Largohet nga jeta një tjetër qytetar fisnik i Korçës: Robert – (Dionis) Kotmilo
nga Klodi Stralla
Këtë mëngjes, Edvana, mbesa e tij, na dha lajmin e trishtë se ka ndërruar jetë në Korçë, në moshën 84 vjeçare, Dionis Kotmilo ose Berti siç e njihnim ne korçarët, miqtë dhe shokët e tij të afërt. Një lajm i trishtë për të gjithë ata që e kanë njohur këtë njeri fisnik dhe qytetar të mirë.
Kam patur rastin ta njoh që herët, si njërin prej shokëve të shkollës të baxhanakut tim Dr. Thoma Pilurit, mandej u njohëm më shumë, kur punova në Gjykatë, godina e së cilës ishte edhe ajo e Bashkisë të Qytetit, ku Berti qe kryetari i saj në vitin e mbrapshtë 1997.
Berti ishte një burrë i mençur, shumë punëtor e i papërtuar, i qetë dhe i matur në marrjen e vendimeve, tolerant me këdo, dashamirës dhe i prirur t’iu shërbente të gjithë atyre që ishin në nevojë; dhe mos të harrojmë, ishin vitet e para të Demokracisë, ku mungonte çdo gjë, si dijet ashtu edhe mundësitë materiale për zgjidhjen e tyre.
Sot, Bertin dua ta kujtoj veçanërisht me mirënjohje për guximin që tregoi kur turma vandale e irrituar iu vërsul disa herë godinës së Bashkisë dhe Gjykatës për ta djegur, por ai mobilizoi njerëzit e tij, u përball vetë me turmën dhe nuk lejoi një humbje të pazevëndësueshme që do t’i ndodhte qytetit nëse do të digjej Gjendja Civile, Hipoteka, Kadastra dhe Arkivi i tij.
Por ajo çka e veçon Bertin nga shumë prej pushtetarëve, të djeshëm e të sotëm, ishte ndershmëria e tij proverbiale. Ndonëse i kishte të gjitha mundësitë të pasurohej në kuriz të detyrës, ai preferoi të mbetej deri në fund të jetës, fisnik dhe kjo cilësi e rrallë për kohën tonë do të mbetet ajo për të cilën korçarët e vërtetë do ta kujtojnë me respekt dhe mirënjohje.
U prehsh i qetë, i dashur Berti, sepse le pas një emër të mirë, një pasuri që ndonse sot pak çmohet, por jam i bindur se koha do t’ia rritë vlerën.
Marrë nga Muri i FB Klodi Stralla, 2 prill 2025