Foleja e Grenxave dhe Kushtrimi i të Parëve nga Gjergj Hani

0
10
Gjergj Hani
Gjergj Hani

Foleja e Grenxave

dhe Kushtrimi i të Parëve

nga Gjergj Hani

Mjaftoi një video, që portali “Syri.net” solli në kujtesën e çalë të shqiptarëve demokratë, për t’i dhënë jetë folesë së topitur të grenxave! Të eksituara u lëshuan në një vorbull të zhurmëshme komentesh virtuale, ku krahu “Jakobin”, që zgjohet me të rrallë, kërkon të rrokullisen koka, – e krahu “Zhirondin” mundohet të ulë gjakrat duke “injektuar” doza të mëdha arsyetimesh pak a shumë logjike, por të shkëputura nga konteksti që u dha jetë e për rrjedhojë të cunguara!
E përbashkëta e vetme mes tyre është shpallja e sentencave të formës së prerë, pa kurrfarë analize e gjykimi objektiv! Gjë që do të mundësojë harrimin e shpejtë (në mos ka ndodhur) të këtyre pasioneve beharishte. Emocionet shuhen shpejt. E kur nuk shoqërohen nga pyetje e përgjigje racionale, janë të destinuara të topiten deri sa një tjetër “shejtan” t’i ngacmojë sërish! Do ta kuptoja vërtet “indinjatën” e folëse së grenxave, nëse “Syri.net” do të kishte sjellë në vëmendjen e demokratëve në letarg një të re të panjohur më parë. Atëhere do të kishte qenë scoop gazetaresk, që do të sillte një fragment të panjohur nga e shkuara e deputetit Ristani, që njëkohësisht është edhe numuri dy i PD. Por kështu nuk është! Tashmë i përket së shkuarës e kronologjisë së fakteve të ndodhura, që Ristani ka mbrojtur në cilësinë e avokatit të birin e Enver Hoxhës dhe familjen e tij.
Deri këtu asgjë të keqe! Në demokraci, çdokush e ka të sanksionuar me ligj të drejtën e mbrojtjes përpara ligjit. Natyrisht që i pandehuri që akuzohet për një vepër penale ku rrezikon lirinë e tij, ka të drejtë të zgjedhë avokatin që dëshiron e ja lejon xhepi, duke u nisur nga një sërë vlerësimesh që i bën figurës së mbrojtësit, siç janë ato të aftësive të tij juridike, eksperiencave në këtë fushë, bilanceve të arrira në profesionin e tij, e mbi të gjitha, besimit që ka tek ky njeri të cilit i beson fatin e të ardhmen e tij e të familjes së tij. Nuk besoj se Hoxha, apo kush për të, ka zgjedhur të parin avokat që ka hasur në rrugë. Ndoshta në vlerësimin e disa figurave të barazvlefshme në aftësi, zgjedhja e Ristanit mund të ketë qenë e rastësishme! Ndoshta rastësia solli që nipi i fotografit të Enver Hoxhës të bëhej avokat, e kjo ka ndikuar tek klienti Ilir Hoxha për të krijuar klimën e besimit mes tij e avokatit Ristani! Ndoshta! Dhe unë, nuk do t’i kisha ngritur këto hipoteza në rast se Ristani do të kish vazhduar të bënte avokatin e suksesshëm! Por për arësye që vetëm ai i di, Ristani vendosi ta lerë avokatinë, e t’i hyjë karrierës politike, duke ngjitur rrufeshëm shkallët e pushtetit, deri sa arriti të bëhej numuri dy i partisë që kishte marrë përsipër të çrrënjoste komunizmin e ta tragetonte Shqipërinë e shqiptarët drejt një demokracie të plotë.

Arben Ristani...
Arben Ristani…

E mua llogaritë në këtë pikë më ngatërrohen, e nuk më dalin më! A thua ka qënë rastësia ajo që e bëri Hoxhën të preferonte Ristanin? A thua të mos këtë ndikuar fakti që gjyshi i avokatit kishtë qenë fotografi i oborrit të Hoxhës? A thua të gjitha këto të kenë qenë rastësi, e të mos kenë ndikuar në karrierën e beftë të Ristanit? A thua egziston rastësia e ndërthurjeve të fateve njerëzore në një vend me përmasat e Shqipërisë e me peshën e emrit të Hoxhës? A thua që të gjitha këo të jenë fryt i rastësisë?
Personalisht quaj rastësi kur dikush del nga shtëpia e gjen në rrugë një 100 leksh, apo kur dikush në parkim e sipër të mballos makinën. Këto janë rastësi e studiohen nga probabiliteti! Por në politikë dihet që të tilla nuk ka, e sidomos kur “rastësitë” janë më shumë se një! Dikush nga foleja e grenxave përpiqet të bëjë fajtor këdo që ngre dyshime e përpiqet të arsyetojë; duke lëshuar pyetje në formë akuzë të tipit: Përse merreni me PD e nuk merreni me PS?! E para, sepse PS nuk është shtëpia ime politike. E dyta, sepse nuk mund te merrem me shtëpinë e tjetrit, kur shtëpisë sime i është shuar zjarri në vatër, e po i bie çatia brenda. E së treti, bëj aq sa mundem, që zgjimet në PD të mos jenë ato të folesë së grenxave, dhe dihet se ato venë qerren përpara buajve! Dhe e fundit, sepse dua që demokratët e fjetur të kuptojnë se Ristani nuk është shkaku, por pasoja! Dua t’u kujtoj atyre e vehtes, që nuk na takon të bëjme të indinjuarin për “shkëlqimin” e avokatit të Hoxhës, kur ne 2009, zhdoganuam si pa të keq faqen më të turpshme në historinë e PD, – që është nga pak edhe historia jonë – atë të aleancës me LSI-në! Askush nga ne që “indinjohemi” për avokatin, nuk tha një gjysëm fjalë për një aleancë ndaj së cilës duhej të ishim ngritur të gjithë e të thoshim: Kjo nuk bëhet!
Historia e kombeve, njeh raste të tilla aleancash që janë quajtur aleanca të bashkimit kombëtar, e janë kristalizuar si domosdoshmëri historike përballë një rreziku që kërcënonte integritetin e këtyre kombeve! Po në rastin tonë, çfarë e kërcenonte Shqipërinë në 2009, sa të përligjte këtë aleancë qeverisjeje, sa imorale e po aq të pa principtë?! Cili ishte rreziku, përpos atij të humbjes së karrikeve, që qoftë në një demokraci primitive si kjo e jona, duhet konsideruar si një dialektike normale?! E pra; atëhere foleja e grenxave nuk u indinjua as në thonjëza, as shtroi pyetje, e as kërkoi përgjigje! Përkundrazi, festoi e “përgjumur” nga tymi i konfirmimit të karrikeve, duke refuzuar të parashihte shkaqet që rrjedhimisht do të sillnin këto pasoja, përfshi edhe rastin e avokatit të Hoxhës! Ne themi se kemi dalë nga “pylli i errët” i të shkuarës, dhe jemi aq të bindur për këtë sa nuk dëgjojmë ulurimat që vijnë prej tij, si një mallkim që do të na ndjekë gjatë. E këto nuk janë tjetër veç thirrjet, kushtrimet e të parëve që i kthen ata në jetë, përmes zgjimit të instikteve ancestrale në pjellën e tyre që lanë pas e sot jeton mes nesh, duke na kthyer në një fole grenxash!

Related Images:

Artikulli paraprakQylymi Lumjan… nga Ilir Seci
Artikulli tjetër“Mbi Gjenialitetin e Albatros Rexhajt” nga Armend Mazreku + 1 opinion
Jozef Radi
Biografi Jozef Radi 16 janar 1957, lind rastësisht në qytetin e Elbasanit, mbasi të dy prindët e posadalë nga burgu ishin interrnuar në kampin e Kuçit të Kurveleshit... Ishte i vetmi fëmijë i të ashtuquajturit “Kampi i 100 Intelektualëve”... 1957, Pagëzohet me emrin Antonin, por xhaxhai i tij me të njejtin emër, e regjistron si Jozef... 1957-1961, ndjek fatin e prindërve në odisenë e kampeve: Radostinë, Gradishtë, Çermë dhe më së fundi n’atë të Savrës... 1963-1971, kryen shkollën fillore dhe tetëvjeçare në Karbunarë dhe Savër me rezultate shumë të mira... 1971-1975, ndjek gjimnazin “20 Tetori” në qytetin e Lushnjes, ku përjashtohet dy herë nga shkolla, thjesht si... i biri i Lazër Radit! 1975, frekuenton të njëjtën klasë me Gëzim Hajdarin dhe Shpend Sollakun: Tre të apasionuar të letërsisë; më vonë edhe autorë mjaft të njohur librash... 1975, fillon si puntor në fermën e Savrës 1977-1979, kryen shërbimin ushtarak në repartet e xhenjos, fortifikim në Dropull të Gjirokastrës... 1981, mbaron shkollën e mesme me rezultate të shkëlqyera dhe as bëhet fjalë për vazhdimin e ndonji shkolle të lartë... 1984, bën gjithë përpjekjet për botimin e librit të parë poetik “Trokitje”, por problemet e biografike... e pengojnë botimin edhe pse Shtëpia Botuese e kishte vlerësuar si... “të botueshëm...” 1984-1990, krahas punës së rëndë në bujqësi, studion intensivisht gjuhët e huaja; merret me përkthime, shkruan dhe redakton veprën e të atit... 1989, së bashku me të atin përkthejnë veprën “Stalini, Moxarti dhe Maria Judina” e poetit Bërkoviqit, e cila kalon dorë me dorë si vepër antidiktaturë... 1990, së bashku me të Atin, vendosen në Tiranë, prej ku nis nji fazë e re shprese dhe entusiazmi, se demokracia mund t’i riparojë pasojat e diktaturës... dhjetor 1990-31 mars 1991, ndjek nga afër lëvizjen dhe ndryshimet demokratike... mars 1991, boton për herë të parë, ciklin me 6 poezi në revistën arbëreshe “Katundi Ynë” në Kozenca. maj 1991, regjistrohet në fakultetin e Gjuhë- Letërsisë dhe më pas kalon në atë Juridik. 1993, botojnë së bashku me të atin librin e parë “Muret e Muzgut” si dhe poemën “Stalini, Mozarti dhe Maria Judina” 1993, nis botimin e revistës tremujore “Arbëria”, e cila del në tre numra... 1993-maj 1997, punon në detyra të ndryshme në Presidencën e Republikës. qershor 1994, mbaron Fakultetin Juridik qershor 1997, ngjarjet e atij viti ishin dëshmi e vrasjes së demokracisë... detyrohet të emigrojë në Itali. shtator 1998, humb të Atin, Lazër Radin, njeriun me të cilin kishte ndarë ditët më të vështira të jetës. 2000, boton librin e dytë poetik: “Kujtesa e Mjegullës” 2004-2005, mbulon për gati dy vjet rubrikën “Qiell i Përtejmë” në revistën “ars” 2007, boton me bashkaautorë albumin fotografik “Ancona nascosta” 2000-2010, bashkpunon me shokun e tij Gëzim Hajdari, në redaktim e veprës së tij të botuar në Itali 2011, boton librin e tretë poetik “Fletorja e Vjeshtës” 2000-2013, bashkëpunon vazhdimisht me shtypin shqiptar 2000-2013, përkthyen mjaft nga veprat e poetëve si: Ungaretti, Montale, Raboni, Senesi, Fatuiva, Pessoa, De Moraes, Hikmet etje, si dhe ka në duar veprën e Bodlerit “Lulet e së keqes” 2016, po përgatit për botim veprën e plotë të Lazër Radit në 14 vëllime... Jeton prej 16 vitesh në qytetin e Anconës...

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.