Lamtumirë At’ Kostantini… nga Albert Vataj

0
14
At' Kontantin Pistulli (1916-2015)
At’ Kontantin Pistulli (1916-2015)

Lamtumirë At’ Kostantini…

– I fundmi i Françeskanëve të Mëdhej

nga Albert Vataj

Sot Shkodra i jep lamtumirën, të fundmit të etërve françeskanë
“Tue u mbyll me frymën e mbrame të këtij shërbestari,
ne ndahena përgjithmonë me një epokë fort të lume e të gjithdijshme,
me këto burra të pashoq për nga kontributi dhe devocioni për fe e për atdhe.
Fatkeqsisht na ndahena përgjithmonë me nji mundësi
për me mujt me njoft ndokënd tjetër faqe kësaj drite
që ka me mujt me ba diqysh për me pranu n’vedi
vazhdimin e kësaj dinastie burrash të dijes,
që prehet sod në paqe me t’fundmin at’Kostantinin…” Albert Vataj

Kushtimi i një jete me Krishtin e për Krishtin e At’ Konstantinit sos udhën e vet toksore për të marrë rrugën e amshimit. Vdekja ka urdhëruar për në udhën e pasosur të fundmin e françeskanëve, At’ Konstantinit. Me At’ Konstantin përfundon breznia e fundit e fretënve që janë shuguruar meshtar para komunizmit.
Ai ishte i fundit që ka përjetu vuajtjen dhe perskutimin e asaj periudhe të errët për kishën. Pak orë pasi ka marrë bekimin dhe një kryq nga Imzot Ramiro Moliner Inglés, në orën 17:24 të datës 17 prill, ka ndërruar jetë në moshën 98 vjeçare At Konstantin Pistulli OFM. Ai lindi në Shkodër më 28 tetor 1916. Njëri pas tjetrit ikën të gjithë etërit françeskanë, duke lënë nga pas një kujtesë të skalitur më gërma sakrificash të pambarimta e vullnese të përkorë të shërbestarit të kishës dhe atdheut, besimit dhe dijes.
Kisha, Shkodra dhe memoria e gjeneratave do t’i detyrohen një mirënjohje të përunjur këtij njeriu të përkushtuar, këtyre njerëzve që duke i shërbyer Zotit, sakrifikuan gjithçka nga jeta e tyre në emër të kauzës, në emër të dijes dhe besimit.
Konstantin Ndoc Pistulli, OFM, u pranua në novicjat të Fretënve të Vogjël më 12 gusht 1932. Shugurohet meshtar më 29 qershuer 1941. Me detyrën dhe devocionin e predikuesit të fjalës së shenjtë ai shërbeu për nji vit në kuvendin e Troshani, ku edhe dha mësim në shkollën që mbanin dhe drejtonin fretnit. Në vitin 1943, caktohet si famullitar në Bratosh, famullia e Kastratit ku kontribuoi me mish e me shpirt për kishën dhe njerëzit deri më 1945. Udhën e shërbestarit të frymës së shenjtë dhe të dijes e vazhdoi në famullinë e Selcës në Malsinë e Madhe, ku qëndroi deri në vitin 1955. Në at vit fretënit e Shkodrës e emëruan Provincial të tyre, detyrë të cilën ai e mbajti deri në vitin 1958. Që nga viti 1958 deri më 1967-s, vit kur komunizmi e mbyll si kapitur besimin në Shqipëri, ai shërbeu në famullinë e Kastratit.

Kisha Françeskane Shkoder - 1938
Kisha Françeskane Shkoder – 1938

I dëbuar prej kishës famullitare qëndroi edhe një vjet në Bratosh, ku punoi si punëtor në kooperativën bujqësore dhe u shërbeu banorëve duke dëshmuar se njeriu i sakrificave tek ai të ishte kudo ku njerëzit kishin nevojë. Në majin e vitit 1968, u largua për të vazhduar të jetojë me të vëllain deri në rihapjen e kishave.
 Gjatë kësaj periudhe ky burrë i shumëarsimuar e shumëditur u detyrua të nxirrte bukën e gojës në fermë duke bërë punë shumë të rënda dhe duke u drashtur çdo natë se nesërmja do të ishte një liri pas hekurave.
Më 6 dhjetor 1989, Padër Robert Ashta kremtoi përsëri Meshën Shenjtë në vorrezat e Bratoshit në festën e Sh’Nëkollit. Po më 25 prill 1990, Padër Konstantini kremtoi festën e pajtorit, Shën Markut, në oborrin para Kishe. Prej Pashkëve të 1990-s deri në qershorin e 2003-s At’ Konstantini vijoi papushim shërbimin e tij besnik ndaj banorëve të Kastratit. Gjatë periudhës 2003-2005 për arsye shëndetësore ka kthyer disa herë shpinën famillisë së Kastratit ku shërbente për të ardhur në Shkodër në Kuvendin françeskan, Zoja Rruzare Arra e Madhe.
Është viti 2005, kur ai u vendos fillimisht në kuvendin françeskan te Arra e Madhe. Pasi shërbeu për disa kohë në Kuvendin e Zojës Rruzare, Arra e Madhe, u transferua në kuvendin e Shën Françeskut në Gjuhadol, Shkodër ku shërbeu me përkushtim e devocion, ku diti të ishte një shembull i përkorë i shërbestarit.
Ka mbyllur sytë për të lënë në kujtesën e kishës, në famullive ku shërbeu, te besimtarët, modelin e një njeriu të mirë, një vetmohuesi për Krishtin. At’Konstantin Pistulli, i fundmi i brezit të etërve Françeskan të Shqipërisë merr sot lamtumirën e fundit nga të afërmit, nga Shkodra që e lindi, nga kisha dhe të gjithë ata që jetuan me besim prej shembullit dhe fjalës së tij. Përcjellja dhe salikimet bëhen ditën e Hënë në oren 10:00 në Kishën e Shën Françeskut, Gjuhadol.

Marrë nga muri i fb i Albert Vatajt, 20 prill 2015

 

Related Images:

Artikulli paraprakLetër përtej kohës… rrëfim nga Lola Shehi – Cela
Artikulli tjetër“Ai yll, për të gjithë ne!” – fragment poeme Tasos Livadhitis
Jozef Radi
Biografi Jozef Radi 16 janar 1957, lind rastësisht në qytetin e Elbasanit, mbasi të dy prindët e posadalë nga burgu ishin interrnuar në kampin e Kuçit të Kurveleshit... Ishte i vetmi fëmijë i të ashtuquajturit “Kampi i 100 Intelektualëve”... 1957, Pagëzohet me emrin Antonin, por xhaxhai i tij me të njejtin emër, e regjistron si Jozef... 1957-1961, ndjek fatin e prindërve në odisenë e kampeve: Radostinë, Gradishtë, Çermë dhe më së fundi n’atë të Savrës... 1963-1971, kryen shkollën fillore dhe tetëvjeçare në Karbunarë dhe Savër me rezultate shumë të mira... 1971-1975, ndjek gjimnazin “20 Tetori” në qytetin e Lushnjes, ku përjashtohet dy herë nga shkolla, thjesht si... i biri i Lazër Radit! 1975, frekuenton të njëjtën klasë me Gëzim Hajdarin dhe Shpend Sollakun: Tre të apasionuar të letërsisë; më vonë edhe autorë mjaft të njohur librash... 1975, fillon si puntor në fermën e Savrës 1977-1979, kryen shërbimin ushtarak në repartet e xhenjos, fortifikim në Dropull të Gjirokastrës... 1981, mbaron shkollën e mesme me rezultate të shkëlqyera dhe as bëhet fjalë për vazhdimin e ndonji shkolle të lartë... 1984, bën gjithë përpjekjet për botimin e librit të parë poetik “Trokitje”, por problemet e biografike... e pengojnë botimin edhe pse Shtëpia Botuese e kishte vlerësuar si... “të botueshëm...” 1984-1990, krahas punës së rëndë në bujqësi, studion intensivisht gjuhët e huaja; merret me përkthime, shkruan dhe redakton veprën e të atit... 1989, së bashku me të atin përkthejnë veprën “Stalini, Moxarti dhe Maria Judina” e poetit Bërkoviqit, e cila kalon dorë me dorë si vepër antidiktaturë... 1990, së bashku me të Atin, vendosen në Tiranë, prej ku nis nji fazë e re shprese dhe entusiazmi, se demokracia mund t’i riparojë pasojat e diktaturës... dhjetor 1990-31 mars 1991, ndjek nga afër lëvizjen dhe ndryshimet demokratike... mars 1991, boton për herë të parë, ciklin me 6 poezi në revistën arbëreshe “Katundi Ynë” në Kozenca. maj 1991, regjistrohet në fakultetin e Gjuhë- Letërsisë dhe më pas kalon në atë Juridik. 1993, botojnë së bashku me të atin librin e parë “Muret e Muzgut” si dhe poemën “Stalini, Mozarti dhe Maria Judina” 1993, nis botimin e revistës tremujore “Arbëria”, e cila del në tre numra... 1993-maj 1997, punon në detyra të ndryshme në Presidencën e Republikës. qershor 1994, mbaron Fakultetin Juridik qershor 1997, ngjarjet e atij viti ishin dëshmi e vrasjes së demokracisë... detyrohet të emigrojë në Itali. shtator 1998, humb të Atin, Lazër Radin, njeriun me të cilin kishte ndarë ditët më të vështira të jetës. 2000, boton librin e dytë poetik: “Kujtesa e Mjegullës” 2004-2005, mbulon për gati dy vjet rubrikën “Qiell i Përtejmë” në revistën “ars” 2007, boton me bashkaautorë albumin fotografik “Ancona nascosta” 2000-2010, bashkpunon me shokun e tij Gëzim Hajdari, në redaktim e veprës së tij të botuar në Itali 2011, boton librin e tretë poetik “Fletorja e Vjeshtës” 2000-2013, bashkëpunon vazhdimisht me shtypin shqiptar 2000-2013, përkthyen mjaft nga veprat e poetëve si: Ungaretti, Montale, Raboni, Senesi, Fatuiva, Pessoa, De Moraes, Hikmet etje, si dhe ka në duar veprën e Bodlerit “Lulet e së keqes” 2016, po përgatit për botim veprën e plotë të Lazër Radit në 14 vëllime... Jeton prej 16 vitesh në qytetin e Anconës...

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.