“Triumph” i Donald Trump në Tiranë –
përmes piktorit të supertalentuar shqiptar… mikut tim të mirë, Avni Delvina
nga Adriatik Riza Dosti
Bash në ditën e ceremonisë së betimit në White House në Washington, të Presidentit të 47 të Amerikës, D.Trump në 20 janar 2025, piktori i talentuar shqiptar, Avni Delvina dhe organizatorët e bashkëpunëtorët e ekspozitës së tij krejtësisht të veçantë e unikale Dritan Kaba, Niko Dhales e Adrian Devolli, i kanë befasuar e surprizuar të gjithë… teksa në Piramidën e Tiranës kur dikur mbretëronte ende Diktatori i vdekur komunist shqiptar, Hoxha… kanë sjellë pothuajse të gjallë Uraganin “kapitalist” amerikan Donald Trump.
Janë 47 punime mes pikturës e grafikës e mbi të gjitha përmes profesionalizmit perfekt por edhe talentit e mendjes së hollë, të mençur e finesës së tij artistike… që e befasojne krejt shikuesin e vizitorin shqiptar por që tërheqin gjithashtu dukshëm vëmendjen edhe të opinionit, publikut, mediave e kritikës kombëtare e ndërkombëtare.
Pasi deri më sot kjo mbetet ekspozita e parë e këtij lloji në botë.
Tematika dhe mesazhi që kërkon të përcjellë përmes çdo punimi të tij piktori Delvina mendoj se janë Qershia mbi Tortë e kësaj ekspozite, e cila do të qëndrojë e hapur në kryeqytetin shqiptar deri të djelën e 26 janarit dhe që deri tani në vetëm 2-3 ditët e para të egzistencës së saj ka tërhequr një numër rekord vizitorësh.
Përtej mediave shqiptare të cilat talenti dhe mendja e mençur e piktorit Delvina duket se i nxorri nga guacka… është shtypi e media ndërkombëtar që e ka vlerësuar së tepërmi çeljen e ekspozitës Triumf i Donald Trump në Tiranë prej një piktori e artisti shqiptar i cili prej vitesh jeton e krijon në Itali, anipse me zemër jeton e frymon në Atdheun e tij të dashur… Shqipëri.
Kujtoj me këtë rast se Avni Delvina rrjedh nga një familje tipike atdhetare, patriote, nacionaliste e antikomuniste shqiptare… si dhe është nip i Sulejman Delvinës, kryeministrit të shquar shqiptar të dalë prej Kongresit të Lushnjes.
I njohur jo vetëm si shqiptar i mirë e piktor i supertalentuar, Avni Delvina meriton respekt të veçantë edhe për bindjet e tija konseguente politike të djathta e për qëndrimin në vijën e parë të demokracisë… si një demokrat i vërtetë e i pa kompromis me të keqen e si një shqiptar nacionalist që kurdoherë aspiron ta shohë Atdheun e tij të Lirë e Dinjitoz.
Urime të përzemërta Avni miku… shumë respekt, konsideratë e mirënjohje Ty personalisht, por edhe familjes tënde për gjithçka keni bërë e bëni ndër vite në të mirë të kombit, Atdheut e popullit tuaj… në të mirë të Lirisë, Paqes e Demokracisë kudo në botë… ku edhe ekspozita e sapoçelur në Tiranë dedikuar ekskluzivisht “Uraganit Trump”, duket se i vë vulën gjithçkaje dhe s’ka fare nevojë as për elozhe e as për komente të tepërta.
Respekte e përqafime vëllazërore nga larg, miku yt e i familjes suaj
Adriatik Riza Dosti –
Janar 22 / 2025 – Ann Arbor – Michigan – USA