasa të riparojë ngjyrimet, dëmtimet, zhgarravitjet, zverdhjet bardhë e zi. Sillet si një formë e re me të cilën koha përcjell kohën, që do të thotë kujit antiformën e gjetjes së ngjyrave për qasje pamore. Dhe sytë, si sy, e ndjejnë. Po vërtet ka shkuar në kohë dhe nuk ekziston më? Ka shkuar tym? 
Tym! Duke notuar drejt një qielli të pafund, hollohet, cipalet, ment-afshet, tendoset, zvetënohet, largohet, por asnjëherë në të vërtetë nuk po zhduket. Përcjell tymnisht mbetjet e një zjarri dikur të madh, të një zjarri që ndonjëherë ka qenë fluturues. Vrasës dhe vrastar në ajri. Digjet në brendësi, zbërthehet në pafundësi, transmetohet në ndjesi e në sy. 
Ndërsa hëna largon diellin, atje në errësirën e errët një lule çel në heshtje. Ndërsa rrënjët e saj të aftësuara, gërmojnë thellë në tokën e saj përreth, forca e trungut tregon fuqinë e tij. Urtësia e gjetheve zbulon bukurinë e pamjes, derisa e gjithë ekzistenca të (ri)hidhet përsëri në erë. Kur dimri zvarritet përpara, kërcellet, përthyhet, zhvishet, sikurse sytë riçelen, frymëzohen dhe frymohen, derisa pamja t’i rikthejë, edhe një cikël tjetër çel përpara. Rilind kujunxhi të riparojë, rilind, rigjenerojë… 
Koha kalon. Gishti përcjellës lëviz, nuk mund të kuptohet se çfarë është e gabuar në një kohë të tillë, në një kohë bardhë e zi, në një kohë më të gjatë. Aftësitë degradohen nga minutat, duke u zbehur në pluhur përgjatë rrugës së gjatë të këtij deformimi thellë brenda enigmave, panjohjeve, harresave, ikjeve dhe… trazimeve. E sërish kujunxhi i këpucëve për këmbët e memorjeve.
E gjithë kjo kohë tani, duket e dështuar, përsëri, përsëri, dhe përsëri, endet kujunxhi nëpër një botë pa përgjigje. Duket sikur nuk i përket askund. Nuk mund të krahasohet, nuk ka fuqi për më gjatë,
E megjithatë, brenda këtij dëshpërimi, në këtë kohë që tretet nën maskë, ekziston një dëshirë e zbehtë, për të ecur përpara, për të mos u dorëzuar kurrë. Një kohë për t’u mbajtur e gjallë, edhe me këtë zjarr. Edhe pse flaka dobësohet, dhe më në fund kthehet në hi, sa do të jenë në gjendje sytë të ribëjnë pamjen e re, para se të digjet e gjitha para syve të tij? 
Dhe kështu heq dhe vendos maskën, vendos dhe flak në flakë markën e saj maskuese. Të paktën, nuk do të duhet kujunxhi… ku mjafton Albumi bardhë e zi. Në një ëndërr …
Por ende të gjithë janë aty. Maturisht lëvizin gishtat e lodhur, tashmë me ndërresa e me dridhje të pakontrollueshme. Sytë koklavisin retinat e tyre në qelqe. Truptha të ngatëruar. Format i gatshëm për t’u ngushëlluar. Një mbretëri e imagjinuar brenda një dhome të zakonshme, parashikohet të shkëputet nga e gjithë bota e jashtme. Për sa kohë që dyert dhe dritaret janë të mbyllura, në këtë drejtim, asnjë fjalë nuk duhet të thuhet, asnjë emocion nuk duhet të ndihet kurrë për hir të asaj ëndrre.
Jo! Jo më. Gjëra të tilla të papastra duhet të qëndrojnë jashtë, për të mbrojtur zemrën, për të mbrojtur mendjen… me maskë?! Kështu që dikush mund të qetësohet, në këtë boshllëk, në këtë zbrazëti, ku edhe lulja më e gjallë do të digjet aq shumë edhe në Album. E gjithkush do të harrojë dhe harrohet se ishte, është dhe do të mbetet kujunxhi i këpucëve të ëndërrave dhe memorjeve, edhe kur ndodh të shfaqen sulltanë modernë në vatrën tënde shekullore.
.

Related Images:

Jozef Radi
Jozef Radihttps://www.radiandradi.com
Biografi Jozef Radi 16 janar 1957, lind rastësisht në qytetin e Elbasanit, mbasi të dy prindët e posadalë nga burgu ishin interrnuar në kampin e Kuçit të Kurveleshit... Ishte i vetmi fëmijë i të ashtuquajturit “Kampi i 100 Intelektualëve”... 1957, Pagëzohet me emrin Antonin, por xhaxhai i tij me të njejtin emër, e regjistron si Jozef... 1957-1961, ndjek fatin e prindërve në odisenë e kampeve: Radostinë, Gradishtë, Çermë dhe më së fundi n’atë të Savrës... 1963-1971, kryen shkollën fillore dhe tetëvjeçare në Karbunarë dhe Savër me rezultate shumë të mira... 1971-1975, ndjek gjimnazin “20 Tetori” në qytetin e Lushnjes, ku përjashtohet dy herë nga shkolla, thjesht si... i biri i Lazër Radit! 1975, frekuenton të njëjtën klasë me Gëzim Hajdarin dhe Shpend Sollakun: Tre të apasionuar të letërsisë; më vonë edhe autorë mjaft të njohur librash... 1975, fillon si puntor në fermën e Savrës 1977-1979, kryen shërbimin ushtarak në repartet e xhenjos, fortifikim në Dropull të Gjirokastrës... 1981, mbaron shkollën e mesme me rezultate të shkëlqyera dhe as bëhet fjalë për vazhdimin e ndonji shkolle të lartë... 1984, bën gjithë përpjekjet për botimin e librit të parë poetik “Trokitje”, por problemet e biografike... e pengojnë botimin edhe pse Shtëpia Botuese e kishte vlerësuar si... “të botueshëm...” 1984-1990, krahas punës së rëndë në bujqësi, studion intensivisht gjuhët e huaja; merret me përkthime, shkruan dhe redakton veprën e të atit... 1989, së bashku me të atin përkthejnë veprën “Stalini, Moxarti dhe Maria Judina” e poetit Bërkoviqit, e cila kalon dorë me dorë si vepër antidiktaturë... 1990, së bashku me të Atin, vendosen në Tiranë, prej ku nis nji fazë e re shprese dhe entusiazmi, se demokracia mund t’i riparojë pasojat e diktaturës... dhjetor 1990-31 mars 1991, ndjek nga afër lëvizjen dhe ndryshimet demokratike... mars 1991, boton për herë të parë, ciklin me 6 poezi në revistën arbëreshe “Katundi Ynë” në Kozenca. maj 1991, regjistrohet në fakultetin e Gjuhë- Letërsisë dhe më pas kalon në atë Juridik. 1993, botojnë së bashku me të atin librin e parë “Muret e Muzgut” si dhe poemën “Stalini, Mozarti dhe Maria Judina” 1993, nis botimin e revistës tremujore “Arbëria”, e cila del në tre numra... 1993-maj 1997, punon në detyra të ndryshme në Presidencën e Republikës. qershor 1994, mbaron Fakultetin Juridik qershor 1997, ngjarjet e atij viti ishin dëshmi e vrasjes së demokracisë... detyrohet të emigrojë në Itali. shtator 1998, humb të Atin, Lazër Radin, njeriun me të cilin kishte ndarë ditët më të vështira të jetës. 2000, boton librin e dytë poetik: “Kujtesa e Mjegullës” 2004-2005, mbulon për gati dy vjet rubrikën “Qiell i Përtejmë” në revistën “ars” 2007, boton me bashkaautorë albumin fotografik “Ancona nascosta” 2000-2010, bashkpunon me shokun e tij Gëzim Hajdari, në redaktim e veprës së tij të botuar në Itali 2011, boton librin e tretë poetik “Fletorja e Vjeshtës” 2000-2013, bashkëpunon vazhdimisht me shtypin shqiptar 2000-2013, përkthyen mjaft nga veprat e poetëve si: Ungaretti, Montale, Raboni, Senesi, Fatuiva, Pessoa, De Moraes, Hikmet etje, si dhe ka në duar veprën e Bodlerit “Lulet e së keqes” 2016, po përgatit për botim veprën e plotë të Lazër Radit në 14 vëllime... Jeton prej 16 vitesh në qytetin e Anconës...
Share this
Tags

I ke lexuar?

Kontesha Bengazina – nga Lazër Radi – Pjesë nga Libri “Vorbulla t’Jetës Universitare” (Roma)

 Nji prej historive ma të bukura studentore, të rrëfyeme mjeshtrisht prej Lazër Radit në librin autobiografik: “Vorbulla t'jetës Universitare”, ku ai me at sinqeritetin e tij...

Katalogimi i Veprës së Plotë të LAZËR RADIT

  Katalogimi i veprës së plotë të LAZËR RADI  Materiali që paraqesim asht nji bibliografi e thuejse krejt Veprës së Plotë të Dr. Lazër Radit, botue dhe...

Kujtimet e mia me At Zef Valentinin – nga librat e Lazër Radit

Kujtimet e mia me At Zef Valentinin nga librat e Lazër Radit Kanuni dhe teza e doktoraturës Mbasi mbylla llogarinë me Procedurën Civile, në mënyrën ma të...

Te rejat

More like this

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.

Copy Protected by Chetan's WP-Copyprotect.