back to top
8.5 C
Tirana
E premte, 29 Mars, 2024

Një histori bese në Mirditë – Për ata që pyesin: “Ç’ka âsht Besa?!” – Përgatiti Gert Vlashi

Gazeta

Kulla e Çokut në Lajthizë të Oroshit
Kulla e Çokut në Lajthizë të Oroshit

Një histori bese në Mirditë –

Për ata që pyesin: “Ç’ka âsht Besa?!”

Përgatiti Gert Vlashi

Në bjeshkë t’Oroshit, djali i Ndrec Çokut kishte l’shu gjanë e gjallë për kullotë. Ai i binte fyellit dhe shijonte bukurinë natyrore të vendlindjes. Pushkën e kishte mbështur në një lis të motshëm, krejt pa mendu se çfarë e përgjonte pas drizave e shkurreve.
Papritur, nga shkurret dalin tre hajna (hajdutë) të armatosur, që i sulen tufës. I riu u ndje i papërgatitur, por i vendosun me e ruejtë mallin e vet dhe bukën e robve. Pa ba za tërhoqi pushkën, zuri pozicion pas një guri dhe u thirri: “Kushdo qofshi, mos bani gabim me prek në tufën time!” Për një moment ra heshtje, pastaj u dëgjua një krismë pushke. Agresorët, gjuajtën në ajër për ta trembur. Djali në anën tjetër u përgjigj po me pushkë. Disa bashkëfshatarë të djalit që ishin pak minuta më larg në mal, pasi dëgjuan krismat u nisën me të shpejtë. Ndërkohë, gjatë shkëmbimit të zjarrit, një plumb e merr në ballë çobanin. Hajnat, duke parë bashkëfshatarët e çobanit që po afroheshin me të shpejtë të armatosur, nga frika e kundrapërgjigjes për djalin e vrarë, u ndanë dhe u munduan të ikin nga sytë-këmbët. Dy nga ata hynë në pyll, ndërsa tjetri, bash ai, doraci që kishte vrarë çobanin, u dha këmbëve për nga fshati. Fshatarët i ishin afruar shumë, gati për ta kapur a vrarë. Ai u zu ngushtë, ishte i kapur ose i vrarë po të vazhdonte. Instiktivisht vendosi të kërkonte besë në shtëpinë e parë që do haste. Fryma po iu merrte, këmbët po e tradhëtonin, zemra i dridhej nga frika e hakmarrjes, pasi kishte vrarë një njeri të pafajshëm. Kur gjithçka i dukej terr, gjendet në oborrin e një kulle: “O i zoti i shpisë”. Në derë del një plak, i mbajtur, nga ato burrat e zakonit që nuk i kanë munguar kurrë malsisë! “Hajde”, foli plaku. “Po më ndjekin me m’vra, ndore tane e të Zotit. Më jep besë”, foli vrasësi gjithë frikë e përultësi: “Qofsh në besën teme”, foli gjithë fisnikëri plaku.
Ndërkohë fshatarët që po e ndiqnin u afruan oborrit të kullës, e u shtangën kur panë vrasësin më plakun. U zu një heshtje prej varri! “Dëgjoni burra, ça do që të ketë ba ky njeri, sot është në besën teme. Kush ndez pushkë në të, ka ndez pushkë me shpinë e Çokut”, theu heshtjen me vendosmërinë e besës dhënë, plaku. Përsëri heshtje….
“Po ai i paburrë ka vra djalin tënd or Ndrec Çoku”, foli me gjysëm zëri një nga burrat e fshatit.
Plaku u dridh, u nxi në fytyrë, por e kontrolloi veten.
“Boll barrë e randë më paska ra or burra, por kjo nuk ndryshon asgja në besën që kam dhanë”, foli dhe pastaj iu drejtua vrasësit- “Ti më ke vra djalin, e më ke gjakun borxh. Por më ke kërku edhe besë, e unë ta kam dhanë. E, malet tona nuk e shkelin besën e dhanë. Sonte je mik te unë. Nesër do të t’i them dy fjalë!”
Gdhiu mëngjesi, askush nuk kishte fjetë. As mortja nuk ishte hapur. Para kullës ishin mbledhë gjithë burrat e fshatit. Doli edhe Ndrec Çoku bashkë me vrasësin e të birit.
“Ke besë 30 ditë, tre nga njerëzit e mi do të të përcjellin deri në kufi të bajrakut tonë, siç e lyp zakoni e besa. Pas 30 ditësh mbyllu mrena se do të të vras!”, vetëm këto fjalë foli Ndreca.
Vrasësi u shoqërua nga njerëz të besuar e të armatosur deri në kufi të bajrakut. Në kullën e Çokut u hapen dyert për mort dhe për t’i dhënë nderimet e fundit djalit të vrarë.
Pas një muaji, Ndrec Çoku dhe njerëzit e tij vrasin doracin. Kështu marrin gjakun e djalit, por respektojnë edhe besën e dhënë.
Për këtë rast është folur brez pas brezi me shumë respekt në malësitë e Mirditës e jo vetëm.
Marrë nga Muri i Fb i Marjana Koçeku 5 maj 2022

Related Images:

More articles

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.

Portali Radiandradi.com, prej 11 vitesh dhuron kontribute të përditshme në shumë fusha të kulturës, historisë dhe vlerave shqiptare. Herë pas here siti ka nevojë për mirmbajtjeje, rikonstruktim si dhe rikonceptim në formatin letër. Për ta mbajtur këtë punë shumvjeçare, ndër më seriozet dhe më të lexuarat që të vazhdojë aktivitetin bëhet e domosdoshme mbështetja e lexuesve.

Jozef Radi

Redaktor i Radi & Radi

Artikujt e fundit

Copy Protected by Chetan's WP-Copyprotect.