Duroja dhe Qendroja…
një rrëfim për Astrit Delvinën nga Avni Delvina
Astrit Delvina ka qenë i rrallë. Njeri fantastik, edhe pse bëri një jetë burg, edhe me internimet e shumta nëpër fshatra, edhe kur vinte rrallë nga internimi, me thëniet e tij të veçanta me batutat pikante e gjithë fantazi, ai dëshmonte forcën e imagjinatës, dhe jetonte si njeri normal, e as donte t’ia dinte si mund t’i vinte jeta mbas gjithë atyre vuajtjeve, ai vazhdonte të shkruante, i bindur në aftësitë e veta, bile Jozef Radi, që është marrë shumë me veprën dhe shkrimet e tij, në ato pak gjëra që i kanë shpëtuar e kanë arritur të publikohen, ma ka theksuar se është shkrimtari më i rëndësishëm i asaj periudhe.
Kur vinte në familjen tonë, nuk isha më shumë se 16-17 vjeç. Nuk e kujtoj mirë cila ka qenë ngjarja, ndaj po e tregoj si një batutë që më ka mbetur në mendje. Astriti ka qenë duke punuar me një dyshe. S’e kujtoj mirë në fshat a në burg, o kur ishte i internuar. Njërin nga dy miqtë e tij e quanin Duro dhe tjetrin Qendro. Aty u erdhi shefi o brigadieri, o dikush me pushtet, edhe ju tërhoqi një vërejtje të ashpër të dyve që kishin punuar aty. Mbasi iku shefi, u kthye Astriti duke qeshur. Ata të dy të tromaksur të shkretët, edhe të frikësuar nga ndonjë masë, ai duke qeshur iu drejtua të parit: “Duro, Duro të durojmë, Duro bëj durim!” Qendro po rrinte, dhe po e ndiqte Astritin, derisa ai iu kthye Qendros: “Qëndro, Qendro të qëndrojmë, Qendro mbaj qëndrim!”
Ishte një lojë e bukur fjalësh që Astriti bëri me emrat e tyre: dhe e përcolli me humor atë gjendje që po kalonin Duroja dhe Qendroja!
Jozef Radi
Siç e thekson edhe ti Riçe, Astrit Delvina ka qenë njeri i madh, shkrimtar i madh dhe humanist i madh… edhe pse bëri dy herë burg politik, ai la mbas një vepër të rëndësishme, ndoshta më e rëndësishmja nën diktaturë: 8 romane; 1 libër me tregime dhe nji libër me poezi! Nëse lexon Astrit Delvinën kupton dy gjëra thelbësore se: guximi është cilësi e njerëzve të virtytshëm dhe se liria përmasat e saj të vërteta i ka brenda nesh dhe jo jashtë nesh! Rrëfimi yt e plotëson edhe më tejt të vërtetën e Astrit Delvinës!
Marrë nga Muri i Fb, Avni Delvina, 5 maj 2026