Një thesar 352 vjeçar, i porositur në qytetin Oxford,
në destinacionin final, duke pasuruar Bibliotekën time personale…
nga Paulin Z. Zefi
George de Scudéry, Curia Politiæ: or the apologies of Several princes: Justifying to the World their Most Eminent Actions: by the strength of reason, and the most Exact Rules of Policy (Written in French by the acurate Pen of Monsieur de Scudery Governor of Nostre-Dame; And now faithfully Render’d into ENGLISH. With the Figures of many Emperors and Kings), Second Edition, London: Printed for Robert Boulter at the Turk’s Head in Cornbil against the Royal Exchainge, 1673.
Ky ekzemplar i botuar në Londër, në vitin 1673 dhe që është në një gjendje fizike të shkëlqyer, ka një kapitull kushtuar Heroit tonë Kombëtar e Ndërkombëtar, Gjergj Kastriot – Skënderbeut, dhe tashmë është libri më i vjetër që kam në koleksionin tim. Autori i librit, Georges de Scudéry (1601-1667), i cili e ka renditur Kryeheroin në listën e udhëheqësve më të mëdhenj në historinë e njerëzimit, është novelisti, dramaturgu, poeti i njohur francez dhe një ndër personalitetet europiane më me autoritet gjatë shek. XVII.
Gjurmuesi dhe porositësi i këtij libri është miku im i përzemërt nga Tuzi i Malësisë së Madhe, që jeton në New York City, Zef Ujkaj. E falenderoj jashtëzakonisht shumë!
Çmimi i librit bashkë me postën është 284€, çka do të thotë se rroga ime e janarit “perëndoi” me sot dhe ditët e mbetura të këtij muaji, unë punoj kot. Lum kush merret me këtë lloj pasioni! Në fakt, vlera reale e këtij libri, që është një antikuar shumë i rrallë dhe i çmuar, shkon rreth 1.000 €.
Georges de Scudéry, ndër të tjera shkruan për Gjergj Kastriotin-Skënderbeun se:
“Ky Princ, përmes trimërisë së tij të pakrahasueshme, u përpoq midis mijëra akteve të lavdishme dhe bëri mrekulli, për habinë e asaj epoke ku jetoi. Ai mundi ushtritë, që për shkak të përmasave të tyre të mëdha nuk mund të numëroheshin: ai bllokoi rrjedhën e fuqishme të atij lumi të madh, i cili nuk do të ishte ndalur derisa të kishte shkatërruar hapësira të pamata dhe pjesën më të madhe të botës: ai bëri që një perandor (Murati II – P.Z.) të vdiste me turp, pikëllim dhe çnderim: ai e detyroi Mehmetin II, i cili ishte pushtuesi i shumë perandorive dhe mbretërive, për të dëshmuar me atë gëzim të tepruar që manifestoi për vdekjen e tij, frikën e jashtëzakonshme që kishte prej tij gjatë jetës së tij. Dhe në fakt, për hir të së vërtetës, ky Gjeneral i madh, Skënderbeu, ishte pa dyshim, Heroi më i madh i këtyre epokave të fundit!”
Lezhë: 14.02.2025