11.5 C
Tirana
E diel, 3 Mars, 2024

Mbeshtet RadiandRadi

spot_img

Dita Botnore e Poezisë – pesë poezi nga Viola Doko

on

|

views

and

comments

viola doko.01

 Dita Botnore e Poezisë – pesë poezi nga Viola Doko

Sot asht dita Botnore e Poezisë… po ndër ne, kahera pakkujt po i bien ndërmend për të…
U përpoqa sot me ba diçka të veçantë, në emën të kësaj dite…
Jo prej shumë kohësh lexoj poezitë e nji të njoftunës sime të kahershme dhe me thanë të drejtën kam mbetë paksa i mahnitun, si prej bukurisë dhe spontaneitetit të vargjeve të saj, po edhe prej nji shkujdesjeje të hatashme të kësaj grueje… Ajo as e begenisë at çka ka shkrue… pra, në njifarë mënyre kjo krijuese e çuditshme i urren pa asnji shkak krijesat e saj dhe i shpërfill në formën ma të pabesueshme ato…!!!
Si i njoftun i vjetër, ia mblodha me kujdes nja katër-pesë poezi të hedhuna n’rrugë prej saj… dhe me thanë drejtën ia lava, ia kreha, ia vesha, u vuna edhe nga nji kapele… dhe i lexova e rilexova… Sinqerisht ishin mjaft të bukura vetë… unë veçse i kisha qita nën nji dritë… pak ma ndryshe…
Sot po ia baj dhuratë Violës gjanë e saj, (Po të dhuroj … gjanë tande!!!) pse ajo tashma i ka harrue dhe kanë me iu dukë të pabesueshme… se këto poezi janë të sajat…!!
Gjithsesi në kët ditë të Madhe të poezisë, thjesht po e respektoj shpirtin e saj të ndjeshëm duke i ba vend në faqen time…
Asnji randësi s’ka “falemnders” e saj… Kushdo që ka me i lexue ka me thanë: Falemnders Viola, je e mrekullueshme!
dhe unë përtej asaj çka mund të thoni ju, s’kam asgja tjetër me i thanë!!  j.radi

Pesë poezi nga Viola Doko

Letër…

Shumë kohë asht ba
që s’marr prej teje letër,
sot m’erdhi nji…
Po ç’ka t’u desht
ajo koha e vjetër,
zjarmin tem kaherë
me hi e kish mlu!
Pse po ju fryn gacave
a don me e ndezë
njat zjarm si dikur,
me u ba shkrumb
mandej me u shu
e as hi mos me pasë
me u mblu?!
Nuk t’lashë n’borxh
e as n’borxh m’le,
po kush n’dashni
s’asht borxhli
kërkushi s’asht!
Letra jote
po m’i djeg duert
e gacat kan nis me shndri.
Po tham me vedi
ma mirë me u ba si qiri
tue djegë vedin nga pak,
e gacave ju hjedhi hi,
po letrën tande, ncëk se e hapi!
Shumë kohë asht ba
që s’marr prej kujt ndoj letër:
e s’di a du, apo nuk du,
po frigën ia kam
njasaj gacës s’vjetër…

Andrrave do t’vi

Strukun cullak ndër andrra
kryet e mbshteta te ti,
kam fjetë si n’gjumë deket
e lumtun kam ken si kurrë s’e di.
Me flokt e mi t’giatë
e kam mblu trupin tand,
të kam ngërthy n’paqë
e paqe me vedi tuj ndi
e tuj gdhendë n’kujtesën teme
t’pajetumen e andrrueme…
Strukun n’gjoksin tand t’lodhun
prej dhimbës dhe mundit,
vij si me ken melhem
me t’i zbutë plagtë e shpirtit,
e atij shpirtit tand
qi e njoh aq mirë.
Sonte te ti po vij prap
me e zbeh largsinë mes nesh,
ani, ti flej n’gjumin tand
se andërr kam me u ba vetë
se n’andrra mbeta veç muranë.

T’pashë të mrrolun

T’pashë të mrrolun
e krejt mërzi
ika pa ta thanë nji fjalë,
degave t’mollës t’i kam vjerr
sythet qi çilin
shifi bardhë jo gri.

E ti fishkëlle si përdita
merri fjalët e bani kangë,
kam me të ngì edhe pse larg
do ta hjek mallin qi lashë te ti.

E gjithkund ndër dega t’mollës
nji puthje e mshehun rri
ndër lule t’bardha e kam lanë synin
e du me t’pa tuj qeshë dhe ti.

Jeton…

S’e di,
jeton a s’jeton vallë;
di veç për të nuk mbajta zi,
veç nji aromë ende e ruaj
kur ai puthte sytë e mi.
S’e di vërtet në m’desh a jo
as që e pyeta as desha ta di,
për sa kohë sytë tanë putheshin
kish dashuri, ish dashuri…
Ende s’e di a jeton vallë,
për dreq, te unë jeton, e di,
unë jam me të dhe sodis hënën
kokën mbështes n’gjoksin e tij.
Jeton, e di, jeton akoma
ia ndjej at dorë në flokët e mi,
nji pëshpërimë ma rrënqeth trupin
nuk vdes, jo s’vdes nji dashuri.

Po vij…

Po vij tek ti
të lutem më prit
gjumin largoje sonte,
s’dua të jem ëndërr
tingull dua t’jem, muzikë
do t’përqafoj
t’harrosh sonte çdo dhimbje,
me erën do t’fluturoj
dritaren ma ler hapur
nata le të jetë e ftohtë,
zjarr do jem, prush a gacë
do digjemi të dy
zemrës t’i jap ngrohtësi.

Po vij tek ti
të lutem më prit
veshur jam më këmishë rozë,
mallin do ta shuaj
me puthje pa fund
me klithma si tërmet
për një natë,
botën tande ta trondis…

 

Related Images:

Jozef Radi
Jozef Radihttps://www.radiandradi.com
Biografi Jozef Radi 16 janar 1957, lind rastësisht në qytetin e Elbasanit, mbasi të dy prindët e posadalë nga burgu ishin interrnuar në kampin e Kuçit të Kurveleshit... Ishte i vetmi fëmijë i të ashtuquajturit “Kampi i 100 Intelektualëve”... 1957, Pagëzohet me emrin Antonin, por xhaxhai i tij me të njejtin emër, e regjistron si Jozef... 1957-1961, ndjek fatin e prindërve në odisenë e kampeve: Radostinë, Gradishtë, Çermë dhe më së fundi n’atë të Savrës... 1963-1971, kryen shkollën fillore dhe tetëvjeçare në Karbunarë dhe Savër me rezultate shumë të mira... 1971-1975, ndjek gjimnazin “20 Tetori” në qytetin e Lushnjes, ku përjashtohet dy herë nga shkolla, thjesht si... i biri i Lazër Radit! 1975, frekuenton të njëjtën klasë me Gëzim Hajdarin dhe Shpend Sollakun: Tre të apasionuar të letërsisë; më vonë edhe autorë mjaft të njohur librash... 1975, fillon si puntor në fermën e Savrës 1977-1979, kryen shërbimin ushtarak në repartet e xhenjos, fortifikim në Dropull të Gjirokastrës... 1981, mbaron shkollën e mesme me rezultate të shkëlqyera dhe as bëhet fjalë për vazhdimin e ndonji shkolle të lartë... 1984, bën gjithë përpjekjet për botimin e librit të parë poetik “Trokitje”, por problemet e biografike... e pengojnë botimin edhe pse Shtëpia Botuese e kishte vlerësuar si... “të botueshëm...” 1984-1990, krahas punës së rëndë në bujqësi, studion intensivisht gjuhët e huaja; merret me përkthime, shkruan dhe redakton veprën e të atit... 1989, së bashku me të atin përkthejnë veprën “Stalini, Moxarti dhe Maria Judina” e poetit Bërkoviqit, e cila kalon dorë me dorë si vepër antidiktaturë... 1990, së bashku me të Atin, vendosen në Tiranë, prej ku nis nji fazë e re shprese dhe entusiazmi, se demokracia mund t’i riparojë pasojat e diktaturës... dhjetor 1990-31 mars 1991, ndjek nga afër lëvizjen dhe ndryshimet demokratike... mars 1991, boton për herë të parë, ciklin me 6 poezi në revistën arbëreshe “Katundi Ynë” në Kozenca. maj 1991, regjistrohet në fakultetin e Gjuhë- Letërsisë dhe më pas kalon në atë Juridik. 1993, botojnë së bashku me të atin librin e parë “Muret e Muzgut” si dhe poemën “Stalini, Mozarti dhe Maria Judina” 1993, nis botimin e revistës tremujore “Arbëria”, e cila del në tre numra... 1993-maj 1997, punon në detyra të ndryshme në Presidencën e Republikës. qershor 1994, mbaron Fakultetin Juridik qershor 1997, ngjarjet e atij viti ishin dëshmi e vrasjes së demokracisë... detyrohet të emigrojë në Itali. shtator 1998, humb të Atin, Lazër Radin, njeriun me të cilin kishte ndarë ditët më të vështira të jetës. 2000, boton librin e dytë poetik: “Kujtesa e Mjegullës” 2004-2005, mbulon për gati dy vjet rubrikën “Qiell i Përtejmë” në revistën “ars” 2007, boton me bashkaautorë albumin fotografik “Ancona nascosta” 2000-2010, bashkpunon me shokun e tij Gëzim Hajdari, në redaktim e veprës së tij të botuar në Itali 2011, boton librin e tretë poetik “Fletorja e Vjeshtës” 2000-2013, bashkëpunon vazhdimisht me shtypin shqiptar 2000-2013, përkthyen mjaft nga veprat e poetëve si: Ungaretti, Montale, Raboni, Senesi, Fatuiva, Pessoa, De Moraes, Hikmet etje, si dhe ka në duar veprën e Bodlerit “Lulet e së keqes” 2016, po përgatit për botim veprën e plotë të Lazër Radit në 14 vëllime... Jeton prej 16 vitesh në qytetin e Anconës...
Share this
Tags

I ke lexuar?

Kontesha Bengazina – nga Lazër Radi – Pjesë nga Libri “Vorbulla t’Jetës Universitare” (Roma)

 Nji prej historive ma të bukura studentore, të rrëfyeme mjeshtrisht prej Lazër Radit në librin autobiografik: “Vorbulla t'jetës Universitare”, ku ai me at sinqeritetin e tij...

Katalogimi i Veprës së Plotë të LAZËR RADIT

  Katalogimi i veprës së plotë të LAZËR RADI  Materiali që paraqesim asht nji bibliografi e thuejse krejt Veprës së Plotë të Dr. Lazër Radit, botue dhe...

Kujtimet e mia me At Zef Valentinin – nga librat e Lazër Radit

Kujtimet e mia me At Zef Valentinin nga librat e Lazër Radit Kanuni dhe teza e doktoraturës Mbasi mbylla llogarinë me Procedurën Civile, në mënyrën ma të...

Te rejat

More like this

1 Koment

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.

Copy Protected by Chetan's WP-Copyprotect.