back to top
9.5 C
Tirana
E premte, 19 Prill, 2024

Ndahet nga jeta Lirie Bajraktari – Gashi (Gazeta 55)

Gazeta

Lirie Gashi (1933-2013)
Lirie Gashi (1933-2013)

Lajmi i vdekjes se Lirie Bajraktarit - Gashi

Dje u nda nga jeta zonja Liri Gashi-Bajraktari, bijë fisnike e Lumës, simbol i virtyteve dhe sakrificave të shtresës së të përndjekurve nga rregjimi komunist.

Liria u lind në Domaj të Ujmishit, në 5 Mars të vitit 1933, në fmiljen e famshme të Bajraktarit të Lumës.
Ajo është vajza më e vogël e Kolonel Muharrem Bajraktarit, figurë  historike e përmasave kombëtare, për të cilin gjithë populli i Lumës ushqen respekt e nderim të njëmendtë. Liria ishte e martuar me Qemal Gashin, një ish student gjimnazi të Prishtinës, nga familja e Aziz Agës në Nangë të Lumës. Ajo ishte nënë e katër fëmijëve, djalit Azizit dhe tre vajzave Lavdies, Irenës dhe Almës.
Fati i kësaj vajze, nëne dhe motre, që në hapat e para të jetës do të tregohej shumë i pamëshirshëm… pa asnjë shkak tjetër, veç pse ishte bija e Bajraktarit. Emri i saj ndonëse është mishërim i dimensionit më të thellë të qenies njerzore – lirisë – rezultoi në faktë një eufemizëm… pse jeta e Liries nga fëmijëria, deri në moshën e shtyrë ishte praktikisht një dënim i pafundshëm me pranga dhe tela me gjëmba. Kalvari i vuajtjeve nisi me pushtimin e vëndit nga Italia fashiste, kur familja e Bajraktarit u internua në Ballsh ,ngaqë Muharremi njihesh si kundështar i rreptë i pushtimit. Ky dënim dhe ndëshkim për shkak të aktivitetit të prindërve i urdhëruar dhe ekzekutuar nga pushtuesi i huaj do të qindfishohej pas ardhjes në pushtet të “çlirimtarëve” komunistë me yllin e moskovit në ballë. Arsyeja dihej: -Muharrem Bajraktari qe shpallur armik nga Partia Komuniste dhe mentorët e tyre serbë. Si pasojë, do të dënohej jo vetëm familja e tij, po mbarë fisi për të mos thënë e gjithë krahina. Fëmijët, pleqtë dhe krejt familja internohen qysh në muajt e parë të vitit 1945, fillimisht në Berat dhe pastaj në Tepelenë. Këtu do të humbin jetën disa prej pjestarëve të familjes së Bajraktarit, në mes të cilëve edhe nëna e Liries. Por ajo arrin të mbijetojë për të dëshmuar vitalitetin dhe forcën e gjenit fisnik të familjes dhe fisit të saj. Pas shumë stërmundimesh e transferimesh nga një kamp në tjetrin, Liria vendoset në Savër të Lushnjes, si mjaft të internuar të tjerë antikomunistë. Këtu arrin të martohet dhe të krijojë familjen e vet, mes sakrificash të panumërta dhe privimesh që tashmë njihen nga të gjithë. Vitet e fundit të jetës ajo i kaloi mes nipash e mbesash si një gjyshe e dhëmshur dhe shpirtëmadhe, duke ju lënë si trashëgim mësimet e hidhura të gjithë një jete nën diktaturën komuniste…
U prehsh në paqe nëna dhe motra jonë e pa harrueshme Lirie!
Shefqet Hoxha
Izet Duraku
Zenel Peposhi
Beqir Sina
Xhevat Gjana
Amir Zonja
Neritan Kolgjini
(Marrë nga Gazeta 55, 2 nëntor, 2013)

 

Related Images:

More articles

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.

Portali Radiandradi.com, prej 11 vitesh dhuron kontribute të përditshme në shumë fusha të kulturës, historisë dhe vlerave shqiptare. Herë pas here siti ka nevojë për mirmbajtjeje, rikonstruktim si dhe rikonceptim në formatin letër. Për ta mbajtur këtë punë shumvjeçare, ndër më seriozet dhe më të lexuarat që të vazhdojë aktivitetin bëhet e domosdoshme mbështetja e lexuesve.

Jozef Radi

Redaktor i Radi & Radi

Artikujt e fundit

Copy Protected by Chetan's WP-Copyprotect.