Fenomeni Adriatik Lapaj
Nga liderët politikë që morën mandate këto zgjedhje, më i riu është Adriatik Lapaj. Avokati e nisi rrugëtimin e tij më 28 shtator 2023, dhe me rreth 18 muaj punë ai dirigjoi një parti e cila u rendit e treta në rang kombëtar. Deri në fund të procesit të numërimit, Lapaj gjithsej do të marrë mbi 70.000 vota.
Tomë Doshi, me dy dekada e gjysmë eksperiencë në zgjedhje dhe me miliona euro shpenzime, nuk i çau dot qarqet Lezhë, Durrës, Elbasan, Fier, Korçë, Berat, Vlorë dhe Gjirokastër.
Në këto 8 qarqe, Lapaj po del forcë e tretë.
Në këto qarqe nuk çau dot as Agron Shehaj, një njeri i cili ka tetë vite në politikë dhe ka shpenzuar miliona euro, teksa ka punësuar rreth 50 mijë njerëz në Shqipëri ndër vite.
Lapaj doli mbi pasanikët e politikës. Ai ishte i vetmi që krijoi frymë. U penalizua nga fakti që shqiptarët kanë vite që kanë humbur shpresën te politika. Me opozitën parlamentare të shkatërruar, me gafa pas gafash, njerëzit nuk u nxitën të votonin, sepse ishin të vetëdijshëm se rrotacioni ishte i pamundur.
Nesër numërohen kutitë e fundit. Lapaj është disa qindra vota larg marrjes së një mandati në qarkun Fier. Do të ishte i dyti pas atij të qarkut Tiranë. Ekziston ende një mundësi që të fitojë një mandat në qarkun Vlorë. Gjithsej, 3 mandate.
Mos harroni. Ai është 37 vjeç. Ai nuk blen vota. Ai nuk ka punësuar njerëz. Ai nuk është pasanik. Ai nuk ka qenë pjesë e PS apo PD, duke përfituar nga emri apo logoja e partisë së madhe. Ai erdhi nga rrugët dhe sheshet e Shqipërisë.
Shoqëria jonë është e pezmatuar. Shqiptari nuk e jep votën për kollaj. Kryesisht e bën kur pret që të marrë diçka mbrapsht. Shqiptarët e dinin se vota kundër pushtetit nuk do t’u sillte asgjë mbrapsht dhe, fatkeqësisht, historia e viteve të fundit ka treguar se shqiptarët votojnë duke kërkuar një avantazh personal. Pavarësisht kësaj plogështie kolektive, Lapaj frymëzoi 70.000 zemra shqiptare. Ky është numri i njerëzve të cilët ende besojnë se ky vend mund të bëhet normal.
Lapajn e penalizoi edhe sistemi zgjedhor. Me votat që mori, në një sistem si ai i Kosovës sot do të kishte 5-6 mandate. Kjo vërteton se politika shqiptare është kalbëzuar me kohë dhe faji nuk mund të jetë i politikanëve të rinj, por i ujqërve të vjetër, të cilët pikërisht me këtë sistem zgjedhor u bënë kuçedra dhe morën më qafë këtë vend.
Përpara se ta kritikoni apo ironizoni Lapajn, kemi tri pyetje të thjeshta për ju:
1.Nëse jeni kundër të vjetërve, por nuk ju pëlqen Lapaj, a votuat ju për një parti tjetër të re?
2.Sa mandate mori Albin Kurti në fillim të rrugëtimit të tij politik?
3.Sa bëjnë 730 mijë plus 185 mijë? Janë shifrat e shqiptarëve të cilët marrin një shifër mujore nga shteti (pension, ndihmë ekonomike, kemp ose pagë në administratë). Gjithsej, 915 mijë shqiptarë të varur nga partia-shtet. E kuptoni se çfarë përbindëshi është sistemi ndaj të cilit po lufton Lapaj?
Po, Shqipëria sot ka 915 mijë rrogëtarë, të cilët presin fundin e muajit për të mbushur barkun.
Matuni mirë para se t’i kërkoni llogari një 37-vjeçari me 18 muaj përvojë politike…
Marrë nga Muri i FB Histori Shqiptare, 13 maj 2025