At David Pepa, përkthyesi i Ismail Qemalit në Austri
nga Bep Martin Pjetri
Një detaj që tregon urrejtjen komuniste për shqiptarët katolikë.
At David Pepa, përkthyesi i Ismail Qemalit në Austri, shquhet për veprimtari të madhe atdhetare në kontributin e tij si përkthyes i gjermanishtes në shqip në Takimin e Ministrit të randoJashtëm të perandorisë Austro-Hungareze, Konti Leopold Bertholdi me Ismail Qemalin në Vjenë në pragë të Pavarsisë së Shqipnisë. Historia e 47 vjeçare e komunizmit dhe ajo e viteve të demokracisë-tranzicionit heshti si për shumë Martirë të Veriut edhe për veprën fisnike atdhetare të At David Pepa. Dhe ja ç’na rrëfen At Zef Pllumi në kujtimet e tij për At David Pepën në Vjenë; At Zef Pllumi në veprën “Rrno vetëm për me tregue”, ka shkruar: “…Isha famullitar në Shosh dhe papritmas vjen një malsor nga Dushmani (i Shllakut – B.M.P.) e më tha: Më ka dërgue Patër David Pepa me të marrë me i dhanë sakramendet e mbrame, se asht tue dekë. E ka prekë ajo e mira e i ka prekë gjysën e trupit… U nisa për Dushman dhe mbërrita pak para muzgut… U vendos që të nesërmen të nisej për Shkodër, për t’u shtrue në spital…
At Davidi atë vjet kishte mbushë 75-at. Atë natë ndeja pa fjetë tue bisedue me të… Më tregoi se në vitin e fundit të teologjisë (në Vjenë – B.M.P.), 1912, nëpunësit e Ministrisë Jashtme në Vjenë kërkuen kolegun e tij, Àt Anton Harapin. Mbasi ai ishte kthye në Shqipni, atëhere (Davidin) e muerën me urgjencë dhe e çuen në Vjenë. Aty e shtinë në nji zyrë dhe e bane me u betue se nuk do t’i nxirrte kurrë sekretet. E muerën si përkthyes ndër bisedimet që Ministri i Jashtëm Berthold (Konti Leopold Berchtold, austriak – B.M.P.) do të zhvillonte me Ismail Kemal Bej Vlorën… Atëhere Bertholdi i parashtroi Ismail Kemal Beut që të delte sa ma parë në Shqipni për me shpallë pamvarsinë. Ismaili iu përgjigj: “Mirë se flamurin e kam, por nuk kam shtizë ku ta naltoj dhe flamurin pa shtizë e merr çdo erë që fryn”. Atëhere Konti Berthold iu përgjegj: “Për shtizë të këtij flamuri keni bajonetën austriake.” Kishte ba që 40 mijë trupa (austriakë – B.M.P.) të niseshin nga Bosnja në kufi të Malit të Zi. Ismail Beu plot gëzim iu përgjigj: “Kështu po, jam gadi, se vetëm kjo asht garanci për shtetin e ri shqiptar”.
Àt Davidin e ngarkuen me e shoqnue Ismail Kemalin deri në Triestë, ku pritshin tjerë shqiptarë.
U morë fjalë për fjalë te faqja (73 – 74) libri studim “Dushman – Temali në rrjedhjë të kohëve” – autor Ndoc Ndoja, Botimi “Camaj – Pipa” – Shkodër 2008.
At Davidi vdiq në moshën 78 vjeç, në pragë të Krishtlindjes, më 21 dhjetor të 1967, dhe u dërgue në shtëpinë e qetë pranë njerzve të familjes në Varrezat Katolike të Rrmajit. Egërsia e ateizmit komunist ndaj besimtarve katolikë nuk arriti të pengojë farefisin, miq e dashamir nga Shkodra besimtarët malsor të Shllakut, të Dushmanit, Temalit e ngado ku shërbeu me aq dinjitet e dashni.
Marrë nga Turning Point Alb, 28 nëntor 202