Zgjidhet Kryepeshkopi i Tiranës, Durrësit dhe i gjithë Shqipërisë,
Fortlumturia e Tij, Joan Pelushi
urim nga Mal Berisha
Urime zgjedhjes në krye të kishës Autoqefale të Shqipërisë,
fortlumturia e tij, Kryepeshkopi i Tiranës, Durrësit
dhe i gjithë Shqipërisë, Joan Pelushi
Sot më 16 Mars 2025, është një ditë historike për Kishën Ortodokse Autoqefale Shqiptare dhe, për rrjedhojë, edhe për ne të gjithë shqiptarët. Kthimi i autoqefalisë së kësaj Kishe në drejtimin e një kleriku ortodoks shqiptar është një moment shumë i rëndësishëm historik.
Në këtë ditë të shënuar, pasi mora vesh lajmin e shumëpritur, bashkë me Donikën shkuam të “festonim” këtë moment në Manastirin Ortodoks të Ardenicës. Arsyet ishin:
1.Zgjedhja e Fortlumturisë së Tij, Kryepeshkopit Joan Pelushi, në krye të Autoqefalisë, dhe nga atje i uruam fatbardhësi Atij dhe të gjithë vëllezërve tanë ortodoksë, besim të mbarë dhe të lidhur me atdhedashurinë e dëshmuar nga shumë patriotë tanë, në radhë të parë nga themeluesi i kësaj Kishe, Imzot Fan Noli.
2.Në nderim të miqësisë personale që kam pasur me At Arthur Liolin, pasardhësin e drejtpërdrejtë të themeluesit të Kishës Autoqefale Shqiptare në Boston, Imzot Fan S. Nolin.
3.Në nderim të aktit historik të kurorëzimit të Heroit tonë Kombëtar, Gjergj Kastrioti – Skënderbeu, me Donika Kastriotin, duke e bërë këtë vend jo vetëm një qendër pelegrinazhi fetar, por edhe një pikë me rëndësi historike.
Pak histori nga Manastiri i Ardenicës
Mendohet se themelet e këtij manastiri janë hedhur në vitin 1282, me nismën e perandorit Andronik II Paleolog të Bizantit, i cili e ngriti këtë tempull pas fitores mbi anzhuinët në Berat.
Në dokumentet historike, Manastiri “Lindja e Shën Mërisë” në Ardenicë përmendet për herë të parë në vitin 1715.
Manastiri është zbukuruar me afreske të mrekullueshme nga piktorët Kostandin dhe Athanas Zografi, të cilët punuan për dekorin e këtij tempulli në vitin 1744.
Veprimtaria artistike e ateliesë së piktorëve Zografi është shpalosur në bazilikat e Voskopojës, Vithkuqit, Myzeqesë dhe në Malin e Shenjtë, në Greqi, ku ata shkuan disa herë dhe shfaqën talentin e tyre të fuqishëm në kishat dhe manastiret e atjeshme.
Urojmë Fortlumturinë Tuaj! Gëzuar, bashkë me vëllezërit Ortodoksë Autoqefalë Shqiptarë!
MB