back to top
28.5 C
Tirana
E hënë, 20 Maj, 2024

Rruga e Kavajës… nga Adriatik R. Dosti

Gazeta

Rruga e Kavajës - Pranverë
Rruga e Kavajës – Pranverë

Rruga e Kavajës…

nga Adriatik R. Dosti

Rruga, ku s’ka derë shtëpie të djeshme të mos kisha një mik, madje krenar e i privilegjuar për miq, vajza e djem të tillë që kjo rrugë ikonike e kryeqytetit i kishte aq me shumicë…
Edhe pse vapë e padurueshme, bori të çmendura makinash, shoferë me patentë të ”fortësh”… kryesisht nga ai tipi i atyre të pas ’90… që tashmë e quajnë veten tironsa venalinj e denbabaden… pasi ne të ardhurit në Tironë që në kohë të Zogut …gjithnje e më shumë po mbetemi në minorancë e të shpërfillur sa që na vjen turp tashmë të themi se jemi le e rrit dhe banojmë në këtë qytet prej gati një shekulli… Vendosa së bashku me Mirën dhe shoqen time të fëmijërisë Mondën… që Rrugën e Kavajës ta shetisim hap pas hapi në këmbë…
.
Kur ndërtohej rruga... që sot quhet Kavajës (edmond bermema)
Kur ndërtohej rruga… që sot quhet Kavajës (edmond bermema)
Ehhhh… moj e mrekullueshmja Rrugë e Kavajës… sa kujtime, sa histori fëmijërore, rinore por edhe burrërore mbart për secilin prej nesh në historinë dhe arteriet e tua që flasin aq bukur kur zë e ecën mbi ty e herë pas here fshi edhe një lot të nxehtë malli që të rrëshqet mbi faqe, ashtu pa dashur e vetiu, por dhimbshëm e prej shpirti…
Ja aty tej në të djathtë, është Shtëpia e Levonjëve… pak me tutje dyqani i famshëm i Shaban Qoses, që mbart në kujtimet tona aq e aq histori gazmore e të papërsëriteshme… sigurisht me protagist Goshin…
Dhe nis e sikur flet me vete duke shqiptuar dhimbshem fjalët… këtu ka qenë kjo… atje ka qenë ajo… pranë kësaj ishte… ky etj. etj…
e që sot nuk janë më…
Nuk e di, por gjithmonë kam menduar se ai që vjen në Tiranë dhe nuk shkel në rrugën e Kavajës, e në ato të quajturat: e Durresit, Fortuzi, e Dibrës, e Elbasonit, Bardhyl… për mua zëre se s’ka qenë fare në këtë qytet…
Fatmirësisht, të paktën skeleti i Rrugës së Kavajës, falë Zotit… ende edhe sot i ka shpëtuar dyndjes, pushtimit ”demokratik” për të jetuar ku të të dojë qejfi… sipas teorive të dy prej njerëzve që e masakruan dhe e shpërfytyruan Tiranën më shumë se çdo gjë tjetër në historinë e saj qindra vjeçare: Berishës dhe Rames… arkitektët famëkëqinj të kasaj katrahure e masakre urbane e demografike që… paturpësisht sot kanë gojë edhe ta quajnë zhvillim apo edhe Metropol…
.
Adriatik Dosti në Rrugën e Kavajës (2017)
Adriatik Dosti në Rrugën e Kavajës (2017)
Dhe që nga 21-shi e deri në qendër tek Banka, është vetë katrahura e pas ’90-ës, dhe masakra… që bëjnë rolin e pafajshëm të Ciceronit duke të treguar se atje ku dikur ishte shkolla e Kulturës ka mbirë një kolegj turk me emrin Arif a Mehmet…
…se tek Godina e klubit të Tironës dhe salla e lojrave me dorë “Fahrie Hoti” të mbysin pallatet shumëkatshe e kishat që rrethohen nga turli lloj dyqanesh me soj soj emrash e etiketimesh në gjuhë të huaja e nga më të çuditeshmet në botë…
…se trotuaret e bukur të kësaj rruge duken si të bombarduara prej nje dore barbarësh ..
…se ish Radio Tirana e vjeter, ish Muzeu i Shkencave të Natyres, ish Mihal Duri, ish Hotel Adriatiku, ish Lidhja e Shkrimtareve, ish kinema Republika, ish Lulishtja 1 Maji, e sa e sa të tjera ish-e… historike te biografisë së kësaj rrugë… sot janë shkatërruar tërësisht apo shpërfytyruar në mënyrë të tillë dhe deri në atë masë sa që e ke vështirë të besosh se deri dje kanë qenë pika referimi të Rrugës së dashur e lule shumë të Kavajës… dhe krenaria e biografisë së saj…
…se rruga – ikone e BardheBluve, sot nuk ka më gojë të flasë për përçudnimin antinjerëzor që i kanë bërë duart dhe mendjet bastarde të të paudhëve…
…se Parkut të famshëm të Xha Tomit… nuk i ka mbetur as nami e as nishani..
…se fare pranë me ish ambasadën turke… aty ku kam mijra kujtime. nga rrugica ime e dashur e Çamëve, siç e njohin tironasit e hershëm e venalinj… ju luta Zotit që shyqyr që nuk e kishin prishur e rrënuar… se aty kam miqtë e mij për kokë Nurët…
…se edhe shtëpinë e motrës sime, ngjitur me ish SK Tironën… nuk arrita ta njoh dot më pasi e kishin pyllëzuar me ndertime të llojit: ”moderno-demokratik…”
…se në rrugën e famëshme të Kavajës… aty ku kryeqytetasit por edhe të gjithë shqiptarët i dhanë dërmën e parë komunizmit duke sulmuar dyert e Ambasadave të huaja akredituar në Tiranë …fatkeqësisht ende edhe sot nuk sheh një pllakë përkujtimore që të siglojë historinë e dhimbëshme të asaj kohe kur u përleshëm dhëmb për dhëmb me diktaturën dhe pjellat e saj bastarde…
…sepse këtu tashmë nuk gjen qoftë edhe një shënim të vetëm a një simbol përkujtues, që nga kjo rrugë… bijtë e bijat tona morën rrugën e përtej detit… përmes autobuzëve që mbartin brenda tyre urrejtje, mllef, pakënaqësi në ekstrem por edhe dhimbje, mall e dashuri njerëzore…
.
Rruga e Kavajës natën...
Rruga e Kavajës natën…
Dhe… ”modernët” e sotëm që e kanë stërbetonizuar e stërpopulluar këtë rrugë në të dy anët e saj …mburren duke ulëritur se ja kanë ndryshuar faqen Tironës dhe se ajo ka përparuar e është zbukuruar goxha…!!
Të kanë vrarë e basarduar në çdo detaj e origjinalitet tëndin o rruga ime e dashu! Ani… unë erdha përsëri të të shetis… erdha se kisha vërtet shumë dashuri e mall sikurse kam për çdo gjë të qytetit tim ku u linda, u rrita dhe jetova prej dekadash…
Erdha dhe do të vij sërisht e sa herë që të më marrë malli, sa herë që të më urdhërojë zemra e shpirti… sa herë që lotët të më mblidhen në grykë nga dashuria, dhimbsuria e respekti për rrugët e qytetit tim…
Marre nga Muri i FB i Adriatik R. Dostit, 30 korrik 2017

 

Related Images:

More articles

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.

Portali Radiandradi.com, prej 11 vitesh dhuron kontribute të përditshme në shumë fusha të kulturës, historisë dhe vlerave shqiptare. Herë pas here siti ka nevojë për mirmbajtjeje, rikonstruktim si dhe rikonceptim në formatin letër. Për ta mbajtur këtë punë shumvjeçare, ndër më seriozet dhe më të lexuarat që të vazhdojë aktivitetin bëhet e domosdoshme mbështetja e lexuesve.

Jozef Radi

Redaktor i Radi & Radi

Artikujt e fundit

Copy Protected by Chetan's WP-Copyprotect.