Perla poetike të poetit heretik Fatos Arapi – Në nderim e kujtim të tij, përgatiti Anton Çefa

0
11
Poeti Fatos Arapi
Poeti Fatos Arapi
Poeti Fatos Arapi (1930)
Poeti Fatos Arapi (1930)

Perla poetike të poetit heretik Fatos Arapi

Në nderim e kujtim të tij, përgatiti Anton Çefa

Stuhia

Njërin krah të pulëbardhës e mbushte jugu
tjetrin krah tramundana.
Në gojë të dallgëve e reve
klithja e zogut digjej nën shira.
Mbi mua e nën mua shpirti
apokaliptik i një perëndie të egër.
 
Gjeni e poezisë buzëqesh
dhe sundoje tani kaosin.
.

Akeronti rrjedh, po Karont nuk ka

Si të kthehem prapa kur udhën s’e di?
Prej pikëllimi lumi buçitës i natës
rrah brigjet e errëta këtu.
 
Akeronti rrjedh, po Karont nuk ka.
Tregomë një va ku të kaloj.
Ti i njeh guvat e vorbullat e frikshme.
Tregomë një va, vëllai im,
ku të kaloj Akerontin
dhe të arrij.
Akeronti rrjedh, po Karont nuk ka.
 .

Perëndia e shqiptarëve

Kot – luftë.
Kot – vdekje.
Kot – shpresë.
Perëndia e shqiptarëve akoma mendon…
 
Demagogë idealet.
Tragjike liritë.
Komike shpresat.
Perëndia e shqiptarëve mvrenjtet,
shtriqet,
akoma mendon.
S’e thotë që s’e thotë
një fjalë perëndie… 

Gjiri i papirë

“Në çdo gjysëm sekonde vdes në botë një fëmijë…”
 
Një arkivol i vogël, gjysma e sekondës… 
T’u flas senateve, parlamenteve,
burrave të shteteve?
 
Si fëmija që heq gishtin prej goje,
me gisht t’u tregoja një gjysmë sekonde
që kundron brenda një varri?
 
Do të doja prej zemrave të nënave
të shkulja rrënjët e errëta të dhimbjeve,
që ndjell gjiri i papirë.
Dhe ju, duke shkelur mbi gjysma sekondash,
pse të shkoni në varreza fëmijësh,
ku trëndafilët ngatërrojnë fjalët e para –
të jetës apo të vdekjes?
 .

E sajoi reja zogun

E sajoi reja zogun e furtunës.
Sa ndjeu prekjen e krahut mbi valë,
u drodh deti im.
E qeshi e qau me dhimbje stërkalash.
 
Tani zgalemi tek unë godet,
rreh sqepin e fortë në shkëmb,
fjalë për fjalë rrokjëzon
shpirtin e tij.
 
Nuk është i bindur zogu,
a e kujton deti
dhe unë. 
 .

Si s’të desha pak më shumë…

Unë e desha përtej vdekjes,
ashtu dashurova unë.
Edhe prap s’ja fal dot vetes:
Si s’e desha pak më shumë… 
 
Pak më shumë ku shpirti thyet,
t’i them ndarjes: – Prit, ca pak… 
të gë mallin që s’shuhet,
kujtimin të gënjejmë pak.
 
Përtej vdekjes, përtej botëve,
atje ku nisë “ca pak” tjetër, –
Asaj që më rri mes Zotave:
 
“Si s’të desha pak më tepër…”
 .

Si mund të kalohet Llogaraja pa ty

Si mund të kalohet Llogaraja pa ty?
Me një kokërr portokalle në dorë,
Llogaraja si mund të kalohet pa ty…
Të pengohesh nëpër folera yjesh
të zgjosh e të trembësh zogjt’ qiellorë
që fluturojnë e fshihen fundeve të detit…
Një dhimbje bardhësie të kaltër,
njerëzore gjer në përjetësi!
Në duart e mia,
ky dallgëzim qiellor i deteve,
si dikur drithërimë e përmallshme e ijeve
të tua imcake.
Ky mall i përjetshëm Llogaraje
më mbeti në sy.
Akrokeraunet 
Vazhdojnë punën e tyre të përhershme:
prodhojnë vetëtima.
.

Mjellma e Liqenit të Ohrit

E uli qafën e brishtë
tek brinjë e Orionit.
 
Derdhur e tëra prej malli.
Mbi konstelacione yjesh
e fatesh lundron,
hutim i bardhë, mospërfillës i liqenit.
Befas shpirti i natës ndizet,
shkrumohet në këngën e saj.
 
Brerimë e lotëve shuan,
atje përposh,
prushanën e ndezur të Mjellmës Boreale.

Related Images:

Artikulli paraprakPër të kuptuar lëvizjet politike më të dhunshme në historinë njerëzore – sipas Jason Stanleyt
Artikulli tjetërIpeshkvi Gjon Nikollë Kazazi, Zbuluesi i parë i librit të Parë Shqip, “Meshari” dhe “Shënimet e Gjon Nikollë Kazazit” të Jusuf Buxhovit nga Frank Shkreli
Jozef Radi
Biografi Jozef Radi 16 janar 1957, lind rastësisht në qytetin e Elbasanit, mbasi të dy prindët e posadalë nga burgu ishin interrnuar në kampin e Kuçit të Kurveleshit... Ishte i vetmi fëmijë i të ashtuquajturit “Kampi i 100 Intelektualëve”... 1957, Pagëzohet me emrin Antonin, por xhaxhai i tij me të njejtin emër, e regjistron si Jozef... 1957-1961, ndjek fatin e prindërve në odisenë e kampeve: Radostinë, Gradishtë, Çermë dhe më së fundi n’atë të Savrës... 1963-1971, kryen shkollën fillore dhe tetëvjeçare në Karbunarë dhe Savër me rezultate shumë të mira... 1971-1975, ndjek gjimnazin “20 Tetori” në qytetin e Lushnjes, ku përjashtohet dy herë nga shkolla, thjesht si... i biri i Lazër Radit! 1975, frekuenton të njëjtën klasë me Gëzim Hajdarin dhe Shpend Sollakun: Tre të apasionuar të letërsisë; më vonë edhe autorë mjaft të njohur librash... 1975, fillon si puntor në fermën e Savrës 1977-1979, kryen shërbimin ushtarak në repartet e xhenjos, fortifikim në Dropull të Gjirokastrës... 1981, mbaron shkollën e mesme me rezultate të shkëlqyera dhe as bëhet fjalë për vazhdimin e ndonji shkolle të lartë... 1984, bën gjithë përpjekjet për botimin e librit të parë poetik “Trokitje”, por problemet e biografike... e pengojnë botimin edhe pse Shtëpia Botuese e kishte vlerësuar si... “të botueshëm...” 1984-1990, krahas punës së rëndë në bujqësi, studion intensivisht gjuhët e huaja; merret me përkthime, shkruan dhe redakton veprën e të atit... 1989, së bashku me të atin përkthejnë veprën “Stalini, Moxarti dhe Maria Judina” e poetit Bërkoviqit, e cila kalon dorë me dorë si vepër antidiktaturë... 1990, së bashku me të Atin, vendosen në Tiranë, prej ku nis nji fazë e re shprese dhe entusiazmi, se demokracia mund t’i riparojë pasojat e diktaturës... dhjetor 1990-31 mars 1991, ndjek nga afër lëvizjen dhe ndryshimet demokratike... mars 1991, boton për herë të parë, ciklin me 6 poezi në revistën arbëreshe “Katundi Ynë” në Kozenca. maj 1991, regjistrohet në fakultetin e Gjuhë- Letërsisë dhe më pas kalon në atë Juridik. 1993, botojnë së bashku me të atin librin e parë “Muret e Muzgut” si dhe poemën “Stalini, Mozarti dhe Maria Judina” 1993, nis botimin e revistës tremujore “Arbëria”, e cila del në tre numra... 1993-maj 1997, punon në detyra të ndryshme në Presidencën e Republikës. qershor 1994, mbaron Fakultetin Juridik qershor 1997, ngjarjet e atij viti ishin dëshmi e vrasjes së demokracisë... detyrohet të emigrojë në Itali. shtator 1998, humb të Atin, Lazër Radin, njeriun me të cilin kishte ndarë ditët më të vështira të jetës. 2000, boton librin e dytë poetik: “Kujtesa e Mjegullës” 2004-2005, mbulon për gati dy vjet rubrikën “Qiell i Përtejmë” në revistën “ars” 2007, boton me bashkaautorë albumin fotografik “Ancona nascosta” 2000-2010, bashkpunon me shokun e tij Gëzim Hajdari, në redaktim e veprës së tij të botuar në Itali 2011, boton librin e tretë poetik “Fletorja e Vjeshtës” 2000-2013, bashkëpunon vazhdimisht me shtypin shqiptar 2000-2013, përkthyen mjaft nga veprat e poetëve si: Ungaretti, Montale, Raboni, Senesi, Fatuiva, Pessoa, De Moraes, Hikmet etje, si dhe ka në duar veprën e Bodlerit “Lulet e së keqes” 2016, po përgatit për botim veprën e plotë të Lazër Radit në 14 vëllime... Jeton prej 16 vitesh në qytetin e Anconës...

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.