back to top
16.5 C
Tirana
E enjte, 28 Mars, 2024

Ekspertja e hetuesisë – nga Kastriot Dervishi

Gazeta

Studiuesi Kastriot Dervishi
Studiuesi Kastriot Dervishi

Ekspertja e hetuesisë

nga Kastriot Dervishi

Nëse Kuvendi i “cigareve” do ta kishte seriozisht kërkesën për Diana Çulin, do mjaftohej të shihte librat e Bedri Blloshmit e dhjetëra dokumentarë që janë bërë për procesin e poetëve. Por jo, ata i mbrojnë si sytë e ballit hetuesit, prokurorët, gjyqtarët, ekspertët e proceseve politike, si dhe oficerët e Sigurimit, sepse këta janë kocka dhe gjaku i tyre. Por ama formalisht kur janë vetë të bërë pis, bëjnë kërkesa sikur po u intereson “pastërtia” e të ngjashmëve të tyre. Se cilët janë ata, mjafton t’i shohim kiminë dhe sigurisht të mos harrojmë faktin se gjithnjë kanë qenë kundër ligjeve të lustracionit. Por të jemi të qartë. E keqja në komunizëm nuk lidhej vetëm me Sigurimin e Shtetit. Është njëra anë e së keqes. Harrohet ndër të tjera hetuesia, e cila pas vitit 1974 nuk ishte më pjesë e Drejtorisë së Parë të Sigurimit. Konkretisht, Diana Çuli nuk ka qenë bashkëpunëtore e Sigurimit të Shtetit, por eksperte e marrë nga Drejtorisë së Hetuesisë në MPB. Nuk ka nevojë të shtohen epitete të panevojshme, por të thuhet vetëm e vërteta siç është ajo. Veprimtaria e saj nuk ka pasur karakter agjenturialo-operativ. Është veprimtari botërisht e njohur. Sipas Kodit të Procedurës Penale të Republikës Popullore të Shqipërisë, miratuar nga Kuvendi Popullor me ligjin nr.1650, datë 30.03.1953 burime të provave në një proces penal ishin: thëniet e dëshmitarëve, thëniet e të pandehurve, mendimet e ekspertëve, provat materiale dhe dokumentet. Sipas “Platformës së punës operative e organeve të punëve të brendshme” organet e hetuesisë kishin për detyrë të demaskonin “në mënyrë të shpejtë, të gjithanshme dhe deri në fund armiqtë e popullit të çdo kategorie”.
Sipas urdhrit nr. 837, datë 16.2.1974, “Detyrat funksionale të Drejtorisë së Hetuesisë të Ministrisë së Punëve të Brendshme”, Drejtoria e Hetuesisë në punën dhe veprimtarinë e saj, udhëhiqej “nga vija e direktivat e partisë, nga ligjet e shtetit dhe nga Platforma e organeve të punëve të brendshme”.
.
Genc Leka - Poezia Oxhaku
Genc Leka – Poezia Oxhaku
Në rastin konkret, më 28.09.1976 hetuesi Selim Caka, vendosi të caktojë Diana Çulin si eksperte letrare për krijimtarinë e Genc Lekës. Çuli është rënduese këtë rast për të provuar akuzën e agjitacionit e propagandës sipas nenit 73 të Kodit Penal (miratuar me dekretin nr. 2868, datë 16.03.1959). Kjo vepër dënohej 3-10 vjet, por kur kishte “shkaktuar pasoja veçanërisht të rënda”, dënohej nga 10 vjet e deri me vdekje.
Për veprimtarinë e Diana Çulit (ose rasteve të ngjashme), nëse ka interes, një autoritet shtetëror ose joshtetëror nuk duhet t’i drejtohet AIDDSH-së, por vetëm Drejtorisë së Arkivit të MB-së (për konsultim të dosjes hetimore-gjyqësore nr.10859) gjykatës përkatëse (nëse është administruar edhe hetimi atje dhe dosja nuk është dorëzuar ende në arkiv), si dhe Drejtorisë së Arkivit të Sistemit të MD-së. Në të gjitha rastet, vërtetohet njësia me origjinalin dhe nuk merret vendim kolegjial sepse e vërteta nuk zgjidhet me vota. Një simbolikë e ka kjo punë ama, vullnetin politik. Kuvendi i djeshëm votonte Agron Tufën, djalin e një të burgosuri politik, ndërsa Kuvendi i sotëm i “cigareve” do votojë Diana Çulin.
.
14 Mars 2020

 

Related Images:

More articles

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.

Portali Radiandradi.com, prej 11 vitesh dhuron kontribute të përditshme në shumë fusha të kulturës, historisë dhe vlerave shqiptare. Herë pas here siti ka nevojë për mirmbajtjeje, rikonstruktim si dhe rikonceptim në formatin letër. Për ta mbajtur këtë punë shumvjeçare, ndër më seriozet dhe më të lexuarat që të vazhdojë aktivitetin bëhet e domosdoshme mbështetja e lexuesve.

Jozef Radi

Redaktor i Radi & Radi

Artikujt e fundit

Copy Protected by Chetan's WP-Copyprotect.