back to top
11.5 C
Tirana
E enjte, 28 Mars, 2024

Dom Simon, t’mbajtë Zoti nderën se ja rrite Shkodrës vlerën… nga Gjosho Vasija

Gazeta

Dom Simon Jubani - Nëntor 1990
Dom Simon Jubani – Nëntor 1990

Dom Simon, t’mbajtë Zoti nderën

se ja rrite Shkodrës vlerën.

nga Gjosho Vasija

Gjosho Vasija - Parodisti
Gjosho Vasija – Parodisti

***

Bash n’ktë kohë kur vlonte sherri,
kur n’Atdhè sundonte Ferri
e çdo truell mbulonte terri,
që prej Jugut n’bjeshkë t’Kelmendit
ishte djalli zot i vendit,
që përzhiste me barot
për kush thoshte, besoj n’Zot..!
 
Kur nderkohë burgjet n’Shqipni
kishin mbrendë ka nji për shpi,
ku nji pjesë u vrane n’Zall,
e nji pjesë doli tek gjallë..
Bash n’kte kohë, kur nëpër shpija
në çdo kand u sillte urija,
edhe fmijtë me vàj në gushë
mbushën mal e shpat e fushë…
 
Po n’k’të kohë kur diktatura
si postblloku nëpër ura
“mizë” nuk lente me i kalue
“Prej kah vjen, ku don me shkue?
Edhe kurr mos të mendoni
se prej plumbit tim shpëtoni,
në k’të vend kurr’ s’do guxoni
as të flisni, as t’mendoni” –
E n’sa bante zhurmë cikloni,
nxorri kokën Dom Simoni…
 
“Kush asht vallë ky Dom Simoni
që kaq shum po e vlersoni,
a mos asht bre Kastrioti
q’e ka ngjallë së dytit Zoti?”
“Jo bre mik, ky Dom Simoni
që po thoni e diskutoni
s’asht luftari që mendoni,
por nji Hyll që bani dritë
bash at ditë kur s’e kem pritë..
 
Pra, në kulmin e mjerimit,
të trishtimit të regjimit,
i bamë shpirti paçavure
me’i hy Kishes n’katër mure,
me pà Meshë, me puthë Figure,
Baaaaam! kërset nji pushkë pa pritë.”
“O çka asht pushka more n’ktë ditë,
a mos asht ndoj krisëm vàjit
ajo pushkë sot n’Fushë të Rrmajit?
“Jo bre jo, mos u friksoni
nuk asht vàj ai që mendoni
por qet “pushkë” sot Dom Simoni…
.
Mesha e pare - Shkoder 4 nantor 1990 (foto Angjelin Nenshati)
Mesha e pare – Shkoder 4 nantor 1990 (foto Angjelin Nenshati)
.
E kur “krismën” ndigjoj Shkodra
mori turr me male e kodra
plak nuk mbet atë ditë te votra,
nuk mbet grue n’at fund motmoti
pa shkue atje ku lutet Zoti,
me’i fmij n’krah e dy përdore,
tue marrë turr si ortek bore,
e madje e zhgrehun vàjit
aty fill e n’Fushë të Rrmajit..
U mbush Fusha, aman o Zot
çka s’kish pà syni deri m’sot,
me t’thanë mendja qinda e mija,
me t’thanë mendja t’tanë Shqipnija
kishte hy atë ditë n’atë lamë,
thue dhe t’vdeknit janë çue n’kambë…
 
“Hapi sytë mori njiherè
a din gjà, kush duel n’Eltèr?
Ai po m’duket shkamb mermèr
q’e kanë hypë mbi piedestal?
Po ti shih, Ai duket mal??”
Ate fill e shpërthyen pritjet,
aty plasën duertrokitjet
e s’u mbajtën brohoritjet…
……………
Dom Simoni trim dhe Murg
njiqind stinë iu kalbën n’burg…
N’njiqind stinë q’u burgos trimi
s’e ligshtoi jo kurr rregjimi
me torturat ma çnjerzore,
pa u hjekë kurr hekri dore,
veç lagshtinë, uri e gjak,
pshtyjë e shtyjë gjitherë n’dajak.
 
Por ama aq sa lot mali,
sa mund t’bahet fushë Cukali
aq u lodh dhe Dom Jubani,
atherë n’fund foli dushmani:
“E ka fajin prokurori
kur në gjyq kryeneçen nxorri
e me i plumb shpirtin s’ia mori”
 
Por mendue s’e kà “lavdia”
se kur vritet pafajsija
asht në Qiell i Madhi Zot
që s’e mban kandarin kot
por me to mbushë Ferrin plot..
Ndërsa “Prifti” pa farë fajit
sot thotë Meshë n’Fushë të Rrmajit!

 

Related Images:

More articles

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.

Portali Radiandradi.com, prej 11 vitesh dhuron kontribute të përditshme në shumë fusha të kulturës, historisë dhe vlerave shqiptare. Herë pas here siti ka nevojë për mirmbajtjeje, rikonstruktim si dhe rikonceptim në formatin letër. Për ta mbajtur këtë punë shumvjeçare, ndër më seriozet dhe më të lexuarat që të vazhdojë aktivitetin bëhet e domosdoshme mbështetja e lexuesve.

Jozef Radi

Redaktor i Radi & Radi

Artikujt e fundit

Copy Protected by Chetan's WP-Copyprotect.