Qazim Koculi – Patrioti, Intelektuali, Ushtaraku dhe Shtetari i Vlorës!
nga Shkëlqim Hysaj – Lepenica
Më 22 gusht 1887, në Kocul të Vlorës, lindi Qazim Koculi – një nga figurat e shquara të patriotizmit dhe të shtetformimit shqiptar.
I arsimuar në “Zosimea” të Janinës dhe i diplomuar në Akademinë Ushtarake të Stambollit, ai ishte një intelektual dhe ushtarak me formim të lartë, që e vuri dijen dhe aftësinë e tij në shërbim të Shqipërisë.
Pas Shpalljes së Pavarësisë, iu përgjigj thirrjes së Ismail Qemalit dhe u kthye në Vlorë, ku shërbeu në administratën e shtetit të ri shqiptar. Më pas u bë delegat i Vlorës në Kongresin e Lushnjës, u zgjodh deputet.
Emri i tij u skalit në historinë kombëtare veçanërisht gjatë Luftës së Vlorës, të vitit 1920, kundër pushtuesve italianë. Në fazën e parë të luftës, komandant i përgjithshëm ishte Ahmet Lepenica. Pas dorëheqjes të tij, Qazim Koculi mori drejtimin e forcave shqiptare dhe udhëhoqi fazën vendimtare të luftës deri në fitoren shqiptare.
Më 3 shtator 1920, Vlora u çlirua. Kjo fitore ishte dëshmi e fuqisë së vullnetit shqiptar për të mbrojtur tokën, lirinë dhe sovranitetin e vendit.
Qazim Koculi nuk ishte vetëm luftëtar. Ai ishte edhe shtetar: deputet, ministër dhe Kryeministër i Shqipërisë.
Jeta e tij përfundoi tragjikisht më 2 janar 1943, por emri i tij mbeti i lidhur me një nga faqet më të lavdishme të historisë së Vlorës dhe Shqipërisë.
Në vitin 2020, Presidenti i Republikës e nderoi pas vdekjes me titullin “Kalorës i Urdhrit të Skënderbeut”, në vlerësim të kontributit të tij patriotik.
Qazim Koculi ishte nga ata burra që nuk e deshën Shqipërinë vetëm me fjalë. E shërbyen atë me dije, guxim, sakrificë dhe përgjegjësi.
Nderim për Qazim Koculin!
Nderim për patriotët e Vlorës!